Der Goalie bin ig E-Book

Pedro Lenz

• Herausgeber: Der gesunde Menschenversand
• Kategorie: Gesellschafts- und Liebesromane
• Serie: edition spoken script
• Sprache: Deutsch
• Veröffentlichungsjahr: 2010

Seitenzahl: 202

Beschreibung

Der erste Roman von Pedro Lenz! In 'Der Goalie bin ig' hält ein Ich-Erzähler Rück-schau auf ein verlorenes Paradies. Der 'Goalie', ein Süchtiger aus einem Dorf im Mittelland, erzählt in Umgangssprache von seiner Lebenswelt in den 80er-Jahren. Seine Sicht auf die Umgebung ist getrübt vom Wunsch, sein bisheriges Leben schönzureden. Nach einer Gefängnisstrafe versucht er wieder im Alltag Fuss zu fassen, findet eine Gelegenheitsarbeit, verliebt sich in eine Serviererin und reist mit der Ange-beteten nach Spanien – und trotzdem holen ihn die alten Geschichten immer wieder ein. Lenz gelingt ein berührendes Porträt des 'Goalies' und einer kleinen, uns wenig bekannten Welt mitten in der Schweiz. Doch da die grosse Welt aus lauter kleinen Räumen besteht, haben wir es hier zweifellos mit Weltliteratur zu tun.

Leseprobe

PedroLenz

DerGoaliebin ig

edition spoken script 45. Auflage, 2012

© 2010 Der gesunde Menschenversand,Luzern Alle Rechte vorbehalten

eISBN 978-3-905825-17-6

Herausgeber EditionMatthias BurkiUrsina GreuelDaniel Rothenbühler

LektoratDaniel Rothenbühler

GestaltungAlder GrafikDesignSeraina Alder

ProjektTypografischer Gestalter Zürich

e-Bookmbassador GmbH, Luzern

Herzlichen Dank für die Unterstützung an KulturStadtBern, SWISSLOS/Kultur Kanton Bern, Migros-Kulturprozent, FUKA-Fonds Luzern, Burgergemeinde Bern

www.menschenversand.ch

Tondokumente Kapitel 1+17 aus: Pedro Lenz & Christian Brantschen, Der Goalie bin ig, Hörbuch, Der gesunde Menschenversand, 2011. Text/Stimme: Pedro Lenz, Komposition/Musik: Christian Brantschen. (P) Textaufnahme: 2011 SRF Schweizer Radio und Fernsehen.

1.

Aagfange hets eigetlech vüu früecher. Aber i chönnt jetz ou grad so guet behoupte, es heig a däm einten Oben aagfange, es paar Tag nachdäm, dasi vo Witz bi zrügg cho.

Vilecht isches öppe zähni gsi, vilecht e haub Stung spöter. Spüut ke Roue. Uf au Fäu hets Bise gha wi d Sou. Schummertau. Novämber. Und ig es Härz so schwär, wi nen aute, nasse Bodelumpe.

Goni auso i ds Maison, es Fertig go näh.

Ds Abschiedsgäud vor Chischte hani scho vertublet gha, ohni genau z wüsse wie. Ig ke Chole, aber unbedingt es Kafi Fertig und chli Gsöuschaft und chli Stimme bbrucht, denn.

I säges jo, nüt im Sack aus es paar Sigeretten und chli öppis i Münz. En Ängpass äbe, aber e ziemlech e böse. Ha drum uf öppis gwartet, woni z guet hätt gha. Nume, säg das mou öpperem, wennde grad usem Loch bisch cho, säg mou öpperem, du heigsch zwar ziemlech vüu Gäud z guet, sigsch aber grad nid bsungers flüssig. Das interessiert jetz gar niemer.

Auso, wi gseit, ig i ds Maison, es Kafi Fertig bschtöut, frogtmi d Regula, obis chöng zahle.

Ke schlächti Frog, wemen überleit. Bissoguet tue nid liire Regi! Weisch was, jetz bringsches afe mou, machen i zuenere, nächär luegemer de.

Bisch en ewige Stürmi, seit si und bringtmers.

Has nid tippet, macht si när und luegt mi so aa, weiss ou nid wie, angers aus süsch, mit chli meh Sehnsucht i den Ougen oder öppis. Ke Ahnig wies angerne geit, aber mi wärmt das grad bis z innerscht inne, wemi e Frou wi d Regi eso aaluegt.

