Toni E-Book

Alex Gfeller

• Herausgeber: Books on Demand
• Kategorie: Gesellschafts- und Liebesromane
• Serie: Koni und Toni
• Sprache: Deutsch
• Veröffentlichungsjahr: 2023

Seitenzahl: 435

Beschreibung

Toni Dünn (1943-2023), war Zeit seines Lebens Schriftsteller und Landschaftsmaler und lebte seit jeher, zusammen mit seinem Partner Koni Dick (1943-2023), im kleinen Dorf Kehrsatz bei Wabern, Swaziland, das in Amerika oft mit Schwedenland oder Switzerland verwechselt wird. Wegen Verdachtes auf schwerwiegende Subversionstätigkeit hatte er nie die geringste Möglichkeit oder auch nur eine kleine Chance, am sehr bescheidenen kulturellen Geschehen seines Landes auf irgend eine Weise teilzunehmen und blieb deshalb stets erfolglos und unbekannt.

Leseprobe

Da die Amerikaner Switzerland gerne mal mit Schweden oder Swaziland verwechseln, habe ich der Einfachheit halber gleich von Anfang an von Schweden und Swaziland geschrieben. Schweden und Swaziland mögen mir diese Pikanterie verzeihen.

Nach jedem Absatz chunnt widr dr Abschturz u schtockt Tmaschine ernöit u schtotteret zersch mau numeno ratlos vorsech häre, bis si äntlech e Fortsetzig gfunge het, u de geiz widr fürnes Zitli los, bissi widr im tiefe Härdöpfuschtock iz Schtocke chöme. U mängisch blibesi grad ganz schtecke, u de isch widr emau fertig u Ratlosigkeit. De müessesi dr Pannehiuf alüte u chönne warte, odr abr dr angr fingt plötzlech e Usgang, e Durchgang oder e Übrgang une Uswäg. E Forzetzig giz immr, so odr so – bis iz ämu. Abr so geit ihres gmeinsame Schribe vorwärz. Es harzt drbi u drzue, wi gäng, wesi druspracht si worde. Di erschti, rächt müehsami Heufti heisi iz usfüehrlech u umfassend übrarbeitet, so dassis vordrhand u vorlöiffig so chönne la schtah, findesi uf jede Fau mau, unsichr zwar, abr was nächär no söu cho, auso idr zwöite Heufti, wes übrhoupt e zwöiti Heufti wirt gäh, was überhoupt no nid xeit isch, u wis übrhoupt söu witrga mit dere ‘Suite’, wis söu louffe u söu flutsche, ischne immrno es komplez Räzu unes Buech mit sibe Sigu, wime seit, o wesi no nie es Buech mit sibe Sigu xeh hei. Abr es isch u blibt es gmeinsams Wärch, wi aui Wärch, wosi bis iz zäme gmacht hei, usi hei aui iri Wärch scho immr zäme gmacht, wime weis. Nie het eine elei u für sich elei öppis zämeposget, wo när het söue es Büechli odr es Buech gäh; zmingscht het dr anger Tarbeit nächär immr kontroliert u korigiert odr korigiert u redigiert u konserviert u komentiert u apruviert odr desapruviert u desavuiert. Es isches Wärch vou Gheimnis u Fragezeiche u immr fragwürdig gnue, umsech Tchöpf witerhin z zerbräche, abr immr glichzitig one Topf vou römischi Fischsosse Garum, es häreglüffnix Reh, es vrzwickz Chrützworträtsu, e komplizierte Hindernislouf, e richtige Schpiessruetelouf, u glichzitig es unändlechs Sueche u Hirne u Grüble u Träje u Chere u Wände u Vrwärffe, wüusi nie wüsse, wosi eigetlech härewei u wassi dert wei, wesi dert si acho, wosi hei häre wöue u faussi dert übrhoupt jemaus hei häre wöue, wosi wei acho u vilech heil achöme, wosi wei härega, oni zwüsse, wosi wei härega, auso es Wärch vou Gheimnis u Fragezeiche u unglöste Frage. Si chöisech di fragend ufezogene Ougebroue vo irne schpärleche Läser u Läserinne scho lengschtens vorschteue, vo irne drü odr vier Lütli, wo zChäsiz u Umgäbig ihres Züg übrhoupt läse, sogar biudlech vorschteue, usi hei immr dr Idruck, aus heigesi eigetlech lengschtens aues xeit u gschribe u gmalet, wasme cha säge, cha schribe u cha male, aus hättesi eigetlech scho lengschtens usgschribe, meinesi ärnschthaft u wesi wei ehrlech si mizech säubr, usi si hei gäng Zgfüeu, es wärdi ine niemeh öppis i Sinn cho, ganz u gar nüt, nümme zgringschte, u nüt wärdine no jemaus witrhäufe, wüune nümm i Sinn chunnt, wüu so, widr Afang, gschtautezech ize o Pforzetzig, nämlech wines risix, schwarzes Loch ohni Afang, ohni Ändi u ohni jede Widrhau. Es schwarzes Loch im Wäutau: A das müessesi sech iz widr gwane, u vilech isch das ja Tessänz vo däm nöie u letschte Gmeinschafzwärch, vo däm nöiartige Doppuwärch, wose iz i Bann gschlage het u bling macht für aues angere, wos schüschno gubti u wo schüschno dasume flöicht u kröicht. Sägemrs eso: Si tappe ändlos im dichtischte Näbu dasume, wate vöuig ahnixlos im hüfthöche Pfludi vonere vrchochte, dicke Buechschtabesuppe dasume, probiere appuzue dä grusig Ärbslibrei uf Hüfthöchi, u mit eim Oug achtesi immr ufd Geier, ufd Lerche, ufd Meise u ufd Möwe, wo schtändig überne kreise u nume druf warte, dassi äntlech im Dräck vrsuffe. Wär weis? Vilech isch das sogar e Taktik, e Schtrategi unes Rezäpt vo mönschefrässende Roubvögu, u zwar es gmeinsams Rezäpt zum Schribe, das jahrzähntelang igüebte, gmeinsame Schribkonzäpt, zersch immr nume ade Sundige, u ize, wosi nümme müesse ge schaffe, grad dr ganz Tag, odr ämu dr haub, wosi am Schribtisch am Fänschtr gäge dDorfschtrass abe hocke u luege u hirne u zagge u zocke. Glichs Rezäpt, gliche Tegscht, glichi Ufgab, glichi Ziu, o wesi gar nid wüsse, was eigetlech iri Rezäpz, iri Ufgabe u iri Ziu sötte si. Wi söttesi o? Wi chönntesi o? Wi müesstesi o? Wi wettesi o? Es isches Konzept für zwe tummi Sieche, für zwe blödi Cheibe, für zwe auti Seck, wo eigetlech scho lengschtens aues hingrsech hei u wo äntlech sötte höre mit däm Blödsinn, di beide blöde Püntle, säge aui angere im Dorf unisono.

Abr eigentlech kenne di zwe glichartige Literate ires wahre Ziu scho lang: Eifach heil übr Trundine cho, meh nid. Si wei ab auem Schribe eifach übrläbe. Übr iri Rezepture wüssesi nid gnue Pscheid, das müessesi sech igeschtah, genauso weni wi übr ihri Ufgabe odr iri Isätz, übere Sinn u Geischt vodr Sach, wüu si hei vor ihrer Lehr zum Optiker u zum koufmännische Agschteute füf Jahr lang nume di örtlechi Sekundarschueu psuecht, u nidemau vo Kneipkure, Uigure, Wanduhre odr Blessure vrschtösi öppis, so weni wi vo Gamäue u Karamäue, Schtabäue u Sardäue, vo Sozietäte u Kalamitäte, vo Resorbzione u Exekuzione, u vo erotische Posizione heisi o ke Ahnig, so weni wisi vo Froue e Ahnig hei. Aber das intressierze gar nid; Froue fingesi zimmli unbedütend, usi heise vrschtändlecherwis gar nid nötig. Si vrschtöh eigetlech vo nütem öppis, müessesi sech iz grad igeschtah, ussert vo Brüue, abr Brüue intressierese o nümme. Abr wär vrschteit scho öppis? Übrhoupt öppis? U das übr lengeri Zit? Si kenne niemr, wo würklech öppis vo irgendöppisem übr lengeri Zit vrschteit, wesi iri ganze Bekanntschafte u Vrwandtschafte dürforschte. Si hei ke akademische Grad u ke akademische Titu, si hei nume enorm viu Büechr gläse, schöni Literatur haut, les belles lettres, schöni Briefe, das isch grad aues xi, dütschi, änglischi, französischi, amerikanischi u hiesigi Literatur, usi chönnte hüt nid säge, si heige drbi öppis glehrt. Schpass heisi gha, ja, das scho, Fröid heisi mänggisch o dranne gha, sichr, u mänggisch heisi sech o gergeret odr glängwilet drbi – abr schüsch isch da nüt xi. Sisch haut o nume banali Ungrhautig, di schöni Literatur, Ungrhautixliteratur. Sisches reins Ungrhautixmedium u nume gmacht für Lüt, wo chönne läse udr Zit drfür hei, das isch aues, wüu es brucht haut Zit, das Läse, viu Zit. U viu Lüt hei ke Zit fürz Läse. Abr wis o isch: Dr Koni udr Toni si usschliesslech mitr Literatur u mitr Malerei vrhüratet u wüsse nume, dassi letscht Winter imene Afau vo Brüuewahn je sächs nöji, modischi Brüuene gchouft hei, udr nätte, junge Vrchöifferin vom Kongkuränzgschäft zWabere äne heisi erklärt, das Brüuevrchouffe vierzg Jahr lang eigetlech ires einzige Hobi sig xi; si heige zwar säubr Tusigi vo Brüue vrchouft, abr chum einisch eini für sich säubr gchouft, u nume drum gniessesi ize Tmüglechkeit, sech mau säubr la zberate u säubr Brüuene zchouffe, u zwar nume für sich säubr. Si heige iz zäme mite sächs nöje Brüue insgesamt je vierzäh Brüue, das macht achtezwänzg, aues i auem, u das muesmesech mau vorschteue. Mit dene achtezwänzg Brüue chönntesi grad widr e Lade ufmache, lache si, abr so isches nid gmeint. Si chönnte auso e Monet lang jede Tag e angeri Brüue alege, wesi Luscht drzue hätte, wüusi zuefäuig ono di glichi Glesrschterchi, auso di glichi Korekturschterchi hei, u wüusi so si, dr Toni udr Koni, odr dr Koni udr Toni, auso schonechli extravagant irgendwo düre, unechli vrdorbe, wüu hemmixlos drzue, u mänggisch gäbe sisech zum Trotz e chli exklusiv, u mänggisch sogar schrangke- u äbe hemmixlos wi bim Chouf vo je sächs nöie Brüuene letscht Winter, we o nume im Gheime, so dases niemr merkt. Dvrchöiferin im Lade het glachet u glachet; so öppis hezi no nie ghört, so öppis ischere no nie passiert. Abr elei dr beläbend Gedangke, nid immr glich längwilig uszxeh, wesi jede Morge früeh früschi Ungrhose fürenäme une angeri Brüue alege, beflügleze u vrmittletne zGfüeu vo Exklusivität u Luxus, wosi eifach bruche im Läbe, phouptesi ämu zWabere äne. Schliesslech sisi ja hüt tätsächlech nüt aus zwe schwuli Schriftschteuer u Landschafzmaler, wo erschno sit bau sächzg Jahr zäme wohne, wo zäme Büechr schribe u zäme Biudr male, u zwar scho sizi vierzähni si, u das bis ize, wosi scho sächsesibezgi si.

