Schnure wi truckt E-Book

Koni Dick

• Herausgeber: BoD - Books on Demand
• Kategorie: Gesellschafts- und Liebesromane
• Sprache: Deutsch
• Veröffentlichungsjahr: 2024

Seitenzahl: 230

Beschreibung

Eine Tonbandabschrift vom letzten prospektiven Sonntagsgespräch zwischen Koni Dick und Toni Dünn.

Das E-Book Schnure wi truckt wird angeboten von BoD - Books on Demand und wurde mit folgenden Begriffen kategorisiert:
Gürbetal, Kehrsatz bei Bern, Surrealismus, Kultur, Vergnügen

Leseprobe

Koni Dick (1943-2023) u Toni Dünn (1943-2023) si ihres ganze Läbe lang zwe unbekannti Schriftschteuer u Landschafzmaler xi u hei immr im chline Dorf Kehrsatz (Chäsiz) bi Wabere gläbt, zSwaziland,wo zAmerika äne gäng widr mit Schwede odr Switzerland vrwächslet wirt. Abr wägemene vöuig unbegründete Subversionsvrdacht, jahrelang hartnäckig witrgschtröit vom ifrsüchtige lokale Oberscht Schwarzeburger vode örtleche Vrsorgixtruppe namens «Suppe mit Schpatz», heisi nie di gringschti Müglechkeit u o nie di chlinschti Chance gha, am sehr bescheidene kultureue Gscheh vo irem chline Land zwüsche Ungerland u Obrland uf irgend e Wis teilznäh u si drum ihres ganze Läbe lang absolut erfouglos u unbekannt plibe. Mängge isch abr froh xi.

*

Auso, dr Koni udr Toni, auso Dick u Dünn, si widr einisch amene graue, längwilige Sundinamittag idr Schtube mit Blick ufd Dorfschtrass bim Konzipiere u bim Repliziere:

Sichr sis widr nume Legr.

Wi meinsch?

Legr! Eifach nume Legr!

I weis nid, wasde drmit meinsch, Toni.

Du weisch doch genau, wasi meine! Iz due doch nideso blöd!

I due nid blöd.

Mou, du duesch blöd.

I weis nid, wasde iz widr ufz Mau hesch. Vori isches doch no so schön xi? Aues ischno richtig guet glüffe mit üs? Mir heis doch no so gäbig gha zäme bim Zmittag?

Was schön xi? Nüt isch schön xi. Es ischno nie öppis schön xi bi üs. Du schtürmsch widr, Koni.

I schtürme nid, du schürmsch, wemers gnau wei wüsse.

I ha xeit, es sige nume Legr xi. Meh nid. Uni darf dängk wou no säge, dases Legr sige xi?

Was meinsch drmit?

Di Schtürmicheibe weinis doch gäng nume inelege! Ikomensschtür u Vrmögensschtür, Grundschtückschür u Dachzieguschtür, Gartehagschtür u Füdleabputzschtür, Töffschtür, Vrwautixschtür, Chrangkekasseschtür, Giguschtür, Iischribixschtür, Ufschribixschtür u Abschribixschtür, drzue ono Tschnurisiecheschtür u Tarschläckixschtür, Pfrlängerixschtür u Fahrzügschtür – uni weis nid was no aues!

Dasch haut eso. Dasch überau so. Was wosch?

Si weinis doch eifach nume inelege, dasch doch aues. Drmit isch o grad aues xeit.

Weli Schtürmicheibe?

He, dängk di Schtürmicheibe zChüniz äne! Die vodr Gmein!

Werum?

Werum, werum! Du machschmi no fertig mit dim Werum, Mano! Xesch hie das Formular? Es Schtürerklärixformular! Hesch das no nie xeh? Weisch nid, was das bedütet?

Ja, und? Es Formular isches Formular, meh nid. Es Stück Papir. Numenes gschissnix Formular, schüsch nüt, nume eis vo zäh Milione idr Zähmilioneschwiz, schüsch würklech nüt! Mit däm chaschdr grad zFüdle abputze, meh nid. Für meh aus fürz Füdle abputze isch das nid zbruche.

U när?

Was, u när?

Was chunnt när?

När chunnt nüt meh.

Eifach nüt meh? Gar nüt meh?

Gar nüt meh. Niemeh.

Tröimsch?

I tröime doch nid! Ich mache nume mis Züg, dasch aues. I zagge nidseo dasume wi du, ibi produktiv. Xeschja das aute Tonbandgrät hie. Grundig. Das hetis no nie la hocke.

Du heschmr widr Asichte, Koni! Di bringenis no id Chrutze! I sägedrs nume! Mir lande beid im höche Auter no idr Chischte, wirsch xeh!

I ha scho gäng di gliche Asichte wi du gha, Toni. Nume du wächslisch Tasichte gäng wi Tungrhose.

Ich wächsle nüt, Koni. I ha das nid nötig. Mini Asichte si sattufescht u tubelisichr. Das sisi scho gäng xi.

Ahbah! Wasäch! Blödsinn!

Schtur u grediuse u nüt vo hingrdüre u vo vorenabe u ungrufe u hingerzi zrügg! Dert düre bini subr. I ha mini isige Asichte no nie gwächslet, nid so wi du. Sisi bi mir praktisch wi i Schtei gmeisslet. Da chasch druf ga, Koni! I ha Asichte wi i Schtei gmeisslet! Merkder das!

