Liebeslied E-Book

Alex Gfeller

• Herausgeber: Books on Demand
• Kategorie: Gesellschafts- und Liebesromane
• Sprache: Deutsch
• Veröffentlichungsjahr: 2022

Seitenzahl: 47

Beschreibung

Irgendwie erliechteret mi di Entscheidig, numeno uf Bärndütsch zschribe, wüu es ganzes Läbe lang hettme gäng widr vrsuecht, mi umzbiege, abzändere, umzpoole u zrächtzrücke, zersch natürlech idr Schueu, idr Usbiudig, im Militär u när vor auem im Pruef u ganz psungers i mire Tätigkeit aus Schriftschteuer, me globz gar nid. Läck du mir am Zuckrschtock! Was hettme nid aues a mir umegnörglet, umegnürzet, umetöckterlet u umekorigiert! Was hettme mi nid gäng zrächtgwise u igschüchteret u bedroht u erpresst! Was hettme mi nid schtändig kontroliert u korigiert u abserviert u schigganiert u injoriert! Bis hütt! Alex Gfeller, Schriftsteller und Landschaftsmaler, geboren 1947 in Bern, lebt in Biel.

Leseprobe

Thar idr Nase u Thar ade Ohre rede itze nümm mitenang. Si hei nämlech scho lang beschlosse, dase Usenangersetzig ungerenang ke Sinn meh het u o ke Bedütig meh ergit, wüusi eifach kener Zämehäng meh xeh idr dampfend füechte u warme Wöschchuchi vom tosende Läbe. Das muesme ja zersch mau chönne begriiffe, das muesme zersch mau vrschtah, das muesme zersch mau richtig chönne nachevouzieh, schüsch bringz grad gar nüt meh.

Abr di meischte verschtö das sowiso nid, zu Rächt übrigens. Di grossi Mehrheit seizech eifach: «Ja, we das nüt iischüttet, das huere Schribe, u we das nüt usschüttet, das huere Male, we das übrhoupt ke Umsatz bringt, dä ganz kułtureu Vorsatz u Isatz u Ufsatz u Ussatz u Asatz u Absatz, de hezja gareke Sinn? Schtimmz odr hani rächt?»

Abr wär weis das scho genau? Wär cha das scho richtig beurteile? Wär het da scho dr richtig Übrblick, dr passend Iblick idi ganzi komplizierti Sach udr agmässnig Usblick us dr ganze Kataschtrofe? Niemr chaja öppis vorussäge, u niemr xeti Zuekumpft ine, nidemau zOrakel vo Delphi odr dBlick-Aschtrologin. Niemr. Dzuekumpft ischja drzue so blöd u so voukome düreknallt u so grüntlech abvrreckt, das hie ke normale u vrschtändige Mönsch druf chäm, wisi würklech gieng, wisi würklech funzti, wisi würklech würdi usecho u wisi würklech flutscht im Ganze xeh. Isches nideso?

Sidr dasmr auso Thar ufm Chopf usgheie, u das düesi scho lang, wachsesi drfür umso meh usdr Nase u usde Ohre. Irgndwie ischmr dr ganz Haarwuchs eifach e chli abegrütscht. Sit Nöiem rasieremr Thar nümm am Chini u am Haus, sondrn usdr Nase u usde Ohre use, u zwar mitemene praktische Naserasierer, wonimr einisch usm Internet ha la cho, das isch haut am eifachschte so. Dä brucheni o für Thar ade Ohre u ide Ohre, das geit grad am Gliche zue, u das ischo öppis, woni früecher nid gwüsst oder berücksichtiget ha. Aber da chasch nüt drgäge mache, das isch eifach so wis isch.

Si wachse nöierdings wedr ufm Chopf, no ade Bei nache, no schüsch irgendwo, onid ade Zäng u nidemau am Buch odr am Sack.