Merci Regi, bisch e Liebi. Zahleders de mou mit bätte zrügg.

Söu doch bitte ufhöre mit minen ewige Sprüch. Und söu mi vor auem nid dra gwöhne, seit si, wöu, wenn der Pesche erfahri, dass si das Fertig nid tippet heig, de gäbs de extremi Lämpe. I wüss jo säuber, wie der Pesche mängisch chöng tue.

Dasch e Gueti, d Regula, die chame rüehme, die luegt zuenis, seitsech eifach, das tippeni jetz mou nid und das merkt jo wahrschinlech kenen und der Wirt, der Pesche, dä merkts sowieso zletscht und der Goalie het sis Kafi Fertig und schluss.

Mir isch jo das scho lang bewusst gsi, dass d Regula es grosses Härz het. Aber a däm Obe het si mer ou süsch afoh gfaue.

Dasch im Grund gnoh extrem komisch. De kennsch e Frou sit Johren und überleischder gar nid so vüu und plötzlech, nondediö, plötzlech het si öppis. Mou, plötzlech het si öppis, wo di närvös macht, plötzlech gfaut si der. Do söu no nochecho wär wott. I ha vüu offeni Froge gha, a däm Obe, ehrlech. Aber uf ds Mou hetmi nume no ei Frog würklech interessiert: Isches ächt möglech, dass d Regula und ig i däm Läben einisch es Paar wärde?

Du, Regula, hani gmacht, chönntsch mer ächt nid e chliine Gfaue mache? Chönntisch nid bis am Mändig e Grüeni entbehre? Weisch, ha drum no ziemlech vüu z guet, aber gägewärtig fasch gar nüt im Sack, es Problem ir imaginäre Erfougsrächnig, wenn d weisch wieni meine.

Si luegt mi wieder aa. I heig mi offebar nid veränderet, z Witzwiu, seit si no, und dasme nid würd meine, dasi fasch es Johr dihinge sig gsi, wöu, we me mir eso zuelosi, de sigi no ganz genau der gliich Plouderi wie vorhär.

Stürm doch nid scho wieder, Regi. Du hesch ke Ahnig vo däm. Du weisch nüt vo mir und du weisch nüt vo Witzwiu. Aber das isch äuä besser eso. Chasch froh si. Und wägem Chümi: I wott di würklech nid aabättle, ehrlech nid, du entscheidisch, auso entweder heschmer dä Füffzger oder du heschmerne nid, und de frogeni öpper angers. Dasch aus.

Si hetmernen ömu de gha, hetmerne zämegleit i d Hemmlitäsche gschobe, ohni Kommentar. I hanere d Hang gnoh und hasen uf d Innesite vom Arm küsst, und hanere gseit, we de nid müesstisch bügle, würdi di jetz grad hei näh und verruume. I schwöre ders, Regi, i miech di glücklech.

I sig e blöde Lafericheib, het si zuemer gmacht und chli glachet und ig ha ou glachet. Het guet to, wieder einisch z lache, würklech guet. Ha drum nid eso vüu z lache gha ir Letschti, ehrlech nid.

Woni ds Fertig fertig ha gha, bini ggange, überen i Spanierklub, go luegen öbs no öppis z Ässe gäb. Es het tatsächlech no öppis ggäh, obwouh dases scho spät isch gsi. Der Paco hetmer chli Fisch gmacht und chli Ris gwärmt. Guet eso.

Woni so lang sig gsi, heter wöue wüsse. Är heig mi jo en Ewigkeit nümm gseh.

Galera, hani gmacht, weisch, Alcatraz, und ha mit de Finger vor den Ougen es Chrüz aaddütet, eso, dases usgseh het wienes Gitter.

Är het nume si schwär Chopf gschüttlet und chli ds Mu verzoge. Dört düre si die no guet, do im Spanierklub, di wüsse, wenn nochefroge und wenn grad ender nid.

Du Paco, säg mou, hesch du öppe der Ueli nöime gseh oder d Marta? Nid? Si si nid verbicho? Macht ou nüt. Isch übrigens guet der Ris, tipptopp, mou, Cheibe chochet guet, würklech.