Zwüsche vierzähni u sächsesibezgi lige immrhin zwöiesächzg Jahr, me gloubz fasch nid; abr wär möcht das wonnige Läbesgfüeu vouer Schtöuzi nid mitne teile? Si hei öppis gschaffe, u sisi immr no dranne. U zudäm vrfüege si übr je vierzäh glichwärtigi, abr sehr ungrschidlechi Brüuene, o wesi immr nume eini chönne trage. Einisch heisi irgendwo gläse, dasdi wit vrbreitete Sehhiufe eigetlech e Art Gehhiufene für Churzsichtigi sige, we nid gar Hiufsgrät für eidütig Gsichzinvalidi, öppis wi Krücke odr Beischine, wi Rouschtüeu odr Luftlandechüssi, wi künschtlechi Gebiss u schtählerni Implantat, u das hetne denn moralisch scho zimmli zuexetzt. Si hei e Brüue immr irgendwie ause küschtlerischi Vrschönerig vomene Xicht vrschtange, u nid nume ause Sehhiuf, ause Sehkrücke, usi hei immr Wärt druf gleit, de Chunde di passendi Brüue zvrchoufe, wose bessr zur Gäutig bringt, aus wesi ke Brüue würde trage u schtändig dürne dicke Näbu würde tappe. I däm Artiku isch gschtange, das schlächti Ouge zha e körperlechi Behinderig sig wi jedi angeri körperlechi Behinderig, u Pforschtelig, invalid zsi, nume wüume e Brüue treit, heze eidütig troffe unes Momäntli betroffe gmacht, wüusi heisech scho nume bidr Lektüre aus zwe armi Chrüpple xeh, wosech müehsam dürz Läbe müesse schleppe, aus hättesi glehmti Arme odr glehmti Bei, vrfougt vonere Möite vo bissige Hüng, bedeckt vo chläbrige Gschwür am ganze Körper u mit tränende, blinde Ouge u toube Ohre. Das heisi nid eifach wöue ufsech la sitze, wüu si betrachte, wi xeit, Brüue ause Körprschmuck odr ause Xichtzschmuck, weme so wot, wi zum Bischpiu e Ohrläpplischmuck odr es türs Chötteli ume Haus mitemene gułdige Plämpeli dranne, wones haubs Vrmöge het gchoschtet, odr e gułdige Nasering, odr auefaus künschtlechi Wimpere, wosisech mänggisch zum Schpass deheime säubr düe achläbe, odr es Schtützgorsee für Übrgwichtigi odr es Zungepiercing –u setix Züg.

Wesi aube iri insgesamt 28 Brüuene fürehole, ufem Schtubetisch näbenenang ufschteue, lang betrachte u offe beurteile, sisi mänggisch sogar schtouz uf ire chline Privatpsitz u chönnte sech gar nid entscheide, weles iz iri Lieblingsbrüue wär, wesi de übrhoupt eini hätte u wesi zwunge wäre, sech fürne Lieblingsbrüue zentscheide, usi chönnte o nid mit Sicherheit säge, weli si am wenigschte gärn heige, wesisech müesste entscheide, wüusi hei eidütig aui iri Brüuene gärn, öppe so, wi angeri Lüt iri Ching gärn hei, odr iri Outo – nämesi mau a. Iri Brüue si auso iri Ching; si passe aui hervorragend i iri Xichter, finde si, iz dicke breite vom Koni, u iz dünne schmale von Toni, wüu sisi aui mitr gliche Professionalität u mitr gliche Sorgfaut usgwäut, bearbeitet u apasst worde. Vo kenere Brüue möchtesi sech jemaus trenne, schteue si überischtimmend u befridiget fescht; würdesi eini us irgend emene Grund müesse uswächsle, würdesi grad die am meischte möge u drum uf ke Fau wöue misse. Abr si chöisech nid ändlos um iri Brüuene kümmere; es git ono angeri Ufgabe, vo dene si abr nid chönne phoupte, dassine würklech wichtig wäre, ehrlech xeit. Sisi gärn a irne gmeinsame Tegschte u Gedicht, ganz klar, si schaffe gärn adr ‘Suite’, Erewort, u si schteue schtouz fescht, dasne iri Sache ono nach viune Jahr gfaue. Das isch doch es guez Zeiche, u das isch sehr erschtunlech, findesi, wüu vo irne Socke, vo irne Libli, vo irne Naselümpe odr vo irne Ungrhose chönntesi das nid phoupte; iri Ungrwösch dueze meischtens scho nachem erschte Trage odr schpeteschtens nach dr erschte Wösch längwile, psungrs wes umz Glette geit, wüu glette düesi us unerfindleche Gründ beid nid gärn. Natürlich mues das o si, das isch klar; abr nume denn, wesi di nöiji Wösch uspacke, wesi auso no ganz nöi isch, wesise grad usdr Vrpackig gno hei, u wesi zerschte Mau agleit wirt,. De findesise intressant, es intressanz Gfüeu, abr immr nume einisch, nämlech zerschte Mau, wi xeit. Nume denn ischsi fürse atraktiv, de heisi nämlech Tatraktivität vom Nöie, vom Früsche u vom Erschtmalige im Gschpüri.

Was machz de auso us, dasne e Tegscht viu bessr gfaut ause Ungrhose, six iz e eigete odr e frömde Tegscht u six e eigeti odr e frömdi Ungrhose? Me mueses so xeh: Iri Libli, iri Pulövr odr iri Hose, abr o iri Schueh, iri Hemmli, iri Jaggene odr iri Chappe gfauene nie psungers lang, o wesi sech irer Asicht nah bidr Uswau usrichend Ufmerksamkeit gönne u gnue Müeh gäbe bi irne Entscheidige. Abr im Grund gno tragesi iri Chleidr nume, wüune nüt angers ifaut u wüusi ke angeri Weli hei. U wemese würdi bitte, sech gfäligscht angeri Chleidr zbeschaffe, chämesi grad ine furchtbare Beschaffixschtress ine, wüu wes öppis git, wosi nid gärn mache, de isches i Chleider- odr Schuehgschäft ga, wüu das für seie praktisch unübrwindlechi Hindernis si. Drum tragesi iri Chleidr u Schueh solang sise guet finge, usi warte meischtens bis zum letschte Momänt, umsech nöiji Cheidr odr nöiji Schueh zchouffe. I setigi Gschäft gösi auso höchscht säute, u wenn, de nume zäme, wüusi gäng beid zgliche chouffe. So heisi ke Schtress bidr Uswau. Abr si haute sech nie lang imene Chleiderlade odr imene Schuehlade uf, usi sueche sech, wi xeit, immr öppe zgliche us: längwiligi Ungrwösch, längwiligi Socke, dicki im Wintr, dünni im Summr, farbigi Hose, farbigi Libli, farbigi Pulövr mit uffäuige Muschtr wi blökende Schaf, rammelnde Hirsche, schtärbende Schwän, rennende Renntier, schtotternde Fasane u bissige Krokodiu, aues geng i angere, krasse Farbe, wüu uf Pfarbkomposizion ud Farbabschtimmig chunnzne bide Chleidr nid drufa, u meischtens passesi übrhoupt nid zäme, abr das ischne glich, u das isch glichzittig ires Marggezeiche. Drzue chöme liechti Schueh im Summr u feschti Schueh im Wintr, Sandale für dinne im Summr, u Pantoffle für dinne im Wintr, ezetera, di gliche Techlichappe für beid, meischtens mitemene blöde Logo, daschne glich, u das wärs de aube scho widr fürnes Zitli xi. Jagge heisi o nid immr di gliche anne, meischtens liechti, churzi Jaggene mit Rissvrschluss i gedeckte Farbe. Mäntu u Haustüechr odr Häntsche tragesi nie, nidemau Rägemäntu. Nume iri Nastüechr müesse immr blüetewiss si, wüusis nid gärn hei, i farbigi, gmuschtereti odr gar i schwarzi Nastüechr zschnütze. Si bruche immr widr früschi, wissi Nastüechr us feschtem Boueleschtoff, nie Papirnastüechr, wosi gar nid gärn hei, sondern äbe widrvrwändbari, auso ganz normali Nastüechr, wosi sogar lö la cho, sidr dasme i de Läde keni meh fingt. Si düese immr widr wäsche u glette, solangsi häbe, usi häbe erschtunlech lang. Abr das intressiert nume seie; niemr angers intressierzech für Nastüechr, das isch klar, u wesisech mau amene Find müesse ergäh, de heisi grad di wisse Fähnli parat fürz Wingke. Si wäre wahrschinlech di Erschte, wosech würde ergäh, u ersch denn fände di wisse Nastüechr iri wahri Beschtimmig, sozsäge aus Läbesrettr, im beschte Fau odr im schlimmschte Fau – je nachdäm. Drzue chunnt no Talegig fürs Töff Fahre; auti, bruni Läderwar usem letschte Jahrhundert.