Das düngktmi iz no!

Was düngkti no?

Abah! I rede gar nümm mitr. Es het ke Sinn.

Iz plötzlech?

Dini Asichte wi i Schtei gmeisslet! Das hani no gar nie ghört vo dir. Ibi immr drvo usgange, das dini Asichte wi schlappi Schpagetti drhärchöme u überau idr Gägend dasumehange u abelampe.

Mini Asichte?

Dini Asichte.

Wi schlappi Schpagetti?

Wi schlappi Schpagetti, ja.

Abelampe?

Abelampe, ja. Wi bim Dalì.

Dasch ungrächt!

Was isch ungrächt?

Wi du mini Asichte duesch beurteile, Koni! Iz mau ehrlech! Du woschmi ja nume widr provoziere! Du wosch, dasi vordr richtig emozionau zämebriche umi im Schtoub due wäuze vor Scham udr eis zämegränne u phoupte, i sigi gar nideso widu mi gäng duesch häreschteue u lächerlech duesch mache. Du dängksch widr nume ad Tonbanduswärtig.

Söuidi tröschte? Muesidi psychologisch widr ufschteue? Muesidr Muet mache udr vrzeue, wi guet du im Rahme vo dine bescheidene Müglechkeite daschteisch?

Due nid blöd!

I due nid blöd, du duesch blöd, wenn scho!

I due nid blöd. I due nie blöd, i bine seriöse Ma mit schöne Haar u schöne Ouge umene seriöse Läbeswandu. Uni ha eidütig gäng di viu schönere Brüue anne aus du.

Das seisch iz eifach nume so. Drbi hanidr denn eigehändig dini Brüuene usgläse. Zwabere äne, weisch no? Bi dere junge Kolegin, wodr schöni Ouge het gmacht.

Ja, was ächno aues!

I hadr denn ja xeit, was zuedr passt, u was nid. Wes nach dir ggange wär, hätisch du dir denn zWabere äne ja richtigi Schisbrüuene usgläse, u das nume wäge dere übrparfümierte Schlampe dertäne hingr dr Ladetheke.

Dasch nid wahr! Erschtens isch das ke Schlampe xi, sondrn e nätti Kolegin, uni ha zwöitens pungkto Brüue viu dr besser Gschmack aus du. I hadr perfekt Brüuegschmack, weni das hie a dere Schteu mau i auer Bescheideheit darf säge; uf das chasch blindlings ga.

Das düechtmi no! Dr perfekt Brüuegschmack! Da muesi grad lache!

Ude ersch Tchleidr! I hadr scho immr xeit, wasde muesch alege u was nid, Koni. Ohni mi wärsch du ja vrlore imene Chleidrlade! Du würdisch dasumelouffe widr letscht Pennr, wi dä vo Bättlähäm!

Aba!

Nüt aba! Es ischeso. I gibe hie sit langem dr schtilistisch Ton a, i mache Tmusig, wede so wosch, udu tramplisch nume hingrnache.

I mues grad gredi uselache! Was du hie widr aues vrzapfsch! Das cha eine elei ja gar nid gloube! Weni nid wüsst, dases grad angersume isch, auso grad umgekehrt, wäri iz furchtbar vrworgglet u vrzworgglet wäge dir!

Was äch no aues!

Uni müesst grad am Pole zBäup äne ge vrzeue, was du widr fürne Seich usegla hesch.

Ja, gang nume zum Pole ge gränne! Dä wirter gärn witrhäuffe! Dä wirtr zeige, wos düregeit im Läbe. Genau sone huere Schtündeler bruchsch du iz i dim Autr, churz bevor du dr ändgüutig Abgang machsch!

Dr Pole isch ke Schtündeler.

Vrzeu ke Seich! Dr Pole isch wou e Schtündeler! Däm louft ja dr Saft abe vor lutr religiöser Ufregig! Hesch nid xeh, winr gäng Tschnure het müesse abputze mitem Naselumpe? Wine aute Püntu, wo nümm au sinr Säft ungr Kontroue het! Dr Schpöifr ischim nume so abeglüffe!Sisch nid zum Zueluege xi!

Däm louft nüt abe. Är isch wou e Greis worde, unr isch jane Greis wi mir o. Mir si glich aut, usdr gliche Klass u iz aues Greise worde. Hesch das no nid gschnauet? Schliesslech simr denn zäme bim Gärbr i Tschueu ggange u si iz au drei haubblödi Tattrgreise worde u am Ändi vom Läbe acho.

Dängk wou louft däm gäng öppis abe. Hesch nid xeh? Dä vrlürt ja schtändig au sinr Körprseft! Vilech bisletr sogar iz Bett! Genau wi dr Bouvard udr Pécuchet.

Iz chunnsch widr mit dene zwene Löle hingrfüre! Du muesch gäng di aute Gschichte fürenäh, um öppis zbewise. Bewis mau öppis ohni dr Flaubert!

Das hani nid nötig.

Womr denn zäme dr Flaubert gläse hei, bisch ämu o begeischteret xi, so wi übere Victor Hugo, übere Alexandre Dumas, übere Jules Verne, übere Romain Rolland odr übere Marcel Proust u au die.