Nüt da! Dasch lengschtns vrbi. Nume idr Nase u ide Ohre wachsesi no, dick u schwarz u wüescht u pouselos. Du chaschse usriisse, abr si wachse trotzdäm widr nache. Vilech ghört das ja zuesätzlech zur ganze männleche Komik, wär weis das scho genau. Dasch sicher nume e wittere Witz vodr Natur, wo näbem nid chönne richtig Bisle nume gäge Tmanne grichtet isch. Zerschemau bringemr zSchnäbi nümm ufe u när chöimr o nümm richtig bisle, u när wachsenis Thar usde Ohre u usdr Nase. Bravo chame da numeno säge, bravo!

Aber vilech kenne Pfroue das ja o irgndwie, i weis gar nid wie. Di rasiere sech ja o di ganzi Zit a aune mügleche u unmügleche Schteue; mir wei hie gar nid iz Dettai ga. Es git ja no viu Schlimmrs, es git nämlech viu, wono viu schlimmr isch aus Thar idr Nase u Thar ide Ohre. Zum Bischpiu kabuti Zäng, dasch unuswichlech, odr e kabuti Niere, e kabuti Beziehig oder e kabute Töff.

Es paar hei mänggisch ab Sibezgi plötzlech schneewiissi Zäng bim Lache wine Fiumschouschpiler, wine Schütteler odr wine Diräktr, ude weisme aube grad sofort, wases gschlage het.

Es git aber, was Töffe betrifft, nüt Schlimmers aus e Choubechlemmr, nidemau es kabuz Wäutbiud mah da no nache. Zmiz ufere rasante Fahrt ischesmr passiert, winis mau säubr erläbt ha, sone huere Choubechlemmr, woni bim Bene hingr druff ghocket bi. Sisch aber scho lang här. Aber was isch schones intakz Wäutbiud gägene richtige Choubechlemmr? Wäutbiudr giz wi Sang am Meer, da chame aube grad usläse, wasme wot näh, u irgndwie si ja eigetlech aui Wäutbiuder lengschtens kabut.

Vomene kabute Wäutbiud merktme nämlech gar nüt, wüumes gar nümm cha merke. Me isch ganz eifach ztumm drzue. Das isch wi mittr Vrblödig, vo dere merktme säuber o nüt, wüume ja ganz elei u nume ganz langsam verblödet. Drum kennemr wenigschtens das scho lang u wüsses sit eh und je, das mittm Choubechlemmr. Mir wüsse auso wis isch, weme mittm Töff irgendwo im Gjätt usse landet u dert blibt hocke usech so richtig vrrate u vrsecklet u vrgässe vorchunnt. Mir si denn no jung xi u hei nüt aus Blödsinn im Sinn gha, ehrlech xeit.

Womer nämlech Zradufinge äne näbe dr Lättgruebe dr Schtuz ap si cho, dr Bene vore unig hingr druff, isches grad passiert, udi Bütti het bim Mülibrüggli ungr e länge Schtopp bis übr dKurfe use zmiz iz Gjätt ine u fasch i Bach abe gschrisse, wüu zHingerrad blockiert het. Genau dert hez aber angersiz e schöne Chirschiboum gha mit viune riiffe, saftige, süesse Chirschi dranne. Mir heinis gno, wasmr hei chönne, wüumr dert ja sowiso numeno blöd dasumegschtange si wäge däm Schistöff wo grad ändgüutig nümm ggange isch, es ische aute 250zger-Maico mittemene Zwöitaktmotor xi, e zimmli rasanti Bänne, muesi säge.

Abr dr Müuer isch grad sofort cho zseckle u het scho vo Wittem gmöögget u gschumpfe wi am Schpiess, het grüeft u gfluechet wine More. De simer haut wider ufgschtige, mir zwe Löle, o we dr Motor ja gar nümm gloffe isch, abr das sigi sicherer so, heimeris tängkt, u vilech chunntr ja gar nid dahäre, vilech cherter widr um, wüur dängkt, mir fahri grad widr furt u sige scho widr wägg, no bevoreris vrwütscht hät. Heimr tängkt. Abr dä Siech hezzech vo üs nid la tüüsche. Är hettis eifach churzum abm Töff gschrisse u so richtig zämegschisse, genau so, wisinis schpeetr bim Militär hei zämegschisse, di Tuble, nume wäge dene paarne Chirschi womr ggässe hei. Me chönnt o meine!