Abr das heisi scho einisch irgendwo erlüteret, chunntne i Sinn, abr si wüsse nümm, wo das isch xi. Si hei scho so viu Ungrschidlechs u Unghürlechs zäme gschribe u zäme gschnuret i irem ruehige u unuffäuige Läbe, das dGfahr vo pinleche Widrholige im Auter rapid zuenimmt. Drum lösi di wisse Naselümpe für einisch us; immrhin chöisi sech scho ize erliechteret igeschtah, dassi mite Muschtr ude Schtrukure vodr erschte Heufti vo dere ‘Suite’ scho chli zfride si, wo eigetlech nume e Fortsetzig vo irgendöppis angerem söt si u am Schluss ono irgendöppis Schlaus söt ergäh u irgendöppis Gschids söt darschteue u drzue ono e gueti Schnure söt mache, wime seit, ohni dassi chönnte säge, vo was, übr was, ungr was u hingr was, usi wüsse gar nümm, werum das so isch u dismau offebar so mues si: Si hei churz entschlosse aui früechere Konzäpt übere Huffe gheit. Abr das isch eidütig e Erfoug, dr erscht Erfoug vonere länge Erfouxgschicht, wosi sech da unwüssentlech hei iprocket, abr so empfindesi iri gägewärtigi Lag, u zwar nid oni Schtouz, chöisi säubschtsichr vrmerke, usi chöi nume hoffe, dassi rächt wärde phaute. U trotzdäm weisi sech nid i blöde Schprichwörter u flache Plattitüde ergah, wüu si hasse das, wüu das nie schtimmt u nie passt, so wi o di Lüt, wo gäng di bekackte Schprichwörter u Plattitüde im Mu füehre, aus hätte sise säubr erfunge, nie schtimmig si, wo nume usglutschti u abglutschti Wortfouge chöi bruche, schtarch hingkendi Vrgliche u fautschi Parable odr bekloppti Prognose odr komplet sinnlosi, bezuxlosi, zämehangslosi u bedütixlosi Zitat us auer Wäut, wüu uf jede Fau sidi Lüt nume weni odr übrhoupt nid outhentisch u drum grad zum sofortige Vrgässe beschtimmt. Autbekannti, lokali Grundwahrheite, sogenannti regionali Grundweisheite, auso unvrrückbari nazionali Grunzätzlechkeite oder universeu lächerlechi Lehrschprüch vo auer Gattig, wise schüsch vorwiegend dPippilottikr auer Gattig immr grad parat hei, di Schnurisieche, genauso wi blödsinnigi Sinnschprüch u debili Chärnschprüch, wi abvrheiti Dängkschprüch u blödsinnigi Betrachtige übr nüt, gäge nüt, widr nüt u für nüt, grundfautsch agwändeti Gedangkeschplittr, vrlogeni Wauschprüch u gflügleti Wort im Multipack, so wisi i däm Tegscht hoffentlech nid ghüft vorchöme, chame irer Meinig nah grad vrgässe, wüu das isch nume dr Schprachschrott vode Jahrhundert, u schüsch nüt, nidemau dr Dängkschrott vode Jahrhundert, sondern einfach nume dr abgschtandnig Dräck vode Jahrhundert. Bessr auso, me erfingt säubr Züg, ganz glich was, was o immr und so witr, lutr Sache haut, lutr Züg, nüt Bsundrix, abr o nüt Ussrgwöhnlechs odr Schpezieus, u so chunz langsam so wit, das Twöschtrumele vrgäblech trumele ut Sauzschtröier numeno schtröie, oni zsauze.

Ganzi Wortfäudr chönne so abgraset wärde, oni pärsönlech Schade znäh, ume isch guet berate, sech es par Schaf zuezlege, nume umdr Rase churz zphaute u um Tnachbare zergere. Das Schaf blöke, isch abr nume es Grücht, wüusi bäje, u nid blöke. Meischtens haute sisech abr schtiu u warte, wüu Schaf immr uf öppis warte; me weis zwar nie, uf was genau, abr si schtö da u xeh us aus wartesi ufe Böss odr ufene Erlüchtig. Usi schtingke nidemau psungrs heftig; si hei abr di agnähmi Eigeschaft, nid ufzfaue u niemr zbeleidige, niemr azmögge, niemr azgriffe, niemr zbisse u niemr zvrfouge. Nume vorem Bock muesme sech i Acht näh: Wemenim dr Rügge zueträit, geitr grad los, wüu de chunntr im Galopp u wot grad sofort aues umschtosse u umwärfe u aberinge mit sim herte Gring. Drum muesmene immr im Oug phaute u diräkt aluege, schüsch hetmene plötzlech im Chrütz. Aues, was ihm nid gfaut u wasim im Wäg schteit, muesr zBode mache, u das si immr achtlosi Pärsone, wo nid wüsse, dasr immr vo hingr chunnt. Abr dr Afängr merkt sofort, dasr sech ide Schaf ordentlech tüscht het, wüu Schaf si bi witem nid so früntlech u zuetroulech wi Geisse, u me übrleizech de aube grad, obme Tschaf nid bessr dür Geisse söt ersetze, dür müglechscht schöni, dür müglechscht säuteni u müglechscht attraktivi Geisse, klar, vilech sogar dür argentinischi Zwärggeisse. Abr übr Geisse giz viu wenigr zsäge aus übr Schaf, das isch klar.

Me redt zwar viu übr schöni u wiuigi Schäferinne, abr nie öppis übr abwisendi Geisserinne, wo vilech nidemau Geisse hei. Das isch u blibt zdungkleschte Gheimnis vodr ganze Landwirtschaft: Wo sidi schöne Geisserinne? Uz Memento mori vodr ganze Vihzucht: Wo blibt Tromantik? Sogar di unumgänglechschte Umgängleche wüsse, dasdi Generaubevoumächtigte ufeme Schlachtfäud keni Gfangene meh mache, wüusi eifach nid drzit hei, umschtändlechi u vorgschribeni Befragige vorznäh, wüu korekti Befragige eigetlech nume Zitvrschwändig si. Wär auso uf grossflächigr Eigebewirtschaftig beharrt, mues schpetr drmit rächne, dasim di Zilezahle mächtig ufe Keks wärde ga.

Di fotogene Keksfabrikante us Trueb, auso di truebr Buebe, zum Bischpiu, hei ja denn dütlech druf higwise, das di erschtmaligi Trochelegig vode schottische, de schpanische, de änglische ude portugisische Schiffswracks ke extranachhautige Gwünn würdi bringe, u Tschlickforschr us Brasilie wüsse o nümm witr, ehrlech xeit. E effektive Usschluss vodr Redukzion odr e definitive Ufbruch vode Bratwürscht im Kosmos zude färne Galaxie würdi üs i kenr Wis witrbringe odr witrhäuffe u würdis o nid witrfüehre, o wedi gägeteiligi Hautig genauso berächtiget wär wi das ganze häregschissnige Grilliere im Garte nachere flotte Übrlandfahrt mitm bequeme Reisebus zude Konkubinat, zude Kingkongkubinazpartner u zude Hongkongkombinat säubr. Nume unfreiwiuigi Rückzüg u lang vorhär abgschprocheni Umschtelige vrmöchte üs no zur Psinnig zbringe odr üs drzue zwinge, u trotzdäm vrschtömr angäblech immrno nid, wis het chönne zu dene Vrnumpftabbrüch, zu dene Gedangkeussetzer u zu dene Vrschtandesabschtürz innrhaub vonere unbeschtrittene Generosität, vonere Generauübrsicht u vonere kosmologische Biudhaftigkeit cho, wüues sech drbi ja glich nume umene genereui Ussetzig vode banauschte Bananehirnifungkzione het ghandlet, wo zu dene höchscht unvrschtändleche Reakzione gfüehrt hei. Me cha bim beschte Wiue nid vrschtah, werum sech di Hirniussetzr bi beschtandene, erwachsene Männr u Froue vo setigne Format so ungloublech schnäu entwicklet hei, gwüssermasse vo eim Tag zum angere, auso übr Nacht, u das ohni jedi Vorwarnig, ohni jedes Vorzeiche u ohni aui Absicht odr Ussicht ine Isicht, ohni Vorwarnzitte u ohni Rückfrageprozedere u Absicherixabschtueffixpauschale, wüu di rein numismatisch inschpirierti Bedrohixlag hezech uf Grund vonere zimmli chrangkhafte Schpontaneität ungr richlech vrschtörende Vorussetzige so ungloublech schnäu chönne entwickle, dasmr ize wüsse, werumsi niemr het chönne vorusxeh. Abr o di müssigi Übrlegig bringtis nid witr, um ehrlech zsi; das schteit scho mau fescht. Werum sözi o?