Gracias Quiper, heter gseit. Quiper chunnt vo Keeper und heisst ds Gliiche wi Goalie, aber so wimes uf Spanisch seit. Merci, är wärds gärn usrichten ir Chuchi, heter gmacht und derzue hetermer chli Rote nochegschänkt mit sire grosse, ruhige Hang, womi denn grad a d Hang vo mim Vatter erinneret het, wo zwar nid der Eifachscht isch gsi, aber mängisch ou so ne ruhigi Hang het gha. Ig auso Rote vo Navarra im Glas, vom guete. Obwouh, weni denn grad hätt chönnen useläse, hätti fasch lieber es haubs Löffeli Schugr gha. Und gliichzitig hani gwüsst, dass das jetz mues höre, dasi ändgüutig e Strich mues drunger zieh, unger das elände Gift und das ganze Glump. Es isch doch logisch, chasch jo nid ds ganze Läbe lang däm Kick nocheseckle, ds ganze Läbe lang nume warte, bis es wieder Spläsch macht im Gring oben und der d Wärmi sogar no zmitts im Winter wi ne heisse Summerwind dür d Vene bloset.

De hesch auso der Ueli nüt gseh? Weisch, i suechene drum, muesnen öppis Wichtigs froge.

Nei, seit der Paco, nei, är heigne scho lang nümm gseh, sicher meh aus e Wuche. Armen Ueli. Heig sicher Problem.

Der Ueli isch es Pajass, Tschuudigung. Aber das hani am Paco nid gseit, dasch e Sach zwüsche mir und mir, das muesi niemerem säge, nid emou am Ueli säuber. Es regt mi eifach uf, dassde mit däm blöde Gigu nie öppis verbindlech chasch abmache. Nie, nie!

Guet, är hetmer di Wohnig gmischlet, das mues ou mou gseit si, mini Loge hani dank ihm, wöu si Vatter Beziehige het zu dere Verwautig oder was weiss ig zu wäm.

Aber sorry, es isch jo nid sini Hütte, i zahle der Zins, i meine, merci, merci Ueli, dankedanke, merci tusigmou, aber das het nüt mit üsem Business z tüe. D Wohnig isch d Wohnig und ds Business isch ds Business. Und wennden amne Kolleg versprichsch, du heigschim denn und denn der Chole, wo d nim schwach bisch, de heschnen ou denn und denn oder süsch seisch öppis oder lütisch aa, schribsch es paar Zile, losch öppis lo usrichte, weiss doch ou nid, irgendöppis, aber verschwindisch doch nid eifach vor Büudflächi.

I ha uf d Uhr gluegt, wo obe, näbe däm vergüubte Real-Madrid-Wimpu isch ghanget, a däm Bauke, wo ou d Neonröhren aagmacht si. Haubi zwöufi gsi. No ne Veterano und när hei, hani ddänkt. Nume hetsmi nid aagmacht, bi däm Dräckwätter use z goh. Gimer e Brandy, Paco, aber guet iigschänkt, bissoguet, es isch wieder chaut verusse.

Isch irgendwie komisch gsi, dases im Spanier nid meh Lüt het gha, i meine, he, es isch e Fritig gsi. Es paar Jungi am Töggelen und es paar Auti am Schnore, dasch aus gsi. Und ig dörten am Warten uf weiss säuber nid was.

He Aute, mach öppis, du muesch öppis mache!, hani zu mir säuber gseit, und no mou e Brandy bschtöut. Guet hetmer d Regula dä Füffzger ggäh gha. Me isch eifach en angere Mönsch, weme chli öppis im Portemonnaie het. Aber weni der Ueli nid gli finge, hani ddänkt, mues si äuä no chli Geduud ha, d Regula, bis si öppis zrügg überchunnt.

Woni ar Regula umeschtudiert ha, hani ds Ougewasser übercho. Weiss säuber nid worum, es isch extrem piinlech, alei amne Tisch z hocken und z merke, dass der eifach Tränen abeloufe.

Du Goalie, mir wette Fürobe mache!

Dasch am Paco sini Frou gsi. Wenns drufa chunnt, isches gäng si, wo mues luege. Der Paco isch z weich, dä cha nid Fürobe mache, dä bringtnis nid use. Aber si scho.