Di heimr denn ämu gfaue. Wenigschtens das, wüu hie ume gfautmer sowiso kene.

Dir gfaut no mängs nid, wedr Tag läng isch.

Dir ämu o. Muesch iz gar nideso tue! Mir hei dr glich Gschmack!

I säge ja gar nüt!

Du duesch iz grad, wi wesdi denn nid o intressiert hätti, womr zäme idr französische Literatur gschweuget hei wi imene Vrjüngixbad.

Di französischi Literatur isch sakrosangkt, das wüssemr. Da darfme nid drübr lache u nüt drann rüttle. Dasch heilix Gebiet.

Abah. Redemr vo öppis angerem.

Si hetmr denn nid schöni Ouge gmacht.

Was iz! Natürlech hezidr übere Ladetisch ewägg schöni Ouge gmacht! I has genau xeh!

Si isch nume früntlech xi, dasch aues. Abr das isch öppis, wo du gar nid kennsch u nie wirsch vrschtah. Du bisch nämlech dr unfrüntlechscht Typ zwüsche Seftige u Bärn, womesech übrhoupt cha vorschteue.

Bini nid.

Bisch du wou.

Bini nid.

Bisch du wou.

Ibi dr früntlechscht Typ, womesech nume cha vorschteue.

Da muesi grad grediuse lache!

I ha Maniere, im Gägesatz zu dir. I chume usdr chäsizr Obrschicht. Du nid. Du chunnsch usdr chäsizr Randschicht vodr hingrletschte Ungrschicht.

I chume usdr Ungrschicht, jawohl, u drzue schtani!

Du redsch aube gäng grad vo grusigem Züg, o weme vo irgendöppis angerem afat. Es brucht nume es Schtichwort zfaue, ude geiz grad los mite Pinlechkeite, ude fahz aube grad a mit dine Perversione.

Dueni nid. I ha kenr Perversione. I weis nidemau, was das isch.

Hesch du wou. Du hesches eifach aube gäng grad mitem Ungrlib. Hesch das no nid gmerkt? Das isch bi dir notorisch. Du hesches eidütig mite Genitalie u mitr Vrdouig. Meh chunnt vo dire Site nid, u meh chunnt vo dire Site nie. Du bisch haut eifach e Maniagg.

I lachemr grade Schranz. Wär geit aune ge vrzeue, dasmr ke Schtiiffe meh härebringe?

I weis ja nid, was du duesch hirne, u meischtens chumeni ja gar nid nache bi dir, ehrlech xeit. Dungkle Ruess lageret i fasch aune dine Hirnigfäss u gizech immr kulant wine Moore.

Abr nume wenigi Tage bevor di angere dr Ufschtand plane. U üsi Gägner düe würdig ide Kaschemme schlemme u so di geischtigi Entwicklig hemme.

Aba! Pfasane lagere desorientiert ide Schpaute u ide Faute vode Röckli vode diverse orientalische Buchtanzgruppene u orientieresech numeno nachde Mondphase u nachde länge Nase vode Oschtrhase.

Mänggisch wärde zuesätzlech no di grosse Beschlöinigr vode chline Teili härezoge, abr di usgwisene Fachchreft wei immr nume subr usgleiti u dütlech usglicheni Ränder ha. Vrschteisch? Muesch vode Rändr här dängke, wi dä vo Gämf, wi heisstr itz scho widr, dä Längwiler?

Du meinsch dr Ludwig Hohl.

Genau dä. Di wüsse das säubr ganz genau, usi hei das immrno fescht im Griff, wüu audi elektronische Sonderbotschafter, wodi autmodische Malereie adr Tili düe aluege, au die rote, grüene u gäube Vrzierige, wo früechr sichr zimmli uvrschämt guet hei usxeh, abr das wär hüt scho widr gfragt, wüu odi Rohrdommle im Schiuf usse trumele ohni Pouse ufd Schiudr vode änglische Camionöre u wei drzue ono umbedingt zäme mite brave Mugge ude dütleche Lücke ide Bärge idi grüene Gschtrüpp vode bodelose Flechine abgah u drna ungfragt iz Gebüsch idringe u dert ab sofort aus Chrüzrittr u Wandermaler ufträtte.

Was äch! Es git doch nume ganz weni Glägeheizarbeiter, wo dr richtig Momänt nid düe vrpasse u o de Riise gwoge si, ude meischte Exote blibt zLäbe sowiso uf Dur entzoge, u zwar energisch, wüu das mystische Wandzeiche, wo scho fasch aui für immr verschwunde hei xeh, das Zeiche adr Wang, vrschteisch, das gheime Zeiche i aune Metzgereie u a aune Brandmure vode vrschtorbene Boumeischtr u o ide jüngschte Brandruine vodr Gschicht.

Das hani no nie xeh, das blöde Zeiche.

Das zeigt sech sowiso immr nume am Sunndi am Abe zwüsche Achti u Nüni, unes zieht nume audi Glöibige u audi Glöibigr a, wo zFuess si cho u no nie am Voumond vrzwiflet si.

Abr odi grusige Schtrasseröibr. Massewis!

I weis. Wärs nid säubr xeh het, wirz nie gloube. Eine elei isch zschwach drfür.

