Uns schiggd der Himml (eBook) E-Book

Helmut Haberkamm

• Herausgeber: ars vivendi
• Kategorie: Gesellschafts- und Liebesromane
• Sprache: Deutsch
• Veröffentlichungsjahr: 2010

Seitenzahl: 81

Beschreibung

Mit Uns schiggd der Himml erscheint nach neun Jahren endlich wieder ein Gedichtband von Helmut Haberkamm. Der vielfach ausgezeichnete Dialektkünstler hat die fränkische Region und Literatur seit seinem Erstling Frankn lichd nedd am Meer mit seiner ganz einmaligen Art von Mundartpoesie bereichert nachdenkliche Sprachkunstwerke voller Heiterkeit und Tiefgang, bodenständige und geistvolle Lebensgeschichten, Klangspiele mit Schwung und Hintersinn. So ist diese neue Gedichtsammlung wahrlich ein Geschenk des Himmels. Mit Texten voller Wut und Übermut, voller Geist und Sprachlust

Leseprobe

Helmut Haberkamm

Uns schiggd der Himml

Gedichte

ars vivendi

Vollständige eBook-Ausgabe der im ars vivendi verlag erschienenen Originalausgabe (2. Auflage 2013)

© 2010 by ars vivendi verlag

GmbH & Co. KG, Cadolzburg

Alle Rechte vorbehalten

www.arsvivendi.com

Umschlagfoto/-gestaltung: Armin Stingl, Fürth

Datenkonvertierung eBook: ars vivendi verlag

eISBN 978-3-86913-336-2

Bücher lesen heißt wandern gehen in ferne Welten,

aus den Stuben über die Sterne …

Jean Paul

und widder hammkumma

mid ganz annera

Aung und Ohrn

und Gedankn

Inhalt

Des Besde an dem Buch

Sooch bloß, dir felld wos?

Redn is Gold

Zeichn und Wunder

A Dropfn auf der warma Händ

Der Autor

Des Besde an dem Buch

Des Besde an dem Buch

Des Scheene an so am Gedichdband is

Daß so vill Weiß drin is

Wu nix drinstehd

Wummer lesn misserd.

Ka Buchstoom, ka so a komischer Dexd

Ka Werder, wummer nedd verstehd

Wu aam die Aang iebergenna

Wummer am libbsdn aufheern meecherd mibbm Lesn.

Wergli wohr, des Schennsde an so am Buch

Is der leere Blatz, der braade Rand

Ohna Werder, obber scho aa mid am Sinn

Die reinsde Offnbarung.

Doo kummdmer na zum Verschnaufn

Doo kammersi ausruha vo die ganzn Werder

Doo kummdmer ins Sinniern und ins Draama

Doo kammersi na so richdich falln lassn.

Und doo falln aam na lauder so Sachn ei

Alda Werder, alda Gschichdn, alda Sprich

Doo wemmer länger drieber noochdenggn däd

Kenndmer ganza Romoon drieber schreim.

Desweeng gibbds ja die weißn Fleggn und Flächn

Daßd an Stifd nimmsd und neischrabbsd

Wosder eifälld, daßd na draufkummsd:

Wu nix dordstehd, des is fier diech, des kerd dir.

Wu nix is, is alles – dord bisd du.

Zwischer Etz und Immer

Die Zeidung durchaggern

Vo vorn bis hindn

Aa die Spordseidn und in Stellnmargd

Den Wirdschafdsdaal, die Werbebroschbeggde

Doodesonzeing, Immobilien, des Fernsehbrogramm

Nacherdla die Bosd durchforschdn

Vo vorn bis hindn

Die Rechnunga und Druggsachn

Die Wurfsendunga und Handzeddl

Die ganzn Einkaufsbläddle iebrernanner

Der Kaffee is scho kald und hadd a Haud

Es gehd scho auf Middooch zu

Und du hoggsd immer nu am Diesch

Vor die ganzn Dassn und Deller und Gleesle

Und schausd still auf an glanna Fleggn Weld

Ja, und alles, wos bliem is

Vo dem daabn, lätscherdn Vormiddooch

Is des Zedderla doo mid aana Händvoll Werder

A warms, guuds Gfiehl ganz dief drinna

Und a Schimmer vo aana ganz annern Weld

Draumhafd

Die letzdn Nächd hobbi komischa Woor draamd.

Doo binni rumgloffn und auf aamoll kummdmer

A riesicha braungelba Humml endgeeng

Die hadd gsummd und brummd

Obber die is nedd gfloong

Die woor so groß wie a Bernhardiner

Und die is ausgfiehrd worn an aana Leina

Vo aana Fraa mid am Kopf wie a kunderbunda Dulbn

Die Leid hamm alle die Humml streichln gwolld

Ihr digger, flauschiä Hoorbelz woor wie a Debbich

Und samdwaach wie a Deddybär

Obber wennsi aan bissn hadd, woor der ganze Arm wech.