Ig auso chli d Ouge gribe, dases usgseht, wie weni en Entzündig hätt, zauht und ggangen und gäge hei zue. Aber nid der diräktischt Wäg gnoh, nei, no gschwing wöue bim Maison düreloufe, luege, ob vilecht d Regula ou grad Fürobe macht. Drum hani dört im Höfli no eini groukt, mit Ussicht uf die hingeri Türe, wöu i ddänkt ha, si chömm de dörten use. Liecht hets ömu no gha, ir Beiz. Wär schön, se no churz z gseh, hani ddänkt. Bi am Schärme gschtange, im Dunkle. Me hetmi vor Stross us nid gseh und vom Parkplatz us ou nid, zum Glück. Der Budi het drum ou ufse gwartet. Aber der Budi isch im Chare ghocket, der Budi isch ihre Typ gsi, der Budi isch offiziell gsi. Der Budi het d Regula vom Schaffen abghout, wöu er e Funktion het gha, wöu me das so macht, wemen e Fründin het, wo im Service schaffet und me sicher wott si, dass si hei chunnt. Vor auem wenn si im Maison schaffet, wo zum Bispüu söttigi Bandite wien ig verchehren und no schlimmeri.

Gratuliere Budi, hesch auso aues unger Kontroue, kontrolliersch di Chare, kontrolliersch dini Fründin, kontrolliersch dini Frisur, kontrolliersch di Bluetdruck, bisch der Chef, Budi, hundertpro, du bisch der Champion, Budi, dir ghört si, du heschs im Griff, hesch si im Griff, bravo, bravo, bravo Budi, du Brätzelibueb, hani ddänkt und afe mou a Bode gchoderet.

I ha denn und dörte nüt gha, ke Aaspruch, ke Chance, ke Chole, ke gar nüt. Hätt nume zuefäuig wöue düreloufe, wenn si usechunnt und zuere säge: He lueg jetz, d Regula! Hesch ou grad hei wöue? Wo muesch häre, Regi? Los mou, i begleite di. Nei, äuä, es isch würklech ke grossen Umwäg, stöu der vor, nei chum jetz, ehrlech nid, es macht mer nüt us. Ha sowieso dört düre wöue.

Und ufem Wäg hätti chli myschteriös gschwige. Das chunnt meischtens guet aa. Grad wenn eini der ganz Tag serviert het, de muescheren am haubieis nid no meh d Bire füue. De muesch afe mou chönne schwige, eifach schwige, zuelose, wenn si öppis verzöut und wenn si nüt verzöut äbefaus. Und nächär, spöter, vor ihrere Wohnig, chli häben und drü Müntschi uf d Backe, aber bim letschte dervo, e haubi Sekunde länger druffe blibe mit de Lippe, eifach es bitzeli länger aus normau wär. Und de furt. Und de no mou umdräien und ganz churz winke.

So hättis gmacht, so dass si hätt chönne dänke, dasch eigetlech no ne subere Cheib, dä Goalie. Siech isch zwar grad es Johr lang dihinge gsi, het zwar ke Chümi im Sack, aber derfür heter chli Stiiu. Und wieso heter vori bim Abschiedskuss zögeret? Mi hets doch fasch ddünkt, är heig churz zögeret bim letschte Kuss. Fasch wi wener no länger hätt wöue küsse. Oder hanis ächt nume gmeint?

Genau söttigi Gedanke söttisch einere wi der Regula mit ufe Wäg gä. Das wäre Gedanke, wo si no nes Zytli chönnt Fröid ha dranne.

Das aues hanimer überleit gha. Und voren im Schatten isch der Budi i sim ufegschrüblete Celica ghocket und het d Aalag ziemlech ufddräit gha und d Heizig sehr wahrschinlech ou. Nume grad ig ha a däm blöde, zügigen Eggen a Ranze gfrore wie nes chranks Chaub im Winter, für nüt und ohni Musig.

He Goalie, was isch los? Was machsch jetz no do? Wartisch ufne Lüngenentzündig?, hani zuemer säuber gseit und bi hei, z Fuess und aleini, wi immer.

Your browser does not support the HTML5 audio element.

2.