Das isch tatsächlech e chli übrraschend, zueggäh, abr wär di dütleche Azeiche vodr Zit het erkannt, duezech ufenes unerwünschz Zämeträffe mitem aktueue Zitgeischt odr mitemene aktueue Ungeischt vorbereite.

Abr o wahri Einzugängr hei lengschtens di richtige Frage gschteut, wärde abr hüt numeno mit übrigplibene Floskle, Phrase u mit auem übrige Geischtesschrott vrsorget u so eigetlech rundwägg abgwise.

Abgwise isch richtig, Koni! Wär nume weni odr grad gar nüt vo däm vrschteit, wo iz grad passiert, hez eidütig einfacher u liechtr im Läbe, wüu di Liechte Brigade vode Seemöwe udi panzerete Chräbskolonie sech nöierdings sicherheizhaubr id Bruethöhline vode Kormorane ude Papageie begäbe u schliesslech dert mite aute Höhlebewohnr di regionau üebleche Mietvrträg übr Chärnschpautig, Angkeblüemli u Bachbumele düe abschliesse.

Auso e usprägti Schlagafäuigkeit isch eigetlech niene feschtzschteue, u drum erwäge audi nachefougende Wurmfortsätz vode schwarze Audi mehrheitlech dr schnäuer oder sogar dr haschtiger Abzug us auem tierische Gglir u Gfotz u us auem schreckleche Züg use, wo passiert isch u wome eifach nid het chönne vorusxeh. Vrschteisch, wasi meine?

Schpetr abr hetme scho gmerkt, das das aues scho lang vorhär isch vorbereitet xi.

Ja, das hetme nächär müesse zuegäh. Abr nume es par muetigi Cheibe unes par tröiji Sieche hei iri chrumme Zigerette usdr Not use ide Schpäut vode Rocksöim ude Vorhäng vrschteckt, wüusi lengschtens begriffe hei, das di zwangslose Widrschtäng zwäcklos si udi zwäcklose Zwangslose lengr wärde zwanglos blibe aus vorxeh.

Einersiz tschaupesi wi Tubeli dürdi wite Flure vode Fore ude Puure, dürdi wite Flore vode Foune vode Soumäge, u mänggisch abr o dürdi änge Fläschehäus vode Unbeschnittene, de Unbeschtrittene ude Unxittete, u angersiz vrschteckesi sech ide chum sichtbare Schpaute vode Aute mite vile Faute ude grobe Bouelesache anne ude müglechscht grosse Bluememuschtr ufde Hemmli.

Nume di Vrzagte udi Ungfragte wehre sech aube nones Zitli gäge di unberächtigte Schlämperlige, womene het bewusst aghängkt, gäge di fautsche Vorwürf, wosi hei müesse ghöre, u gägedi ganz u gar unbefridigende Ufgabeschtelige, wosi denn aube hei müesse entgägenäh, nume wüu e gnaueri Igab no nid di erforderleche Resultat het pracht.

I weises! Nume dr Klarheit vodr Schprach isches zvrdangke, dase gwüssi Vrschtändlechkeit nid eifach ufdr Schrecki blibt lige udi angere numeno blöd gaffe, wüu jedes einzelne Tönli het sis Böhnli, u jedes einzelne Chrönli vrdient i däm ganze Schiskonzept sis Löhnli, u jede einzelne, usgwachsnig Glon ische einzige Hohn ufem Mohn vom Ohm. Vrschteisch, wasi meine?

E usgwachsnige Hohn, ja. I weises ja. Du mueschmers nid no äxtra ungert Nase ribe.

Drum isch für aui Sittefüessler u Boumlöiffr xorget, u audi füdleblutte Wiener Sängerchnabe chönne zäme mite Wiener Würschtli äntlech ufatme u abfahre.

Uf längi Schtreckine use ergähsech sogar gfäuigi Nutzlosigkeite, wosech drzue psungers i nützleche Gfäuigkeite gfaue, wosech auso i gfäuigere Ergäbeheizadrässe ergöh, wo ide Ouge vo aune angere würklech viu zpinlech würke, so dasme drvo mues usgah, dasme audi vrgässene Einzuheite udi Zirkuszäut, wo lengschtens parat schtöh, nid eifach nume duet umringe u wo nächär eifach chönne düregheit u abegmacht wärde.

Si müesse doch aui grad aschliessend i ihrer Xamtheit, i ihrer Füui u i ihrer umfassende Integralität absolut vrschwige blibe u vorwiegend i ihrem eigete Schtumpf- u Schtarrsinn schtif u schtumm verblibe, nid wahr? Isches nideso? Hani rächt odr nid? Bini richtig informiert?

Du hesch gäng rächt, du Löu. Me darf abr trotzdäm übrrascht si, aber uf ke Fau dörfe o di Tagesinahme drvo betroffe si. Es isch vorderhand ganz usgschlosse, dasme zrügg zude aute Indefinitpronome, Wahrnähmixschtörige, Glägeheitsglägeheite u zude nöie Indezisitäte vode Stromlinieforme zrügg geit.

I däm sisech aui Teilnähmr vode ouschtralische Outorenne ude pazifische Orientierixlöif ganz u gar einig, unes blibt usgschlosse, dassi i au irne troffene Abmachige u vorsorgleche Beurteilige würde u chönnte odr müesste vrzichte.