Na hobbi von am feierroodn Schmedderling draamd

Der woor riesngroß, so wie a Geier

Ab und zu isser in die Heh gfloong

Hadd sei Greise zoong ieber die Bammer

Und is nacherd rundergstochn kumma

Haddsi seelnruhich an Daggl gralld

Und haddn verbutzd midzammsd der Leina.

Heid Nachd hobbi vo aana kollschwarzn Spinna draamd

Die woor so groß wie a Griegsschiff

Mid Aung wie finsdra Barraboolandenna

Und Banner so groß wie Baiblain-Rohre

Die hadd an der Greizung an glänzerdn Geländewoong baggd

Und haddn zwischer ihr riesichn Kiefer zermalmd

Des Blech, die Reifn, den Modoor, des Gloos

Alles haddsi neigworchd und ratzebutz verdilchd.

Ich hobb kann Fernseh mehr

Ich mooch in ka Kino mehr

Mir langd, wossi draam.

Der Lauf der Zeid

In am Wiesla in Frankn

Weid hinderm gesdrichn Dooch

Doo hoggd dei Großvadder an am Booch

Und schnitzd aus Bammschelfn a Bood

Mid am Zohnstocherla als Masd

Und am Brausebulferbäggla als Seegl

In dem Wiesla in Frankn

Drächd der Booch na des Schiffla weid ford

Und aa dein Großvadder und den Dooch

Und des Wiesla und des Dorf

Und am End na die ganz Weld

Heid stehsd ganz allaans doo

Schausd ganz verdadderd in der Weldgschichd rum

Bisd erwaggsn und a ka Kind mehr

Bisd immer nunni groß und starg

Und siggsd immer nu Rindnboodle schwimma

Uns schiggd der Himml

Mir hamm scho immer a Gligg

Des is scho schee, daß uns gibbd

Wall uns schiggd der Himml

Ohne uns gehd doch goor nix

Uns gehds immer besser

Mir wern immer gscheider

Mir leem immer länger

Mir wissn immer weider

Die Weld is a runde Sach

Doo kann kumma, wos mooch

Heid demmer uns scho leichder

Und morng is aa nu a Dooch

Mir hamm a Haufn um die Ohrn

Die Ärwerd is unner Derhamm

Wies kummd, werds gnumma

Doo kummd na scho wos zamm

Wos nedd ziecherd gehd, gehd schlaaferd

Wos nedd baßd, des machmer basserd

Wiemers nimmd, so haddmers

Wems nedd baßd, dem kerds nedd annersch

Vo uns aus kann des Grumme grood wern

Und wos grood is, des biengmer uns zurechd

Solls sei, wies mooch, mir haua uns scho durch

Sinn die Zeidn und die Leid aa nu so schlechd

Mir hamm scho immer a Gligg

Des is scho schee, daß uns gibbd

Wall uns schiggd der Himml

Ohne uns wär des Ganze a ganz annersch Stigg

A Gedichd is a Nachdsichdgeräd

A Gedichd is a Nachdsichdgeräd

Doo dermid sichdmer Geisder und Geheimgäng

Doxische Schatzbrief und gifdiche Babbiere

A Gedichd is a Museumsdeboo

Doo drin findsd Groona, Zebder und Schwerder

Miederrögg, Masgn, Berrüggn, Bechfaggln und Dolch

A Gedichd is a Blägg Box

Wusd die Doodn heern kannsd, wossi alles gsochd hamm

A Gedichd is a Muschl ausm Meer

Doo dermid heersd des Rauschn vo die aldn Zeidn

A Gedichd is a Schmuggschadulln

Mid glänzerda Stanner, Ordn und Greizer

A Gedichd is a Lufdschloß

Des zeichder in sei Spiegl, wos kanner sehng kann außer dir

A Gedichd is a Fesdsool in am Balasd

Doo drin siggsd a Brinzessin, wu auf diech fliechd

A Gedichd is a Erlebnisbarg

Doo schießd nauf zum Himml mid deim Schatz in deim Arm

A Gedichd is a Gurrmee-Resdorong

Wusder Fileestiggle vom Begasus gredenzn

Odder a Schleecherla von am Einhorn odder vo aana Nympfn

A Gedichd is a Folderkammern

Doo wersd ausgwetschd nooch alle Regln der Kunsd

Doo wersd gschloong und draggdierd, bisd alles zugibbsd

A Gedichd is a Wardezimmer

Mid Gsichder, wu ausschaua wie dei Zweifl und dei Sorng

A Gedichd is a Kaddedraaln

Doo gehsd in die Gnie und doo werdsder ganz annersch

Doo griggsd a Gänshaud und doo fiehlsdi wie im Himml