D Regula isch nid di einzigi wos weiss. I bi nes Zytli z Witzwiu ghocket, Voupension, he jo, wäge Giftgschichte. Bi nid der Erscht. E Chlinigkeit. Es Zwüschetöif. Dumm gloufe. Dasch aus. Keni Usrede. Ha Seich gmacht. Es paar hei z vüu gwüsst und vo dene hei wiederum es paar z vüu gschnoret. Es hetmi gfüdlet und inegnoh. I ha mini Zyt abghocket. Ha aues uf mi gnoh. Ke einzige Namen usegloh, was nid nüt isch, wemes genau aaluegt. Und jetz isches verbi. Sorry. Meh gits zu dere Gschicht nid z säge, ömu no nid grad jetze. Ds Einzige woni vilecht no sött sägen isch höchschtens, dass ig immer aues säuber gmacht ha. I meine, i hamer das, woni bbruucht ha immer säuber bsorget, usswärts. I bi nie verwicklet gsi i grösseri Giftgschichte. Ha nie z vüu wöue z tüe ha mit dere komische Dealerszene bi üs z Schummertau, wo jede jede kennt und niemer am angeren öppis gönnt, ussert vilecht e Grippen oder e Hutusschlag. Und so hanis dürezoge, alleini, bis uf das einte Mou, wosmi gnoh het.

Jetz versuecheni wieder ufzstoh, wieder Fuess z fasse. Suechen e Bügu, öppis Regumässigs. E Wohnig hani scho gfunge, auso nid ig, der Ueli oder genau gseit, ihm si Vatter. Isch nid schlächt, zwöi Zimmer, Zentrauheizig, Badwanne, isch eigetlech sehr guet. Aber jetz brucheni unbedingt e Bügu. Süsch chunnts wieder so, wies nid sött.

I meine, i chönnt jederzyt öppis mischle, chli do öppis liire, chli dört öppis liire, dä ahoue, der anger ahoue, es paar Telefon mache, chli inenäh, chli useloh, chli d Ougen und d Ohren offe ha, wär aus zäme kes Problem. I bi ne komunikative Typ. I ha d Ökonomie meh oder weniger begriffen und vor auem: I kenne jede, räschtlos jeden und zwar innerhaub und usserhaub vo Schummertau. Ds Problem isch nume, dasi das jetz ha gha. Das wotti nümm, wott e gwöhnleche Job und Änds Monet der Zapfen ufem Konto und Änds Johr e Grati oder e Drizähnten und merci Goalie und fertig.

Und d Regula. Di würdi ou wöue. Mängisch, ir letschte Zyt, weni alei deheime hange, de dänkeni a d Regula, überleggemer, wasire würd säge und vor auem, wasire nid würd säge. Und de stöui mer vor, was si würd sägen und was si würd machen und was si würd dänken und de dünkts mi aube, es wär guet. Isch würklech komisch. De kennt me sech scho söfu lang. Und erscht sit i vo Witzwiu zrügg bi, chunntsimer i Sinn oder äbe sit däm Obe, wo si mer der Füffzger het pumpet. Würklech komisch. I chumen ou nid noche.

Bi grad wieder a däm Thema, am umestudiere, früeche Nomitag, brätschets ar Türen und das obwouh dasi es tipptopps Lütti ha. Goalie! Bisch deheime? Mach uf bissoguet, i bis, der Ueli.

Chum ine du Chappe, s isch offe. Aber mach grad wieder zue, tamisiech, es chunnt Chaut ine. Ha nümm dra ggloubt, dass di no losch lo blicke. Hesch es Bierli wöuen Ueli oder söu i es Kafi mache?

Är gseht nid optimau us, mueses säge, gseht ender chrank us, extrem chrank, zums genau säge. Was isch los Ueli? Bisch düre? Hets di gfüdlet? Hesch der Gäub?

I söu eifach d Lafere haute, meinter.

Auso heschne!

Nei, chli verchöutet, dasch aus.

Dasch jetz äuän e Verchöutig! Das gloubsch jo säuber nid. Zersch bisch gopferteli nienen umen und när chunsch eso derhär. Söttsch di gseh. Lueg mou ine Spiegu. Gsesch us wie nen aute Bärgchäs. He Ueli, i wott nid, dass den im Züg umehangisch, wenn de der Gäub hesch. Das isch ziemlech suboptimau. Gang zumne Dokter, i weiss der eine, en aaschtändige. Mach öppis! Chasch nim grad aalüte, der Wydemeyer, dä nimmt di vilecht hütt no, wes mues si, isch e guete Dokter und e guete Typ, nid sone Moralischt, wi di meischte. Wenn d wotsch lüten ig nim aa.

Aber är wieder nei, i söu nid spinne, är heig nüt, är sig zwäg, sig nume schnäu cho sälü säge, heigmer ds Couvert mitbrocht, tüeg ihm leid, dass es chli länger sig ggange. Und daser froh sig, seiter no, dasmen ändlech e Strich chöng drunger zieh.