I einige wenige Fäu heisech abr di Abschtäng zwüsche de ungnaue Prognose ude Azeiche vode vrlauerete Umschtäng vom Aseike dütlech vränderet, so das hüt leidr keni nöie Usnahme meh chönne gmacht wärde. Vrschteisch?

Übr gwüssi Vorgabe u vrschidenartigi Vorlage wirt abr ide Vereine vodr Buttrzentrale u grad ide dütsche Marketenderschtützpungkte no lang nid gredt odr sogar vrhandlet; me mues ja ide meischte Fäu zersch mau für Planixsicherheit vor auem im ganz intime Intimbereich, auso idr private Pschütti, abr o idr öffentleche Wassrvrsorgig sorge.

Das hesch abr widr einisch schön usegschaffet, Toni! Abr iz scho widr e ernöiti Widerigliderig idi usschtehende Kontroverse zwüsche de wahrhaft ungerschidlechschte Konsärvebulldozer ude japanische Konzärtpianischte isch u blibt ganz u gar usgschlosse, usi würkt im Rahme vode tektile ude tektonische Vrwärfige numeno wine blassi Episode ide nüechterne Erkennixforme, einersiz vonere schpontane Fläschepfandabgab odr vonere Konsärvebüchserückgab, angersiz umene eidütige Wägwärfixwiue unger lutr glichxinnte Parlamentariertierli u Parlamentariertierline.

Da hesch o widr rächt, Koni. Wode rächt hesch, hesch eifach rächt. Aui angere Argumänt vrschteckesech ide viune Schpäut zwüschede ungrschidlechschte Baukelage vode Böde udr Tili, wosi idr Regu immr no wärde zfinge si, bis zum Sangkt Nimmerleinstag, wes mues si.

Abr nid i die Betrachtige mit ibezoge blibe auerdings audi Näschtbeschmutzr udi Schtörefride, di Schärmüs, di Salamanderchünige udi Lumpeproletarier, wüu uf jedi Absaubig u Abschpautig vo vorgfasste Herbizid ide Kolonie usse, uf jedi Ungerwärfig vode Amsle ude Drossle im normale Tagesbereich vode chemische Fungizid ude Schtrotoskop vode brasilianische Schtossgarette chönne o Tiwohnr vode vrschneite Bärgbewohnerzone ude vrrägnete Flachlandusdehnige dangkend vrzichte, du weisch ja wie, usi chönne minetwäge aube grad aschliessend zfride u glücklech abdangke u für immr vrschwinde.

I weis nid rächt, Koni.

Was weisch nid rächt?

Di liecht fragwürdige Usschweifige vode Singvögu udi obsolete Nachbearbeitige vode örtleche Räbbärgschnägge hege u pflege u bewege doch nume di vile schöne Gomfischnitte, zwar merkbar, aber nid nachhautig, unes fragzech langsam, wi mänggisch di plagete Wassramsle no söue bemüeht wärde, nume um im Schatte vonere uraute Bachblächformazion unger de vile rabeschwarze Chuechebläch gnue Vorschuss zleischte, wüu nüt cha doch, ehrlech xeit, di texanische Chöttischträflinge i ihrem Vorgehe no ärnschthaft ufhaute. Isches nideso?

Das xeni oso. Es isch wis isch.

Si heisech ja tatsächlech scho zu salomonische Bachpułvergnosseschafte zämegschlosse u dängke langsam u gmeinsam adi firlechi Ernennig u Anerkennig vode usxuechtischste Bleischtiftzeichner ude bescheidenschte Chümigarner unger irne Mitglidr, udi firlechi Uszeichnig vode handgschribene Bewärbige vode schleuschte Kontradmiräu ude gfitztischte Salongeneräu blibe praktisch unerwähnt.

Abr nume Tnachfougr ut Schpätnachfougr vode schottische Sottisesammler wehresech no erfouglos drgäge, u so cha fougerichtig ere erfröilechere Zämefüehrig vode blaue Umzuxmanne nüt Bewegenz meh im Wäg schtah, wemi fragsch.

Wär dZeiche vodr Zit äntlech xeh het, choufzech iz schone marmorierte Guguhopf diräkt am Schtrand vom Marmarameer, nume wüu dKanone vo Navarone Tag u Nacht häu erlüchtet gägez tiefblaue Nüt grichtet blibe u wahrschinlech schtrategisch xeh numeno uf di heiligi Nidrkumpft vom Schtrahlechünig warte.

Im schlimmschte Fau müesse odi viufäutige Beweggründ vode enttüschte Bärgbewohnr liecht abgänderet de nöie Fakte apasst wärde, o wesech aues drgäge schtröibt usech aues drgäge ufschteut, wassech no lat la ufschteue im ganze Gschtürm mite Würm ude Türm.

Ja, abr nume di schträngglöibige Katholike häbe sech, zäme mite liechtglöibige Konzertante ude abgflachte Medielüt, immrno erfougrich im schnäufliessende Fliessgwässr uf, wo di runde, flache Schteine ufem Grund vom Flussbett witr muntr dasumepurzle u dasumeröuele, wi we nüt wär passiert u aus obse würklech nüt chönnti ufhaute, was ja tatsächlech anere geologische Realität u nid öppe amene geografische Zuefausprinzip entschprächi.