Es isch ändgüutig vrbi; Sockehautr schtönis o nümm zur Vrfüegig, o keni Glettise u Glettischtändr, u nidemau e geigneti Ufhängkixvorrichtig fingemr no, so dasmr gnötiget si, di früsch gwäschne Chleidixschtück überau im Appartemänt eifach uszlege u härezlege u drübrzlege, idr Hoffnig, si würde o so schnäu gnue chönne tröchne, wesi müesse. Si sehne sech unusgschproche idi guete, aute Zite vode Dampfwöschmaschine die Dampfwöschchuchine zrügg, wosi no übr geigneti Ufhängkixvorrichtige für audi füechti Wösch hei gha, u niemr chane säge, wenn die jemaus widr zrüggchöme, die aute Wöschhängkine, die aute Wöschgschteu, die Wöschseili, die Wöschschtange udi höuzige Wöschchlämmerli. Si wüsse nume, daso Ussrirdischi iri Ungrwösch müesse wäsche, o we das nume weni tröschtet, o wedi Ussrirdische keni Schweissusbrüch hei u trotzdäm schweissabschtossendi Ungrhose trage, wi aui Aschtronoute u Kosmonoute, nämesi a.

“Mir chönne ja nid eifach drvo usgah, dassi immr di glichi Ungrwösch trage, das wär zimmli unhygienisch, wüu audi Heude vom Wäutrum müesse ja es Vorbiud für üs aui si, o pungkto innerer u üsserer Subrkeit.” “Abr tragesi übrhoupt Ungrwösch?” “Das isch iz e gueti Frag. Weisch du das, Toni?” “Was weisi?” “Obsi im Wäutrum o Ungrwösch trage.” “Du meinsch ungerem Wäutrumazug?” “Ja, drungr, nid drübr. Was tragesi drungr?” “Ungerem wisse Rumazug?” “Ja, was tragesi drungr?” “Ungr auem, wosi drübr trage?” “Ja, ungr auem.” “Drungr tragesi sichr öppis.” “Ja, abr was?” “Vilech e Trenr?” Di Frag muesse eifach beschäftige, wüu odi knapp gschnittene Wäutrumazüg für di chligwachsene Ganzkörprrobotr usde färne Galaxie sichr nid di einzige Chleidixschtück si, wosi anne hei, abr vilech untrschtige iri Vorschtelige dKomplexität vode Kausalitäte, weme so darf säge. E Gwüssheit ischno lang nid ggäh, ud Experte zangge no hüt übr di vrzwickti Frag. Sisch ämu wahr; me chönnzech grad a Gring zwicke drwäge! Tungrwösch wäri abr kes erfougrichs Thema, wenis nid di merkwürdige Umschtäng drzue gfüehrt hätte, drvo uszga, dassdi extraterrestrischi Ungrwösch es Thema chönnti si odr chönnti wärde, wüu me cha o drvo usga, dasdi wäsentleche Ungrschide zwüsche de intrgalaktische Wäute eigetlech nume idr Art vom Trage vo ungrschidlechr Ungrwösch beschtöh. Abr weli? Was fürigi? Nöiji wüsseschaftlechi Ungrsuechige vode Universitäte vo Nöienegg u Cherzers hei zu dere Frag nume zu weni übrzügende Resułtat gfüehrt, muesme zuegäh, wüu o grossi Teile vom Forschixtiim nume us ethische Gründ Ungrwösch trage, abr nid schlüssig chönne säge, obsi würde, wesi chönnte, o wesi müesste odr wesi Tweli hätte. Aues angere, würklech jedi angeri Lösig vodr wüsseschaftleche Vorangehenswis, jede witrgehende Vorschlag u jedi Rundernöierig vo aune Frageschtelige wirt eifach kategorisch abglehnt. Es si us däm Widrschpruch use zwe ungrschidlechi Frakzione entschtange, e grossi Ungrwöschfrakzion une chlini Antiungrwöschfrakzion wosech übr Dekade u übr dDeckplangke vode Rumschiff ewägg jahrzähntelang heftig bekämpfe. Es söu emVernäme nah sogar scho zu Todesopfer cho si, abr natürli weisme uf Grund vodr Gheimhautixpflicht nüt Gnaus drübr. Sischja aues wahnsinnig gheim i dere Brangsche, u Tgheimhautixpflicht schteit wit übr de Vattrlanzpflichte ude Subrkeizfanatikrpflichte ude Heimaztröijipflichte ude waudschratleche Vrmehrixpflichte. Nume Tchronischte vode Chronologie ut Chronologischte vode Chromuspüff chönnte drübr no Uskumft gäh, abr iri absoluti Schwigepflicht bindeze für immr a iri absoluti Schwigepflicht i aune Bereiche vodr Rumfahrt. Si füehlesech so wenigr punde u wenigr berueffe, di drängende u dringlichschte Frage müesse zbeantworte, u wär sech wenigr punde odr übrhoupt nid berueffe füut, ischja bereiz intensiv mitem Ganze vrbunde, obr wot, odr nid, u wär intensiv mitem ganz Grosse u mitem grosse Ganze vrbunde isch, louft idr Regu vo lutr Vrbindlechkeite i auer Unvrbindlichkeit numenoso übere. Nid nume si iri vrautete Kassettegrät vou Schteckr, od Lappe säubr müesse guet luege, grad aus Lappe, dasne zJagdwiud nid dürt Lappe geit, wi o dr Lapp an sich ganz genereu gärn mau seit. Tlappe trage ufde Chappe sogenannti Lappetregr, u o Tlappeschpautr mache ire Dienscht gärn u mit Fröid, ut Lippeschpautr xehja, im Vrglich zude Lippefautr ude Lippeblüetler, beziehixwis zude Lappeschpautr, de Lappefautr ude Lappeblüetler ke Alass, iri Meinig zändere. Werum söttesi o? Das isch vrschtändlech, wüu dr Lapp neigt endr zu feschtgfüegte Vorschtelige usm chaute u schneeriche Lappebereich höch obe im Norde, wüu är nüt angers kennt, wimeris guet chönne vorschteue. Är isch liebr dert obe aus i tropische Versione vodr Wäut, wüu vo tropische Lappe hetme no nie öppis ghört. Drum fautesis ja so liecht, Tlappe i Bousch u Boge zvrurteile, zvrdamme uz vrflueche, unes isch sichr, dasmr hie bi üs kenr Lappe wette ha. Dr Lapp an sich het, ganz im Gägesatz zude üebleche Lippeblüetler u Lappeblüetler, keni unpruchte Naselümpe zur Vrfüegig, umsech dr Söifr vode Lippe zwüsche, wenr sexueu erregt isch; Lappe u Lippe passe sowiso nid zäme, seit dr Kennr vodr Materie, dr Langlöifr u Velorennfahrer us Oschtermundige, wener sech ergeuschteret u ergeret u ‘vrlappt’, wime zLappland seit. Uf däm Komet kennemr numeno ‘Kennr’ vom ganze Ärdelouf u Ärdegang, unes isch, ehrlech xeit, e reini Woutat, sech numeno ungr ‘Kennr’ zbewege. Wägg si audi Schnuderine u Schlufine, audi Schlawinr u audi autixässene Gröwettefrässr, audi Kapadoke u audi Marsianr u Merowingr, u wägg si au di Beschwärde, au di Beschwärdinne u audi Beschwärlechkeite, wägg si di Beschimpfige u Beleidigunge, u müssig si aui lappische Zuekumpfzfloskle u futuristische Schpekulazione ide houzige Vrsammlixlokau, wüu es git hie numeno das Hie u Itze, auso dr Hirz udr Hitzig, auso dr Brunz udr Hinz, dr Kuenz udr Furz vo Toffe udr Tubu vo Nidrmuelere, nume das aues si Name het. U das tribt dDiskussione natürli grad ändgüutig ufd Schpitze; das isch zerwarte xi. Das nämlech dTubakmachr adr Zigarefront iz nümme zu biuige Tricks chönne griffe, wi zum Bischpiu zur Uswächlixmethode odr zur Ustuschmethode, füehrt bi viune Beobachtr vom ganze Gscheh zure Gnuegtuig, wo schono vrschtändlech isch. E Protagonischt cha nümme kneiffe, une Posunischt cha o nümme eifach nume so dasumeposune, dr Pedalischt chas nümm la schliffe udr Pubertischt cha o nümme uf sini woubekannte Wintrpnö zrügg griffe, woscho lengschtens abgfahre si. Aui Bemüehige wärde übrflüssig u wärtlos, usi vrgheie vor üsne Ouge sofort zu Schtoub, u o Tinnereie vrhaute sech ganz angers aus schüsch: Si zerpflücke audi Elemänt, wo bis ize aus unzerpflückbar hei ggułte, wi zum Bischpiu zSchtronzium, zElüsium uz Kolophonium. Es fragzech nume, wi lang di orcheschtrale Wärch no chönne übrläbe, we Tschtrichr de Bläsr schtändig wei Vorschrifte mache u dTaschtr de Faschtr immr widr drirede, schtatt eifach nume zzupfe. Das cha nid guet ga, das mues eifach schief usecho, wüu das het mitemene klassische Musigschaffe nümme ztüe. Es isch nume schad, das dZupfr de Pfupfr nümme Thang wei reiche, wüu grad dRupfr hätte witus bessers vrdienet aus das oportune Gnörgl vode Orgelemachr u das glängwilete Ändlosgurgle vode Organischte usdr freie Organischtebrangsche. Si gäbesech mitm Rupfe numeno weni Müeh, unes git drwäge o nid wenigr Hühner, Gäns u Änte an Bord vodr Concordia. Ganzi Gfüguherde wärde grupft u zupft, ud Zueschouer chönne gar nümme unbeschwärt häreluege. “Müesse de di Doune gäng so brutau vo irne Psitzr u Psitzerinne trennt wärde?” fragtme sech mit Entsetze. Di Frag isch berächtiget, wüuja di Douneproduzänte gäng düe vrsichere, dasd Qualität vode Schtrusseneier vo tote Schtrusse nid drunger düegi lide. Di tote Schtrusse lege sogar endr gröseri Eier aus di läbige, das ische Fakt, wo no nid i aune Teile düretängkt isch. Abr si facke eidütig wenigr, di Schtrusse, wesi euter wärde, u wesi wenigr düe facke, heisi o wenigr Fröid am Ganze, u wesi wenigr Fröid hei am Grosse u Ganze u am ganz Grosse, de lidet nid nume dr Gschmack vode Eier drunger, nei, u me mues de Gägner vodr Tierquälerei rächt gä, zmingscht idr Frag vodr Flumprodukzion uf Änte-, Gänse- u Schtrussefarmbasis, wüu dr Flum elei no ke Summr macht, o wes nid nume im Summr heiss isch, wüu dr Flum, auso di türe Doune loufend übere Tume peilt wärde müesse, wüu e reini Dounepeilig louft nume übere Tume u peilet nume vorde Iteilete, vorde Zueteilete ude Abkomandierte vode hiesige Tumemeischtrschafzisatzchreft. Es Tumebatalion, sägemr mau, beschteit guet u gärn us füfhundertfüfzg Tumeisatzchräft, u we dert jede zwe Tüme het, de vrdopplezech das grad, ude chömemr lockr uf drühundertusig Vrhautixtüme, aues i auem u im Xamte xeh. U ganz psungrs di aute, erfahrene Outoschtöpler si drfür uf Grund vo irne zaulose Tumeisätz adr Tumefront beschtens geignet. Das muesmene zuegeschtah, o langjährigi Tümeler, auso Daumenlutscher, eigne sech sehr guet drfür, abr uf ke Fau e Kunschtfurzr odr e Kunschtpfiffr, wüu di heis bekanntrwis meh mite Melodie aus mite Signauhörner, u das wär amene erfougriche Glinge gwüss nid zueträglech. Ddame ungr öich vrschtöh dä wichtig Vorbehaut im Zämehang mitem Tümele, wüusi sech gwanet si, eifach wäggzluege, wäggzlose u wäggzschmöcke, wes zschträng wirt, schüsch würdi di zwüschemönschlechi Situazion eifach unmönschlech wärde. Niemr würdi gärn ufdr Reinheit vodr Materie behare odr abr uf Treinheit vodr Materie vrzichte, wes nid di vile Vorbehaute gubti, di vile Iwänd, di vile Vorwänd udi vile Usflücht, wone kułtureu piudeti Pärson eifach nume entsetzt würdi la zrüggschrecke.

