5,49 €
Mehr erfahren.
- Herausgeber: Books on Demand
- Kategorie: Gesellschafts- und Liebesromane
- Sprache: Deutsch
- Veröffentlichungsjahr: 2024
Meer Pälzer, meer sin allegar
an Facette reich.
Lääs emol, wie´s frieher war,
un wie´s is noch heit.
Das E-Book Do fallt die Wutz vum Glawe ab wird angeboten von Books on Demand und wurde mit folgenden Begriffen kategorisiert:
Pfalz, Mundart, Heimat, Humor, Anspruch
Das E-Book können Sie in Legimi-Apps oder einer beliebigen App lesen, die das folgende Format unterstützen:
Seitenzahl: 43
Ähnliche
Inhaltsverzeichnis
Irrlicht
Perdsmarkt
Glawe
De Jugend geheert die Welt
Bildung
Kinnerwunsch
Noom Kriesch
Schenke
De Rommel
De Maibaam
Die Wutz
Irrlicht
Zwische Ramschde un Landstuhl leit
es Bruch, die Moorniederung noch heit.
In zeh Minudde fahrsche uff de Stroß
bequäm
mem Audo hie un widder hääm.
Frieher gab´s die Stroß noch net;
noch net emol e feschd Bankett.
Dort war frieher Moor gewä,
de Weg se fahre war net schä.
Uff dem wääche Unnergrund,
war so manchie Kutsch versunk.
Rette konnt die Kenner mie
un Nimmand hott se mäh gesieh.
Mit dicke Bohle hott mer dann
gebaut e brääder Knibbeldamm.
Do dedruff, do war mer sicher
mit de allerschwerschde Viehcher!
Heit macht die Airbase dort die Nacht zum
Daach,
ohne Rolllade bische die ganz Nacht
wach.
Kemm vun uns is heit mäh klar,
wie stockdungel das frieher war!
Hott wennischdens de Mond geschien
konnt mer immerhie was siehn.
Hott der hinner Wolke sich verkroch,
war´s dunkel wie de Katz ehr Loch!
Die änzisch Hilfe dann im Dunkel,
das war e flaggerischie Funzel.
Nur wenn´s unbedingt hott misse sin,
ging mer in de Nacht das Wagnis in:
Uffem Kutschbock oder hoch zu Perd
vun Ramschde no Landstuhl oder
umgekehrt!
Versuch mol die Geräuschkulisse
deer mol vorstelle se misse!
Das Hufgeklabber geht jo noch,
jetzt stell der vor, mer wär geloff!
Das is e ganz schää weitie Streck
un Mancher hott schun kriet die Freck!
E Zeit lang bische unnerwegs,
so langsam werrsche dann nervees!
De Fuchs, der duut vun vorre belle,
die Rehe, die duun fleißich schelle!
Un die Naachteil, die ruft laut “Schuhu!
Ich robb dich an de Hoor, mei Bu!”
De Kauz hoggt in de Heck un fiept,
die Spitzmaus in de Bohle piept.
Im Batsch, do heersche ebbes wuhle:
Dort duut sich die Wildsau suhle!
Es jault de Wolf un beese Buwe
heerschd du hinner deer was rufe!
Ringserum, do heersches knacke,
speerschd eiskalder Hauch im Nacke!
Un weil du werklich gar nix siehschd,
hoggt deer de Deiwel im Genick!
Vor lauder Angschd, do fallt der in:
“Das kennt jo de Erlkeenisch sin!”
Immer greeßer werd dei Not:
Dem sei Kind war nämlich doot!
Dei Herz fangt langsam o zu rase,
während um dich rum die Gase
wo sich außem Moor no owwe winde
hie un widder selbschd entzünde.
De halwe Wäg, der hasche ball
um dich rum flackert´s iwwerall!
Ringserum die Newwelschwade,
jaan dich un kennes kaum erwarde
dasse dich se fasse krien
un in die Unnerwelt dich ziehn!
Im Fackelschein un Newweltreiwe
duun Händ vun unne no deer greife!
Die gewwe sich die greeschde Mieh
fer dich ins Moor enin se zieh!
E Schatte greift deer ins Genick,
vor lauder Schreck springschd du serick
un fallschd erunner vun de Bohle:
Jetzt kenne dich die Geischder hole!
Sie zerre an deer unentwegt
während du langsam unnergehschd!
Die Kält fahrt in dei ganze Glieder,
de Sumpf is wääch, es zieht dich nieder!
Du denkschd noch: “Du ich mich schnerre,
heer ich do net Jemand plärre?”
Versuchscht dei allerletschder Schrei,
doch Zung und Gaume sin wie Blei!
Dei Zeit, die is jetzt abgeloff
jetzt bische glei im Moor ersoff!
De Kopp im Batsch, e ledschder Graus
es guggt nur doch die Hand enaus!
Dei Seel schun in de Himmel reist,
do merg´sche, wie dich Ebbes greift!
No unne ziehn dich hunnert Geischder,
uff ämol fühlsche dich gleich leichder!
Rufschd no de Seel: ”Komm nochemol!
De Deiwel hat mich net gehol!
Mit meiner Hand du ich was spiere,
losses uns nochmol prowiere!”
Die Seel ruft: ” Alla hopp, jetzt drigg!
Ansunschde komm ich net serigg!”
Dei ganzie Kraft geht in dei Faust
schun is de Kopp de Batsch enaus!
Du kannscht zwar immer noch nix siehn
awwer atme immerhin.
Er duut dich ganz no owwe hole,
erleichtert leischd du uff de Bohle.
“Danke! Ich kenne dich zwar net,
awwer du haschd mich gerett!”
Du driggschd sei Hand, die is net wääch,
an seine Finger is kä Flääsch!
Du guggschd ne o un werrschd dann err:
der ganze Kerl is rappelderr!
Guggschd ins Gesicht, nur hatter käns,
awwer in de Hand de Sens!
Er grinst un klabbert mit de Zäh:
“Ich war zufällich in de Näh!
Normal mach ich jo sowas net,
awwer du haschd dich so gefräät!
Un dass mich jemand sieht un fräät,
das han ich so noch net erläbt!
Dei Zeit, die war jetzt noch net um,
sei sicher, dass ich widder kumm!
Entfern dich net vum Damm so weit
ich muss jetzt erschd zu anner Leit.”
Er geht querfeldin, duut nochmol winke,
ohne ämol insesinke!
Ob ich die Streck naachts nochmol geh,
muss ich meer zwämol iwwerlee!
Fahrschd du nochmol naachts die Stroß
durchs Bruch un es is net viel los,
dann hall Ausschau dann un wann:
vielleicht siehschd du de Sensemann!
Er wart uff dich in aller Ruh
un er winkt der freundlich zu!
Perdsmarkt
Zieht sich im Herbschd de Himmel zu,
han die Baure langsam Ruh.
Die Frucht is in die Miehl chauffiert,
de Mais is in de Kaut siliert.
Die Grumbeere, die sin im Keller,