Das heimer iz abr schön usegschaffet, Toni. Das mues iz mau xeit si. Dert düre simr subr.

Ja, das heimr erlediget, u drum ergäbe odi Querlamäue vode Uffangbecki vodr Erkenntnis überne lukrativi Ufforschtig odr Abforschtig usrichend Uskumpft übere bedurlech Vrfau vom Zahnschpangeunwäse, aber nume wüu o im Bereich vode Don Quichoterie ude Sancho Panse ke einzigi Schtrömixmängiverminderig ide augemeine Glägeheizvrzögerige cha zueglah, umglah, iglah, umxetzt odr usxetzt wärde.

O we angäblich aues duet fliesse, widr aut Griech seit, so mues doch äntlech u nachwislech chönne berücksichtiget wärde, das grad im genereue Gwässrwäse odi optimale Fliessgschwindigkeite no lang nid erloubt u drum eifach gäh si.

Vorusxezt isch nüt.

Audi ungerschidleche Rektauforme lösech ja numeno vo Hang la bemüehe, usi benötige, wemese scho duet begradige u begliche u bereinige, no lang ke Zuesatzbeschprächig, nume wüu e Einheitlechkeit grad i däm Bereich übrhoupt nid gäh u scho gar nid gfragt isch.

Sische reine Fau vo Individualismus.

Sägemrs eso: Das isch no lang ke Erklärig für di Vrwachsige vode Oberklassige, wüu we scho vo Effizänz Tred isch, so mues doch zerschemau es gägesitix Grundvrtoue chönne vorusxetzt wärde, nid wahr?

Du hesch hie es Söiferli.

Wo?

Da, am Chini.

Ah? Merci.

Du söiferisch schon widr.

I söifere nid.

Du söiferisch gäng, Koni, immer denn, wede ines Züg inechunnsch. De söiferisch grad.

I söifere nie.

Wo simr iz vrblibe?

Bim Grundvrtroue.

Äbe. Numeno zkomunale Flüschtere isch offizieu zuegglah, unes ligt grad a däm breit aggleite Flüschterton, das grad di hufiseförmige Flädrmüs iri grosse, säguartige Ohre, wo würklech wi Hufise usxeh, düe schpitze u am Liebhaber odr adr Liebhaberin so iri schpontani Flugbereitschaft düe azeige.

Es cha zwar no lang nid vo Rächt u Ornig gredt wärde, abr dr witrümig u witflächig Abwurf von chline Plüschtierli überz ganze Gebiet isch lengschtens vorxeh, wüu niemer laueret freiwiuig ide inkontinänte Usschweifige dasume, bevorer nid subr dürefinanziert isch, u niemr erlöst di gussisige Bratpfanne vo irne enorm schwäre Techle.

Aui Vorignommeheite u aui schtaatlech vorgschribnige Vorsorgemassnahme, ganz glich weli, ergäh zäme grade effektivi Nussschaleformazion, wo nid nume di eiarmige Gouner duet usefordere, sondern odi optimale Zwärghüehnerentwürf duet notopfere u ufpfropfere u absorbiere u eliminiere.

Ufpfropfere isch guet! Drum heimr ja grad ide Boumschuele e zimmli unerlässlechi Unschtimmigkeit müesse feschtschteue. Uf die griiffe fasch aui Buntschpächte u Zugpfärd muetig zrügg, wene dr Sinn drnah schteit, usi chönne bocke, so langsi wei. Das schläckt ke Geiss ewägg.

Ei einzigi Usnahm blibtis vorbehaute, nämlech Zuniversum säuber. I sire unändleche Usdehnig vrschteckzech es wahrs Gheimnis, uf das hie no niemr isch cho, wüu sogar Tabfaubesitigr, abr o Tumschtanzreglr sech siteläng druf bezieh usech drbi ke einzige Plämu leischte. Si erloube sech tazächlech ke Fähler.

Was nid eifach präzis cha bezeichnet wärde, blibt im Dungkle vom Wäutau vrborge u blibt so unbekannt wi nume öppis, wahrschinlech für immer, muesme grad afüege.

Abr uf di zwifuhafti Anahm müesse o mir säubr zrüggcho, schüsch blibemr numeno adr Obrflächi hange u müesse idr Chuchi ga Heftpflaschter sueche, nume umt Schnittmuschtr zvrbärge.

Grad di Zaaggihüng vo Nussknacker udi bodeschtändige Wurzubehandler u Seifelougr ungrde Quacksaubr nütze di einmaligi Glägeheit us, umsech inere dütleche Säubschtbesorgig vodr labile Seelelag udr Flächebedeckig vode Kongkursvrwauterinne umztue u drna grad gaz schpaziere, u umdi eventueu ufträtende Rücksichzlosigkeite vode Uswäglosigkeite ztrenne uz vrsinnbiudliche, zvranschouleche u aune Intressierte zuegänglech zmache.

U was nid bi drü ufde Böim isch, wirt erbarmixlos zu Maggiwürze vrarbeitet u cha numeno ufz Igriiffe vode hautlose Gaschtlose u vode hautbare Ungrhoselose hoffe. Aues angere isch Hawas.