Abr am Schass, auso am Chasseral, üsem Fudji, geiz nid guet. Är zeigt sis dräckigschte Xicht, sis grusigschte Brungrau, uz Zebra xeht o chrängklech us, aus hättes e Vitaminmangu, wüu ufem Futschi, ufem Sitz vode schwedische Göttr, läbt es Zebra, das wüsse viu gar nid. Vo Witm u o vo blossm Oug isch ja längscht erkennbar, dases schwächelet u lahmt u lähmend schwächelet. Tumwäutvrbänd udr japanisch Tierschutz si alarmiert. Es het zersch no ganz xung usxeh, öppe bis Miti Februar, auso fasch dr ganz Wintr düre, weme mau vode churze Totauschneebedeckixfase abxeht; äs hezech zwar abwächselnd intensiv u impulsiv zeigt, isch abr lang mit sire chräftige Fäuzeichnig, a dere üs aune so viu gläge isch, nämlech anere tüechtige Schtrichig unere satte Schtreifig, wo guet erkennbar u o us wittr Dischtanz dütlech zxeh isch, ganz klar zxeh xi, sogar vo Bärn här, e guete Monet lang da gschtange; abr langsam sidi dütleche wisse Schtreife markant vrblasst u erschreckend schnäu zrügg gange, si jede Tag immr dünnr u miggeriger worde, bissi ufem hütige, erbärmleche Zueschtand vöuig vrkümmeret si acho u numeno us einzelne dünnleche, auso rachitische Schtreifeli u Schtrichli u Püngktli u Fläckli beschtange hei –e Ablick zum Gränne. Das isch kes guez Zeiche xi, muesme drzue grad säge, wüu das isches eidütix Zeiche vo Schwechi xi. “Ds Zebra duet schwächele”, seitme drzue im Vouksmund, u äs weis aube säubr grad inschtingktiv, das sini Schtunde u Tage zeut si. Es het eifach nümme zsäge dert obe ufde isige Höchine vom Futschi mite chaute Winde, six vom Oschte här, six vom Weschte här; es chasech nümm i sire xunge, urschprüngleche, schtouze Pracht zeige, wüu es het de aube wahrschinlech bereiz ufghört, es richtix Zebra zsi, muesmesech deprimiert säge. Es richtix Zebraschtärbe! Me vrmuetet, dases eigetlech lengschtens idi Ewige Jagdgründ isch iggange, öppe Mitti Februar, auso scho sehr früeh im Jahr, u ersch im nächschte Jahr wirzech äntlech widr es nöis Zebra zeige – vilech. Eventueu. Hoffemr. Vilech abr o nid. Me weis nüt Gnaus. Me kennzech gar nümme richtig us mite Jahreszitte, u me chasech nume wünsche, dases sech nächschz Jahr widr i autr Pracht u Schönheit wirt zeige, weimr abr glich grad drzue füege, no schnäu, bevores zschpät isch, wüumr dr Tüfu nid wei a Twang male. Schüchterni, abr landlöiffigi Louchschtängle düe breiti u dicki Tuechfüehlige de durchsichtige Tilischtreckr vorzieh, u das cha nid bedütte, dasdi phäbige Chrotte udi unkrönte Höiptr vodr Blockflötegenerazion lang i irer säubr gwäute Ifaut wärde ushare, wüu dr Grad vodr Süessi i aune Einzuheite vrschideni Uswicklige u Iwürkige cha ha.

No ischdr Fau vodr Mur ke Tatsach, abr es cha nümme lang dure, wüu eifach di Boreliose nach Ustuschwärte zwüsche de einzelne Zahnlücke nach de Subschtat ude Vrmögenswärte gglüssle u schpaniifle. Abr gli wirt zMass vou si udr Ufbou vode Ablängkige widr erreicht wärde, so dasme drin ke unvrsuechti Vrlocki odr angäblechi Nachteile meh wirt xeh. Klassisch wär e Übrnahm vode einzelne Betribsaleitige dürt Fachchreft vode agmahnte Bleifassige, wüu dr eifachscht Wäg isch gäng eifachr aus tängkt. Me richtet sech uf, luegzech a u zuckt mite Achsle, wüume nie hät tängkt, das aues so ribixlos chönnti vrlouffe u würdi vrlouffe wi iz, wo Pflüssigkeit ire Höchschtschtand erreicht het. Abr nidemau di küenschte Erwartige chönne das Usmass vode Psorgige abdecke, o wedr durchtribnigscht Flachma immr widr druf hiwist, wi sehr ihm amene guete Glinge vode Schlinge ade Ringe gläge sig. Di früelixhafte Schtürm belaschte zWättrgscheh zwüsche zwene Beruehigungstablette viu zschtarch, wüu nume di ungrvrsogte Kanischtrabfüuschtazione udi subr igsargete Chegelewäudr im Bergell wärde gli nümme outomatisch vo Freiwiuige bedient wärde. Es git ke Alass meh, däm Unrächt bizpflichte, wüu rächtzitig usxondereti Absonderige u früehzitig abgwandereti Ussonderige, no lang ke gmeinsame Nennr müesse ergäh, no chönne ergäh, no wärde ergäh, so söue ergäh, wit Behörde gäng vrschproche het. Drum ischja mängge Mittuschtümr sichtlech entüscht, abr me muesim entgägehaute, u zwar ärnschthaft, das nume usgwäuti Fruchtblasene e Schangse uf Beschtürig i auer Betröijig u fouglech one Betröijig i vouschtem Ivrschtändnis wärde übrcho, wüu scho nume di chlinschte Missschtänd wärde drbi grosszügig vrgässe, wüu odi vrschidene Farbe nid zude gwünschte Uslage passe u zude vorgschgribene Ussage füehre. So öppis cha insofärn unagnähm si, aus gröseri Projekt uf See nume ufd Zwangsvorschtelige vode vile röiberische Killrwale zrüggzfüehre wäre u numeno uf Zuerüef würde reagiere odr uf zirkusriffi Ilage vo Seeschlangebeschwörer uf Provisionsbasis, wose begleite u wo nume uf riche Fang ide Schleppnetz warte, wüu nume di umsichtigschte Unvrträglechkeizübrprüeffige no uf Tabschäng vode Resärve achte u reagiere. Vrschtö das di Konschtruktöre vode Chauchkomponänte vo Enfield? Es isch aues nume e Frag vode Abschtäng, we vili vode Protagonische dr Meinig si, das nume unvrschtändlech höchi Gäudmängine none Roue schpile, o we kene vo dene uf di kongkrete Zahlewärte reagiert het odr wot feschtgleit wärde. Vouschtändigi Umsicht isch sowiso fäu am Platz, wüus eifach immr no u immr widr e gwüsse Schpiurum brucht, um di griechische Landschiudchrotte, abr odi mazedonische Hanfschiudchrotte udi aubanische Landmassewürgrschlange i Griff zübrcho. Sogar di afrikanische Affebrotboumaffemasse muesme zersch i ruehigeri Gwässr locke, auerdings näme vili user im Vorfäud vode Itragige sorgfäutig aui Etiggette ap, wose chönnte vrrate, nume um nid erkannt zwärde odr vomene Xichzerkennixprogramm erfasst zwärde, wüu e Erkennig isch nid im Inträsse vode Zalixformalitäte vode Zauschteue, wo uf aui Änderige mitemene Fungkzionsloch odr eifach mitere Funkzionsschtiuschtändigkeit düe reagiere.