Der Strich han ig zoge, Ueli, der Strich han ig zoge. Und wemer der Chümi hesch, isches umso besser, aber dänk dra, dass ig der Strich zoge ha.

Scho guet. Lueg, i leggeders do zu de Banane, nid dassde nächär grännisch, du fingischs nümme. Und zöus no noche, Goalie, zöus bissoguet noche.

Kes Problem. I zöues spöter noche.

Es isch e Huufe Gäud, Goalie, es ghört dir, es isch würklech vüu.

Es knapps Johr Witzwiu isch ou nid weni, Ueli.

Und de plötzlech, nach emne Zitli, ob i nim ächt nid vilecht chli Puder heig. Nume wenig. Numen es haubs Briefli oder so, weisch, oder süsch es Räschteli, öppis, wo vilecht mou isch blibe lige. Merke drum, wie der Aff langsam chunnt oder ender schnäu.

Ueli, wie mängisch muesme ders no säge! Gloubmers doch! I ha ufghört, fertig. Chasch d Hütten ufe Gring schtöue, fingsch nüt. Di Wohnig isch suber wie nes Chinderzimmer. Es isch verbi, i sägeders. I ha nüt meh z tüe mit dene Gschichte. Dasch definitiv. I bin es Johr dihinge gsi, Ueli, das längt. Weisch wieni meine? I bi imne nöie Füum, Ueli. Ds angeren isch düren und groukt. I sueche mer e Job und legge chli öppis uf d Site. Und när macheni de mou Ferie. Am Mittumeer oder so. Nüt angers. Ganz normau, am Morgen usen und am Obe hei cho, e Bächer oder zwöi, e Rundi dür ds Dorf und de bi Ziten i ds Näscht, und ke Stress und kes Gliir und nüt meh. Und nie meh uf so verlogeni Liirihüng warte, wien ig säuber eine bi gsi. Und weni e Fahnder gseh uf der Stross, chani nim i d Ouge luegen und fründlech grüessen und wener zrügg luegt, chani dänke, lueg nume, lueg nume du bugglige Rattefänger, lueg mi numen aa, du Löffubueb, i bi süberer aus suber, süberer aus du und süberer aus aui zäme.

Jo, dasch Crème, bravo Goalie, e härzigi Frou, Chindersitzli im Outo, es Reiheneifamiliehüsli imne Vorort und es Saisonabi im Fitnesszänter, heter gseit, und dass ig das jo säuber nid gloubi. Und was ig de eigetlech ds Gfüeu heig, wäri sig. Und ob i jetze scho gloubi, i sig der nöi Mönsch, der Poulus vor Damaskus oder öppis. Und i söu doch obenabe cho. Und ussertdäm, i sig jo immer der erscht, wo huere giggerig wärdi, wenn öpper ds Bschteck füre nähm.

Das bringter no öppe, der Ueli, das mitem Poulus vor Damaskus. Siech isch drum no rächt düre mit der Bibu, wöu er mou Griechisch und Latin und weiss nid was het gha im Gymer und gloub no Theologie het wöue studieren oder sogar chli gschtudiert het. Und jetz auso wieder einisch der Poulus vor Damaskus. Und bi au däm Glafer, e sone chranke, glänzige Schweissfüum i sim Gsicht, der Ueli.

Chum, säg, sägs Goalie, sägmers nume! Was meinsch, wär de sigsch und was meinsch wär de chönntisch si?

I meine gar nüt, Ueli, aber i mues ufhöre mitem Gift, wöui no nes paar Plän ha im Läbe.

Goalie, du redtsch scho fasch wi mi Père. Hör bissoguet uf und gimer irgendöppis.

I hanim es Fläschli Resyl-Plus ggäh und e Schäri, daser der Tropfezähler liechter wägg bringt. Woners offe het gha, heter ds ganze Fläschli i eim Schluck furtputzt und de hanim e Löffu Honig häregha, wägem Gschmack im Mu und ha zuenim gmacht: I meine nüt Ueli, ehrlech nid. Vo mire Site här isch aus ir Ornig. Mach doch du was d wotsch. Machet doch aui, was der weit. I rede nume für mi. Verschteisch? I bi nid vor Zäutmission. Sägen aus nume wäge mir säuber.