Du seisches. E bemerkenswärti u fougerichi Iträglechkeit isch das abr o nid grad; viu zlang heidi Syschtemiflüss übrdi Rotouge udi Rosstüüschr ufdi Chrangheizfäu igwürkt, so dasme da drinne ke anähmbari, pärsönlechi Meinig meh chönnti finge.

Numeno di notorische Wägfahrschperine blibe i irne knapp definierte Ischtelige, wüusi ja gängno di vagi Hoffnig hei, übr di witere Usflüss vode Iflüss e Igang zum Zuegang u zum Usgang zfinge, odr wenigschtens nützlechi Gradusflüg id Schpante vode Kante u ufde Plangke vode Flangke zübrcho.

Ja, sichr. Abr es mues drvo usggange wärde, das audi Bemüehige wahrschinlech chum zu nennenswärte Ergäbnis wärde füehre.

Meinsch?

Es git ke reelli Hoffnig uf schpanischi Nüssli meh. O Twiibeeri si vrbi.

Twiibeeri o?

Twiibeeri grad psungrs. Abr Twäuesittiche hei müesse ixeh, das iri Zit isch cho udi diverse Kässeli nümme fürdi türe Hirseschtängeli wärde ufcho.

Das gschparte Gäut darfme eifach nümm für das nutzlose Gfotz vrputze u vrggänggele, u drum überlösi di gułdige Chefige de fautsche Wäuesittiche ude fautsche Wäuebrächr u behäufesech mit wulige Gaffeewärmr, wosi zu härzige Eifamiliehüsli umgschtautet hei.

Ja, u dür das rettesi immerhin Tornig u Toptik im Grosse u Ganze, o wedi fridleche Ergäbnis nid de schpezifische Aforderige u o nid de übrgordnete Aschprüch chönne gnüege. Verschteisch?

Sische reini Klassefrag.

Nume di Nachtschattegwächs vrschtecke no usrichend Granulat u Konzentrat, so das dZuekumpft fürz Erschte xicheret isch.

We o nume vorlöiffig.

Wo simr iz vrblibe?

Hesch dr Fade vrlore?

Nei, wart: Di witrichendi Übrschaubeflügig vom Bäupmoos us ungrufe, une Ungrschaubetribig vo obenabe, wo ono fasch längt, si immrno i witr Färni, wemr wei ehrlech si, u wär gloubt, är heigi dr Kamm vom Schpitz scho erreicht, xehzech schnäu mau beloge u betroge u vo niemerem meh erwoge u erzoge u vrboge.

Das meinsch du.

Ja, das meini. Aues isch no viuz unusgwoge, u das isch vrwärflech. So cha das nie e Ifluss ufz ganze Züg näh.

Nüt isch eifacher, aus i auer Ergäbeheit e übrtribeni Vorsicht la zwaute, wüusi nüt choschtet u nüt brucht u nüt bringt.

Was nüt choschtet, isch nüt wärt.

Ja, abr so chunnt di heilsami Isicht, daso dSchpitzeklöpplerinne no lang ke anähmbari Durchfauquote chöi erreiche.

Wärsech auso nid ufd Gebiezaforderige cha einige, mues drvo usgah, das dWägfahrschperine grad reihewis düregheie ut Thermoschannene viu meh Ufwind wärde übrcho, aus übrhoupt vorxeh isch. Vrschteisch?

Wär izno Pflügu ufschpannt u si Flugbereich wot uswitte, mues ärnschthaft drmit rächne, das odi Ghauzforderige vom ganze Bodepersonau wärde schtige.

Dasch nume logisch. Scho hüt lige di Pennr udi Grännisieche imene mächtige Ufwind. Si lege iri Bei ufd Pułt u achte sech scho lang nümm uf das örtleche Züg odr uf das lokale Gschtürm u das ganze Glir u Gfotz.

Abr si blibe immr früntlech u offe, ume chane eifach nid bös si, wüu si si usi blibe drbi immr inoffensiv, interaktiv, komunau u arglos, sogar guetmüetig, wemi fragsch, o we iri schwarze Zäng scho lengschtens übere si.

U iri schwarze Locke si gäng vo komische rote u grüene Wulefäde dürzoge, wo sitlech abehange u aune zeige, dasse nüt u niemr cha lasi, o nid zTschamaika, wosi ja di vrrücktischte Frisure hei.

Ztschamaika scho gar nid.

Du seisches. Ztschamaika niemaus.

Niemaus im Läbe zTschamaika.

Es nützt auso nüt, wedi erfahrene Seemännr druf beschtöh, iri Schiff säubr zvrsängke. Es blibt de Schiffseigner numeno iri ergäbeni Hifüegig iz Unvrmidleche, u wesi drvo usgöh, das nume no simpli Schtrasseröibereie di einzigi erkennbari Zuekumpft vom lokale Hamschtrgschlächt vom Hamschtrgschäft chönne si, de lömerse i däm Gloube.

De lömerse i däm Gloube, du seisches. Dr Tümmr git nah, udr Gschidr geit hei.

Heimers ize?

Ja, mir heis, abr mir blibe dranne. Iz loufz gradeso gäbig.

Das weimer iz nid vrlauere.