Di digitali Übrtragig kennt eigetlech kenr Lücke, Pouse u Usfäu, u trotzdäm entschtösi immr widr dert, wo eigetlech gareke Übrtragig müglech isch odr wär. Uwe auso ke Übrtragig meh machbar isch odr wär, de isch nämlech übrhoupt e ke Übrtragig meh müglech, udi digitale Löchr hüffe sech explosionsartig. Weme di Psungrheit nid i Betracht zieht, gheit das ganze Konzäpt schnäu mau isech zäme, ude heimr sofort e GAO, auso e Grunzender Auer Ochs, wisi idr Savanne hüffig vorchöme, abr o idr Pampa usse, u überau gfragt si, u zwar immr i angere Umschtänd u Prislage, uf Dütsch xeit. Das Umbruchvrfahre ghört abr mit Sicherheit nid id Kategori vode Eigegwächs odr vode inkompatible Uswüchs, o nid i bewusst wit gfassti Bereiche vode AUB, auso idi berüehmti Abteilung Umgeworfene Blumentöpfe. “So blibe di Frage offe, udi unklärte Fäu beschtöh leidr eifach witr, muesme säge. Me hätti ja bi dere Glägeheit ono das übleche Luschtgfäu vom Luschtgfüeu chönne erwähne, abr nid zwingend, wüu es schpiut ja nachwivor ke Roue, u drum erwähnemrs hie mit kem einzige Wort, gäu Koni?” “Mit kem Wort, Toni! Mir weinis nid wichtigr mache, ausmr si.” “Das chaja gar nid si, u unwichtigi Glüscht ghöre nid iz Regau vode Büttusuppene ude Gwürz, abr o nid ufz Tablar mite aupine Theesorte.” “Das heischo di aute Grieche usfüehrlech erwähnt, dr Platon, zum Bischpiu, gloubeni, i sim Wärch ‘Tablar u Theesorte’.” “U mer si ja zwe Platonischte.” “Du meinsch Platonikr.” “Nenei, Plattitüde.” “Ah, ja. Mir wüsse zwar beid, dasdi Luftgnüss udi Luschtunfäu, abr odi Luschtsüchene udi Luftübrlägeheite grad im tradizioneue Bäretanz vode Bäretatze e gwüssi Roue schpile.” “Ud Gezitte schpile one Roue drbi.” “Ud Schtelig vom Mond im Bezug zudr Ärde.”

So öppis darf tatsächlech nid ungrschetzt wärde, doch einzelni Einzuheite si bereiz bis ufe idi höchschte Schteue gschnagget, hei Tatmosphärerinde lockr dürschlage u si idi abtungklete Chäschäuer vo Greyerz u vode Galaxie zSchbrinz uz Tilsit vrschwunde. Schad nume, dassi ide Protokou vode Exekuzionspelotons vodr Chutzelixkompani ke Erwähnig finde, we di Vrurteilte ztod gchutzelet wärde, wüu niemr wirt gärn usgchutzelet, ifrschtange, wüu o das ghört eidütig zu de Luschtafäu, zude Luschtabfäu u zude Luschtumfäu ide Luschtfiume vodr Luschtbarkeizinduschtri, abr es ghört o voumfänglech zum guete Ton u zur zügige Abwicklig vomene Notfau i jedere beliebige Notfausituazion, u wedi Nothiufegruppene vode Notschtrompuppe ide Voukstanzgruppe ke Vralassig meh xeh, di ganze Notfäu vode Bangke ide Karawangke zübrnäh, abr odi innere Unruehe vode handusüebleche Kuckucksuhre ide Boozwärfte, di Blessure ide Masure u angeri Schtrukture u Reparature, wo ono chönnte affektiere u kujoniere, de hätte dBajuware gnue Tatare u Tartarbrötli umsech, unes würdine nüt passiere, nüt bedütends uf jede Fau. Es längt ja scho, we ide Koridore vode Komodore Tmahnwache ide Reflektore vode Sensore dMachtwache düe bache, u das Lache zlutt uz dütlech wär, so das numeno ganz eisitig uf Schwedisch gflüschteret würdi, udi Iheimische, zäme mite Ussrirdische, dKonsequänze vodr ganze Wachsamkeit müesste zieh, wüu audi unbequeme Vorfäu, wo abr grad ide Schlafsäu ke Alass zu unagmässene Propagandamassnahme ergubte, würde trotzdäm vode zaulose Fiumkameras vode Übrwachixsyschtem outomatisch erfasst, ufzeichnet oder ufgnoh wärde, wüu aui unbequeme Vorfäu würde vode hyprmoderne u schtändig ufnahmebereite Fernseeschtazione fixiert u regischtriert, kaschtriert u konserviert, klassifiziert u karamelisiert idi Anale vo aune vrsängkbare Näimaschine ufgno, so das würklech aui befuegte u unbefuegte Inschtanze guet informiert wäre u dementschprächend dischponiere chönnte. Moderni Ufzeichnixgrät zeichne uf u trage i, trage us u trage ap, usi setze lutlos um, was mues umxetzt si. Si erkenne aui Lüt i Bruchteile vo Sekunde u wüsse auso sofort, wär Schułde het u wär nid. Ke Schpächt am Boum brächtis jemaus fertig, was sogar di Xichzerkennixformalitäte im Hingrgrund loufend u lutlos u lückelos würde ufzeichne, so das jedrzit druf chönnti zrügggriffe wärde. Blitzschnäu wäre di Näme udi Adrässe da, di Telefon, di Bluetgruppene, Tarbeitgäbr, ud Kontoschtänd, dKilometrzahle ud Loufleischtige, tWagefarb u zErkennixzeiche udr vou unvrhüratet Name vodr Grosmuetr väterlechersiz drzue. Das mues si. Sogar Velokennzeiche wärde minuziös regischtriert, wüu viu Intelektueui si hüzutax mitem Velo da. Es isch nume e Frag vodr Zit. Nume vöuig unbekannti Xichzzüg vo vöuig unbekannte Mönscherasse hätte none chlini Schangse uf Nichterkennig, auso uf Nichtanerkennig, uf Nichternennig u uf Nichtübrschwemmig bi auer rasch vrfüegbare Nichtübrhemmig u Nichtuferschtehig, abr es wärde jede Tag immr wenigr, ehrlech xeit, wüu Twäutbevöukerig wirt rasend schnäu erfasst u fürdi wäutumfassendi Übrwachig parat si. Di intrnazionali Vrnetzig füehrt erschno drzue, daso ussländischi Psuechr ade Poschtchartebörse u ade übrraschend guet psuechte Briefmarggemässe sofort erkannt u analisiert chönne wärde, u niemr cha säge, wi lang di Schmätterlingssammler mit irne wisse Schmätterlingsnetz no unerkannt u unbehelligt drvo usgno wärde si. Schetzige gö vo Tage, we nid gar vo Schtunde us, unes nütz nüt, wedr Vladimir Vladimirowitsch Nabokow schtatt es wisses, es grüens Schmätterlingsnetz vrwändet, u o ide entlägenschte Gebiet wärde di nötige Inschtalazionsarbeite bau abgschlosse si, so dasdi modernschti, flächedeckenschti Erkennixsoftwehr us China bau numeno di nackti Wahrheit vodr nackte Wahrheit wirt vrmittle u übrmittle u abschüttle u uswärfe u abschtreiffe. Das heisst nüt angers, aus dasmesech dra mues gwane, dasme überau erkannt wirt, würklech überau, o ufdr Schissi, oni dasmes wot, u oni dasmes wüssti.

Abr ke Angscht! Uf nöiji Ifäu schine dr Rundumfägr, abr o dr Duromatwichsr udr Schtarchschneebrunzr, dr Ändlosfurzr, dr Schnäumäuchr udr Übrvattr vode Schtarchbiersüffr gar nid zreagiere, unes isch numene Frag vodr Zit, bis audi Chraftablette usggange si. Tmeise meise gäng dasume, dases ke Gattig het, u so xeh isches rächt eifach, Tschnäuzüg vode Bummuzüg zungrscheide u sübrlech ztrenne, u o Trathüsr gheie no nid eidütig ungr di uffäuigschte Agebot vodr Nachchriexzit. Abr setigi Agebot hez uf jede Fau dütlech meh aus früechr, unes isch no nid uszmache, wohäre Treis übrhoupt geit, we Twannemachr sötte pschliesse, dasdi klassische Gegäbeheite vo aufäuige taktische Vorschusslorbere nid länge sötte. Heimrs mitrere libhaftige Vöukrwanderig ztüe, odr befinde sech di zaristische Klarsichtfolie usschliesslech ide Häng vode küene Erbouer vo Schtadtmure u Brüggepfiler? Me weises no nid gnau, abr me het scho gwüssi Ahauzpungkte usgwise, wo zeige, das psungers Tränder vode aute Fottine usfüehrlech bearbeitet worde si. Es handlezech hie nume um lutr übrflüssigi Randbemerkige, wo vo zuekümpftige Generazione vo Krüptologe u Kriminologe u Kronologe zersch müesse entzifferet wärde. Scho nume dr Gradmässr vodr Chuchimässrkonfusion udr Mitässrakzion wirt üs zeige, wiviu drvo wirt übrig blibe, unes par Beobachtr gö sogar drvo us, dasdi Gwässrschtrukture udi Gwässrkonture innerhaub vode Gwässrkorekture, abr odi Gwässrflukture vode Gwässrschtrukture ide Gwässrkonture grad in dene Randgebiet e wäsentlechi Roue am Oschtändi vodr Demokrati wärde schpile, wenis nid aues tüscht, wasis übrhoupt no cha tüsche. Abr es mah si wis wot; nume unwichtigi Einzuheite vodr ganze Wägschtrecki schtöno us, u grad di untipische u zimmli uffäuige Einzuheite si abr wahrschinlech entscheidend für Tusmarchig vodr unuswichleche Komplikazionsusgangslag.