I bi dussen und dasch lang gnueg ggange, chaders säge. Und jetz mani gar nümm drüber liire, wöu das isch nämlech grad ds Nöchschte, womi extrem närvt am Gift, dass aui wo druffe si, immer numen über Gift chöi schnore. Und jetz lüt doch bissoguet däm Dokter aa. Gsesch us wie nes richtigs Zombie. Es macht eim fasch Angscht.

Du, säg mou, worum losch eigetlech nid chli Musig lo loufe, Goalie?

Dört düren ischer guet, der Ueli, das muesi zuegäh, scho gäng guet gsi, är cha ds Thema wächsle, bevor me Krach überchunnt. Machter immer so. Auso tueni chli Stones über und bringen ändlech zwöi Büchsli Bier.

Wo suechsch? Der Bügu meini. Mueses öppis bestimmts si? Oder temporär?

Nei, hanim gseit, sigmer fasch chli gliich. Vilecht nid grad ufe Bou, jetz ufe Winter, aber süsch sigsmer chli gliich.

Är chöng jo süsch mou si Père froge, seiter.

I weiss nid, obi das wott. Dä hetmer scho d Wohnig bsorget, i meine, z letscht louft mis Läben über di Vatter.

Aber der Ueli seit: Hör doch uf! Für öppis kennter Lüt. Bisch nim jo när nüt schuudig. Für ihn isches eifach. Är het Beziehige. Är het Fröid, wenn er öppis cha vermittle, kennschne jo. Är hüuft gärn. Überlegders doch mou.

Isch scho guet, Ueli, isch guet, isch guet, weni mou Zyt ha, überleggimers de vilecht. Und weni öppis bruche, gibi Bscheid.

I ha churz d Wohnig glüftet und gfrogt, waser no vor heig. Hesch es Outo biider? Mir chönnten uf Mäuchnou, luegen ob d Edith deheimen isch, chli würflen oder so. Die hätt sicher Fröid, we si nis wieder mou gsuch.

Nei, seiter, är mües witer, mües luege, daser öppis chöng bsorge.

Das isch äbe ganz genau ds Thema. I säges jo die ganzi Zyt. Chasch nüt Normaus mache, wenn de druffe bisch. Chasch nid einisch eifach säge, so, voilà, jetz gömer dört und dört häre, näme chli öppis z Ässe mit und chli Roten und machenis e schönen Oben und chochen öppis Feins und schnore chli vo früecher oder so und heis guet. Chasch nie dänke, so, jetz heimer chli Fröid am Zämesi und luegen es Video oder machen es Mätschli mit de Würflen oder näme d Gitarren und singe no chli vo däm Bob Dylan Züg oder Hannes Wader oder süsch irgendöppis wo eim schön truurig macht. Nei, chamen aues nid mache, muesch immer dim elände Flash nocheseckle. Isch doch wohr.

Jedefaus isch das afe nüt gsi, mit däm Usflug uf Mäuchnou.

I has beduuret und der Ueli isch ggange.

Säg ar Marta e Gruess und gang ändlech zum Dokter, hanim no nochegruefe, aber das heter nümm ghört, wöu er scho änen am Bahnübergang isch gsi.

I ha chli d Chuchi ufgrumet und ds Couvert tschegget, föif Tonne. Der ganz Betrag uf einisch. Het schön usgseh, aus zämen i Hunderternötli, so wies mues si. Merci Ueli, hani ddänkt und bi när ids Dorf, afe mou chli öppis z Ässe go choufen und chli Butzmittu fürs Bad und es paar Fläsche Wy, vom Guete, sicherheitshauber.

Und nei, d Rabattmärggli nimeni nid. Und öich ou e schönen Obe. Und merci äbefaus, Frou Zürcher. Und merci, i wotts gärn usrichte. Und klar dänkeni dra. Und adiö, danke, merci.

3.

Am Midwuch druf lütet mer scho am Morgen eine vore Versicherig aa. Weckt mi am Nüni. Bravo. Husrat und Haftpflicht oder was, chiem gärn mou bi mir verbi, heigmer en Offerte, unverbindlech.

Hani irgendeinisch en Offerte verlangt? He, hallo, het irgendöpper gseit, i bruchi irgend en Offerte? Chami nümm erinnere, sorry, aber das wüssti doch, i weiss doch vo wäm dasi was verlange. Ussertdäm, aber do chönger jetz nid so vüu derfür, ussertdäm sigi grad nid so guet druffe.