Nei, das weimr nid vrlauere. Nume e massivi Vrtürig vo Yoghurt, Honig u Basmatiris chönntis no i üsere ganze, zimmli abwägige Vrweigerixhautig iz Wangke bringe, wüu we dr Zug abgfahre isch, de fahz zZangge ersch grad richtig a, wüu wedi Zugpfärd nid wei zieh, de nützt aues guete Iirede, Zuerede u Bittibättimache, aues Wouwoue u Guetrede nüt meh, das kennemr.

Ja, das kennemr guet, Toni, du seisches. Es git setig, di phoupte sogar schtur u fescht, das one Geisle i setige Fäu nümme würdi nütze.

Grad i setige Fäu nümme! Tamaassig wär eifach zgross.

Viu zgross, würdi säge!

Viu zgross, Koni, viu zgross! Du hesch rächt! Drum ligz einzig u elei im Ermässe vo jedem einzelne, obr au dene küehne Phouptige übrhoupt no wot gloube, odr nid.

Ja, une vorzogni Wahrheizprüefig ergubti ja numeno vagi Anäherixwärte, wo sichr nid ussagechräftig gnue für aufäuigi Entscheidige wäre.

Wemeris auso numeno uf fahli u kahli Vrmuetige möchte abschtütze, sägemr mau, de blibtis numeno e einzige Uswäg offe.

Nämlech?

Nämlech dr Uswäg übr di Vorzugsmeile vodr augemeine Glichgüutigkeit udr umfassende Sorglosigkeit.

I auer Belanglosigkeit, Toni, i auer Belanglosigkeit!

Das seitis nid öppe der Gloubensvorzugsbevoumächtigt säubr, das erklärtis dr Gloubensvorwaggis vodr Usdrucksvorsorg i auer Ärnschthaftigkeit.

I weis. Numene Schpatz ufem Dach wär üs no wiukommener ause Flöige im Flöigegittr, wüu mir gäbenis aui Müeh mitere klare Ussag, mitere klare Usschprach u mitere klare Usnützig vonere ehemaus ja fründschaftleche Übrikumpft.

I dämm simr u blibemr i auer Zuevrlässikeit ferm u fromm u früsch u frei u froh u fad. E schprachlechi Rückschtuefig lömeris nid la gfaue, udr heissglüffnig Chochtopf vode Meinige blibtis je lengr je meh erhaute mit sim ganze Vrhaute, Erchaute u Vrwaute bi auem Abschpaute u Enthaute.

Nume Tnotufnahm für Trägewürm ergubti none gwüsse Sinn, we o Tumschtäng vomene gwautsame u unufhautsame u unumcherbare Abgang nümme so wit ewägg lige wi oscho. Abr üsi Hautige u Meinige drzue si scho lang nümm gfragt, Toni, um ehrlech zsi, usi wärde o nümm usgnützt u si o lengschtens nümm erwünscht, umes mau so dütlech wi müglech uszdrücke, wüu niemr beschäftigezech no mit abghaufterete Räntner u uninschpirierte Nonne, mit eisitzige Pensionäre u usgmuschterete Klone adr Rhone, mit wärchlose Wärchtätige u chraftlose Diakonissinne i irer auerletschte Sinnkrise – so wi mir.

Das hesch iz abr subr usdividiert, Koni! Das muesmedr zuegeschtah! Dä ganz Ufwand würzech eifach nümme lohne, udi offesichtlechi Chraftlosigkeit vode ehemaus chraftschtrotzende Muskumanne, Aupetanne, Bratpfanne, Musumanne, Badwanne u Narkomanne wäri gwüssermasse ad infinitum vorprogramiert, wüu o dDiabetiker mäudesech langsam zu Wort.

Si louffe dür dungkli Gäng vode füechte Vrlis vode düschtere Vrlass ü düesech bide makabere Vrpflichtige ude nekröse Umschtäng bediene, sisch eifach krass.

Ke Macht vodr Wäut chönze drvo abhaute, sech mit Meis-Chöube zbediene, mit Meis-Chrapfe, Bartwale u Mondschtapfe, wo zwar gar nid fürse tängkt si u o nid fürse beschtimmt si, abr o nid fürse geignet si u weder fürse vorxeh si, no jemaus fürse wärde vrwändet wärde.

Si sözech iz liebr druf konzentriere, nid zschnäu zässe u jedi Form vo zwifuhafter Nahrig u Ernährig muetig, tapfer u entschide zrüggzwise. Schliesslech wüssesi säubr ganz genau, was guet fürse isch, u was nid. Si zeige au e längi Lischte vo Sache vor, abr ersch uf Site einedrissg wärdemr äntlech erfahre, was fürse geignet isch, u was nid.

Nume die ischrängkendi Anahm isch für seie vorusbeschtimmt, u im Himu obe überchömesi de sowiso numeno Manna u Nektar.

Isch Nektar nid zuckrhautig?

No schtömr nid idr Schlange vorde amtleche Schauter, no ergäbesech für üs chum Zämehäng, no erwartemr gfeschtigti Erfahrige u präzisi Erlüchtige im Bereich vode pärsönleche Ernüechterige, abr di wirtschaftleche Notwändigkeite hüffe sech langsam u füehre zu fasch unübersehbare Notschtäng u breitwiu-ige Zueschtäng, o idr Energievrsorgig u idr ganze finanzieue Vorsorg, wo viu vo üs scho fasch lat la vrzwifle u langsam Tmasse erfasse u erhudle bis ufd Karkasse.