Auergattig armenischi Nussknackr, autgriechischi Silikonfassr u brötonischi Härdöpfuschtampfr hei drbi auerdings nüt zsuche, so weni wi abessinischi Eierbächr odr autgermanischi Gaffesibli. Uf ei einzigi französischi Pfanne chunnt mindeschtens ei italiänischi Pfanne, u uf ei nordamerikanische Griliermeischtr chunnt meischtens e längi u lengschtens vorusxeiti sizilianischi Meischtrgrille. Übrhoupt si Grille grad i dere fragwürdige Frag u Lag fädrfüehrend im Griliere worde; me cha gar nid ixeh, wi wit das freizügige Griliere im Freie u das freie Brate im Garte iri pippilottische Iflüss söue chönne usüebe, wüus ja fasch usschliesslech e Frag vom unüebleche, abr xetzlech vorgschribene Aschtand isch. Abr di private Söimäge vo Pompeji heisech lengschtens ufdi örtleche Quartierpennr igschteut, wüusi erklärene ganz sachlech: “Mir wüsse zwar nid, werum grad mir aus unbeschouteni Söimäge vo Öich, vode schtadtbekannte Quartierpennr, schtändig beläschtiget wärde; abr mir empfähle Öich idringlech, Öich schlöinigscht zvrpisse u Öich nie widr hie zzeige, schüsch xemeris umgehend u unumgänglech zwunge, Öich belangrich zempfähle, Öich säubr i Arsch zficke, wedr vrschtöt, wasmr drmit meine.” Wüu es ische so: Wez Liechtli uflüchtet, bedütet das, das Pfäntiu offe si uz Wassr äntlech frei cha fliesse, u we nüt uflüchtet, bedütet das, das nüt geit, dassech nüt bewegt, das nüt fliesst, das auso nüt louft, o nid di vile rote Rückliechtr vodr Voukommeheit i auer Klarheit u Güeti. Drzue bewegemeris hie im eidütige Bereich vode subalpine Schtabhöischrecke, u das bedütet, dasdr Schwärpungkt vode Suechtruppe im Berich vode Nidrwassrtransformatore ude wässerige Nidrtransvattrmorenetranse ligt, wüu nume e tote Schautr ische guete Fautr, u numene tote Fautr ische guete Schautr. Das seit o dr bündnerisch Vouxmund, u numene guete Gfüguhautr isch one richtig guete Houzschpautr, findet wenigschtens dr öschtrichisch Dichtrfürscht us Schladming am See. Abr me cha nid immr Touge vor auem Unglück fescht zuemache, unes git wahrschinlech viu meh Schpöttr aus Göttr ausme meint. Es git sogar setigi Pflume, di schpilesech immr nume uf Chöschte vo angerne mit schpitzigem Schpott uf u finge drbi nüt Aschtössix odr Vrwärflechs, nume wüusi e ungrdurchschnittlech uspiudeti Fläschehaustransakzionstheori vodr Wahrnämig im Hingrchopf hei. Si läbe drvo, angeri dr Lächerlechkeit uszsetze u priszgäh, o wesi witume di einzige si, wo drübr wärde chönne lut u härzlech lache. Nüt ischne zschad odr zheilig, um abegmacht zwärde, unes mues a irer gedangklech agschlagnige Vralagig lige, dassisech so entwicklet hei, auso so vrträit, vrzworgglet u vrschlage drhärchöme, dases sogar e Hung gruset, abr ohni jemaus uspiudet odr o nume ipiudet zsi odr o nume anähernd kułtiviert zwürke. Me chadi Einzuheite anhand vo Zuefäu usefinge, une schlüssigi Entwicklig isch eisittig dängkbar u vorschteubar. Uf jede Fau hange di Zuefäu nid vode Einzuteile vom Ganze ap, wi mängge chönnti meine, sondrn nume vode Vouumfänglechkeite ude Vouschtändigkeite vode Ungrsuechige, bi dene o chlineri u unbedütenderi Schpezifikazione sorgfäutig u mit auer dängkbare u ufwändige Ufmerksamkeit berücksichtiget müesse wärde, wüu di horrible u extensive Uswüchs ja scho überau bekannt si. Si bewegesech usschliesslech im Rahme vode Prognose ide Pagode, wasis zeigt, das Tentwicklige übrschoubar si worde u übrschoubar blibe. Ke einzige Churzschluss voremene Abschluss würdi Tübrtragig no chönne beiträchtige, u ke einzige Abschuss vo Murmeli hätti aus Sameerguss auefaus no Tmüglechkeit, audi Betrachtige rächtzitig zungrbräche, wi o viu anger Tropfnase meine. I aune Frage vodr Gnüegsamkeit bewegemeris eidütig ufm wite Fäud vodr aktuelle Gmeinsamkeit udr üebleche Tröihärzikeit, u mängge Buttischleppr mah das schetze, klar, so wi mängge Buttischteppr, abr mir säubr si aus grossformatigi Muetrwürfunattere, Würfumuetrnattere u Natterwürfumuetere eidütig u unmissvrschtändlech drgäge. Di mannigfautige u mannigfache Gründ drfür bruche a dere Schteu nid usfüerlech erklärt zwärde, abr mir haute schtrikt dranne fescht, das nume di originau indische Schlangebeschwörer übrhoupt ersch idr Lag wäre, däm ganze furchtbare Tribe fruchtbar Ihaut zgebiete, widr Gebietr seit, wüu nume dr Gebietr gebietet, daschja logo. Es xamtwirtschaftlechs Umdängke unes xamtxeuschaftlechs Umschwängke fingt abr lengschtens schtatt, u zwar grad überau ufdr Wäut u oni Vrzug u Vrtrag.

Abr e nöitrali Beurteilig schteit no us. Si fäut no. Si hez no nid erlickt. Si chas no nid bringe. Si hetno iri Hemmige i däm Bereich. Me weis abr nid, a wases ligt, abr di rote Waudameise udi tote Waudäperi vode Waufängr chöi nid druf reagiere u drübr Uskumpft erteile; sisi eifach zfescht mitem Bou vo irem Ameisehügu u mitr Vrbreitig vo irne Härkumpfzwurzle beschäftiget, wüu grad iri Härkumpft bedütetne viu meh aus üs. “Muesis üsi Härkumpft übrhoupt öppis bedüte?” fragt dr Toni. “Mir müesse eifach nume wüsse, wohär mr chöme u wohäre mr gö”, meint dr Koni e chli unbeschtimmt, abr das ligt i irer ganze unbedütende Heimatkonzepzion, wo nid unbeschtritte isch. Ameise si aues Nazi. Si fouge amene innere Konzept, amene innere Programm, a Tusige vo innere Befähle, u niemr chase drvo abhaute, niemr chase frage, was das söu, u niemr duetne ufzeige, daso si nume färngschtüreti Robotr si – u nüt angers. Si kenne haut ke Freiheit, keni Individualität, u fouge irer Chünigin blindlings, wohäre si wot ga. Das isch ire pärsönlech Turmbou zu Basel, möchtme vrglichend drzuefüege, o we aui Vrgliche hingke, u sobaud dr gigantisch Turm chrachend zämegheit, wot widr niemr tschułd xi si, u di hektische Raffnasene wärde au uf ei Schlag numeno ungrschidlechi Schprache rede usech ungerenang nümme chönne vrschtändige. Das heisi drvo, u das het natürli zur Foug, dassis ohni Abschprache niemeh wärde schaffe, o nume e simple Ameisehügu zboue; das schteit bereiz iz fescht, wüu scho nume umsech di Aschprache vode leitende Agschteute übrhoupt jemaus chönne azlose, müesste si sech zersch klar u vrschtändlech chönne usdrücke, auso vrschtändige u abschpräche u zuelose u abwarte. We das überne lengeri Zitschpanne nid geit, gheie odi Abschprache u Absichzerklärige ersatzlos iz Wassr vodr Vrgänglechkeit udr Vrgässeheit udr Vrdorbeheit. U iz übrtraget das mau aus Wärchmeischtr uf di rote Waudäperi! Schad umdi leitende Agschteute vonere Ameisepopulazion, wosech grad im Bereich vodr komplizierte Organisazion vomene kompakte Ameisevouk us Bangla Desch so viu Müeh ggäh hei! U dängket nume mau adi ganzi Logistik vomene Ameisehügu!

“Was iz?” fragt dr Toni. “Das wirt nümme vorcho”, antwortet dr Koni troche. Tatsächlech, das wirt zuekümpftig gar nid ersch chönne passiere; mir hei aui Radiergumine wägg gleit, Termuschonr si agleit u ufezoge u dBleischtiftschpitzr si o putzt u dr Grössi nah häregleit. Dbleischtift si aui genauso subr gschpitzt, wis mues si, si schön näbenenang imene Bleischtiftgschirli häregschteut u o dr Grössi nah ufgschteut. Dbrüue udr Bländschutz si abgleit, dBüroschtüeu zrügg gfahre u Tschublade aui subr abgschlosse, u vo iz a bewege sech di leitende Agschteute numeno ufgschteut, agschteut, igschteut, usgschteut u wi abgschteut im übrus churzwilige Sörfbereich vode Meereswoge u vode Liebestribe, früsch duschet, früsch gfönet u früsch agleit, wasja o sini Berächtigung mues ha. Des Meeres und der Liebe Wellen. Tposunischte ut Klarinetischte sörfe dürdi schprüehendi Gischt vodr brötonische Brandig, u iri schwarze Neoprenazüg glänze wi igfettet idr Sunne, so dasme dr Idruck vo schpringende Delfine übrchunnt usech ade luschtige Gschicklechkeitzschpiu erfröit, wo di küehne Wäuerittr ufde kantige Wäuekämm uffüehre, vorfüehre u härelege, wüu glichzitig träniere odi atlantische Delfine für di olympische Summrschpiu zPjöngyang äne. Aui holändische Pumprnickl labe sech gnüsslech a nordkoreanische Glace, sofärn es übrhoupt irgendwo het u sofärn sise übrhoupt chönne zahle. Numedi Unigweihte warte no ufdi aktuelle Abflugszite vode Zugvögu u ufdi aktuelle Abfahrzzite vode übrige Fluchtierherde, abr es duet gwüss nümme lang dure, bis o di letschte Schtörch iri reservierte Abteilige gfunge hei, mitsamt de positive Iflüss vode viufäutige Näbewürkige ungrde Unschpunneschteischtösserinne vodr swaziländische Frouemannschaft ufdi immrgrüene Geischtesgrössine im Vöukrbau u im Softbau.

Ungrdesse schaffe di flissige Bibrfamilie würklech widi Wahnsinnige a irne höuzige Schtoudämm, höuzige Parkgarasche, höuzige Luftseilbahne, höuzige Schtützmure u höuzige Houzhüttene mitem vrschteckte Ungrwassrigang. Si lö ganzi Ufrlandschafte la übrschwemme, udi beide Literate us Chäsiz luegene drbi übrrascht u fasziniert zue u wundere sech übr das nöie faunische u floristische Geschehe, auso übr das, wo grad vor irne Nase adr Gürbe passiert. No vor zäh Jahr ersch hättesi sech so öppis wi die schnäu wachsendi Bibrpopulazion adr Gürbe u adr Wabr u adr Toffe gar nid chönne vorschteue, abr plötzlech sisi eifach da xi u hei grad losgleit widi Wahnsinnige. U scho befürchte di beide bunte Brüuefetischiste, auso dr Dick udr Dünn, bekannt aus Koni u Toni odr äbe aus Dick u Dünn us Chäsiz, das scho gli dr barsch Ornixwiue vom igeborene Gürbetaler, auso vore churzsichtige u chlimüetige Xeuschaft, di bedingixlosi u radikali Usrottig vode hiesige Bibr ultimativ wärde vrlange, wosech ugfragt u unagmäudet u oni zfrage u oni Papir u oni Bewiuigung u unübrsehbar fräch idi lokali u regionali Landschafzgartearchitekturgschtautig düe imische, ohni übrhoupt zersch dBehörde zfrage, ohni amtlechi Genämigung, ohni behördlechi Bewiuigung u ohni jedi schriftlechi Beschtätigung mite agfüegte Protokouabschrifte. Isch ämu wahr! Wedr chöisi e behördlechi Geschtattung vorwisiere, none Uswisung ufwisiere, no heisi e entschrpächendi Usbiudung mit Abschluss odr e anerkannte Schnäulehrgang dürlüffe u, vor auem, vor auem angere, oni di private Psitzvrhäutnis udi demokratische Prozässe dürlüffe zha uz berücksichtige. So öppis geit natürlech nid, wüu wo chiemtemr häre, we das jede so miech? Drum si sichr o bösartigi u hingrhäutigi Vrgiftixmassnahme dängkbar, usgfüehrt vo eim vo dene viune ungrbeliechtete Hingrwäudler idr Region “wüu dr Bibr üsi gwachsni Ornig schtört”, “wüu dr Bibr üsi gschützti Natur vrwüeschtet”, odr “wüu dr Bibr sech üsne gmeinsame Wärte nid cha apasse”, “wüu dr Bibr ke Rücksicht uf üsi gwachsne Schtrukture u historische Kułture nimmt”, “wüu dr Biber aus souche absolut unschwedisch isch” odr “wüu dr Bibr hienache artfrömd isch u rassemässig nid zu üsne Murmeli passt”.

U was ghörtme ono, so ganz näbebi hingerem Rügge u ungerem Tisch übr üsi beide härzige Protagonischte vom hiesige Kułturschaffe? “Di zwe Wixr schribe Züg, wome grad mues chotze, wemes list.” “Di zwe grusige Cheibe male Biudr, wo jedes Bebe chönnt male.” “Di zwe grusige Sieche näme ke Rücksicht uf üsi gwachsni Kułtur.” “Di zwe Schnäbichätscher vrhöhne üsi Exischtänz.” “Di zwe Giguribser vrträte nid üsi geliebti Heimatliteratur usem Läsibuech.” “Di zwe Arschfiggr gheie eidütig usem Rahme vom gegäbene Aschtang.” “Di zwe grusige Schwuchtle übrtribe numeno mit irem provokative Läbeswandu.” “Di zwe Hingrladr si eidütig schwul.” “Di zwe Tüppe si gäge üsi schwedischi Demokrati u gäge üsi swaziländischi Rächzornig.” “Di zwe Souniggle si zwe typischi Näschtbeschmutzr u Landesfinde.” «Vilech sogar Landesvrrätr, wedr mi fraget. Abr mi fragt ja niemr.» “Früechr hättme di zwe Soucheibe eifach ufghängkt.” Di zwe Schribrlinge schribe lengschtens nideso guet widr Jeremias Frisch udr Friderich Gotthäuf. U a Max Dürematt chömesi sowiso nid häre.” “Di zwe aute Provokatöre mit irne zwe aute Töffe sine Gfahr für üsi Ching ufdr Schtrass.”

Und so witr. Mir xeh auso sofort: Zwättr kaprioliert, Tschtimmig schwangkt heftig, Tlag rumplet u knirscht vorsech häre, dr Himu tobet, u aui wüsse, vo wäm hie Tred isch. Abr aui möchte iz am liebschte schön troche idr Schtube hocke u Blockschoggi mampfe u drzue i dicke, warme, norwegische Wintrsocke ändlos adr Fernbedienig umedrücke u ungrde 500 Kanäu öppis intressanz finge. Es Läbe mit 300 Kilo? Krabbe fische idr Beringsee? Es auz Outo flicke? Es nöis Outo chouffe? Gułd sueche zAlaska? Böim fäue zKanada? Vrloreni Boumschtämm sueche zFlorida ide Kanäu? Bibeli usdrücke? Uswandere? Thaar föne? E offni Chnöioperazion? Es praktisches Chochgrät? Zangge mitr Aute? Mord u Totschlag? Odr di schönschte Flugzügabschtürz? Di schpektakulärschte Schiffsungrgäng? Di beiidruckendschte Isebahnunglück u Schiffszämeschtöss? Di gröschte Waudbränd? Di beschte udi schönschte Outounfäu ufdr Outobahn? Gränniching am Loufmetr hüete? Haubwüchsigi Terorischte u Attentätr vrbibäpele? Modischi Trendsettr im Intrnetbereich? Ganzrasierti Pornoschlampe? Reklame fürne ussrdienschtleche Militärdienscht ide Trope gäge Zyklope, Isotope u Antilope? Füdleblutt im Dschungu übrläbe, oni Hiuf vo usse, abr immr schön vrpixlet, so dasme sichr keni Schnäbi u keni Püppi xeht, keni Füdle u keni Fütz? Odr e Wettbewärb im Hamburgrfrässe? Vorzüg vo moderne Kampfpanzr? Wauempfählige für absoluti Dumpfbackene, wono nie öppis vrschtange hei vo Pippilottik? Bunti Schoggelaeier? Kameramännr, wo mitr Kamera iz Wassr gheie? Dicki Brutpaar, wo bim Turteschnide umgheie u nümme säubr chönne ufschtah? Schöni Schirenne mit nazionaler Subrkeizgaranti? Klinisch unbedängklechi, übrregionali Tenisschpiler, glattrasiert, deodoriert u permafroschtiert? U Tenisschpilerinne mit schneewisse Fauteröckli? Outorenne mit müglechscht viune schreckleche Umfäu mit viune Tote? Zäh Schtung Görling am Schtück odr zäh Schtung Gouf am Loufmetr? Odr doch liebr nume zäh Schtung Reklame am Schtück? Das ischja zeinzig Läschtige am Fernsee: Gäng wärde di schönschte farbige u ufgschteute Reklamesändige dür irgendwelche Seich u Schäiss ungrbroche, im schlimmschte Fau dür Nachrichte odr dür Diskussionsrundine, wo ke Sou intressiere! E intressante Gedangke: Brunze mitm Räzuvrchöiffr. Schisse mitr Ratehäx. Vögle mitm Schportreportr. U natürlech vou intim schlaffe mitere schöne, blonde, norddütsche Nachrichteschprächere, wi denn dr Hermann Burger selig i sine küehnschte Maschturbazionströim. Dr multinazionau Schuehabietr bietet scho sini Früelixkolekzion a, dismau liechti Schlüfschueh oni Schuehbängle, wo chönnte passe u enorm praktisch wäre, grad wüumese nid mues binge, wüu di zwe Protagonischte odr Proschtatonischte odr Proschtetikr vodr Autersfront nümme wei müesse Schueh binge. Für das sisi iz äbe scho viu zaut; si chöisech nümme eifach nume abebücke u chiemte gar nümm adi huere Schuehbängle häre, dr eint, wüuer e zdicke Ranze het, udr anger, wüuer zgschtabig uz schtif drzue isch worde. Si nämesech auso vor, sech nächschtens nach dene farbige, liechte Schlüfschueh umezluege u umztue, nach dene Sliprs auso, odr Slaprs, odr Sluprs, wüusi bruche wahrschinlech es par vo dene nöie, liechte Schtoffschueh füre nächscht Früelig, so öppis wi Turnschue mit dicke Sohle füre nächscht Summr u füre nächscht Herbscht u füre nächscht Wintr. Si gö ja nümm ge wandere, si gö ja immr nume so wit, dassi nid müesse louffe, u so blibesi fit füre Rueheschtand ufem Kanapee u fürz Töfffahre. Sisi beid dr Meinung, das körperlechi Aschträngung unxung sig u das Schport dr Xundheit nume schadi u das körperlechi Aschträngung nume öppis für Tubeli sig, wo am Doktr aues gloube, waserne seit. Abr zersch müessesi nacheluege, wassi no a liechte Schueh im hüsleche Agebot hei, wüu nüt vrgässesi so schnäu wi Tschueh vom letschte Jahr, usi müesse zersch luege, ob di nöie Schue auefaus o oni Socke chönne treit wärde, wüu Socke hassesi no meh aus Schueh. Vom Früelig bisi Herbscht ine tragesi meischtens kenr Socke. Sie müesse sech o nach liechte Summrjagge umtue, nach geignete Lömber, wüu di letschte Lömber sine vrleidet, usi heise eifach id Chleidersammlig vom Rote