Nostalgie E-Book

Peter Martens

• Herausgeber: BoD - Books on Demand
• Kategorie: Poesie und Drama
• Sprache: Deutsch
• Veröffentlichungsjahr: 2023

Seitenzahl: 101

Beschreibung

Die Nostalgie nach der Vergangenheit begleitet mich ständig, vielleicht werde ich alt? Ich denke aber es ist unabhängig vom Alter, um zu nostalgieren.

Leseprobe

Ich schrieb und schrieb bis in die Nacht

Auch manches Blatt dabei zerrissen

Ich hörte, wie mein Engel sagt:

Das meiste kannst getrost vergessen

Er las es nochmal ganz verlegen

Was ich so mühevoll geschrieben

„Vergiss die Sorgen, Not und Elend

Lass nur das eine – von der Liebe!“

Bedanken möchte ich mich bei meiner wundervollen Frau Lisa, bei Julia Rempel, Manuel Rempel, Estella Wichmann, Diana Tiessen, Marina Krein, Katerina Jabs, Joel Wall & Giulia Pikalov, die mir eine Hilfe waren, beim fertigstellen dieses Buches.

Die Nostalgie nach der

Vergangenheit begleitet mich ständig,

vielleicht werde ich alt?

Ich denke aber es ist unabhängig

vom Alter, um zu nostalgieren.

Maunch eenmol besetjt mie dee Muse

See blifft doch jeweenlich nich lang

En wada aus Robinson Krusoe

Blifft bloos daut hoppe en bange

Blieft Plautdietsch!

Hello leewe plautdietsche Lied

Welcome hiea opp dese Sied

Enn doabie saul’n jiedra weete

Wie welle onse Sproak jeneete!

Een poa Jedichta aul jeschrewe

Eenje sent noch zimmlich fresch

Toop to saumle bloos jeblewe

Aus dee Tjreemel vonnem Desch

Inhaltsverzeichnis

Frejoa we aules beta

Ons Nohba

Miene eschte Schred

Selfstjebacktet Broot

Dee Hoawst

Dee latzta Schooldach

Usun-Agatsch

Seeha vetruut

Dee latzte Owend enne School

Jasch sien Esel

Aules jeftich

Düwe betjitje

Eva

Mien Fletzepee

Wie sent Jast oppe dese Ed

Dee Fru ess jegohne

Dee latzta Sommadach

Twee linjtje Poote

Emma wada Online

Junges, bloos met witte Ped!

Daut leewe Jelt

Daut oole Bilt

Doat woare emma wenja Breew jeschriwe

Mennosport

Krank fiere

Hee roopt ahr aun en sajcht „Hallo“

Dee Woolt em Hoawst

Tjast

Tschuktscha

Rande-Vouz

Etj we noch niemols enn New York

Urlaub-Bibeone

Somaferjen

Bibeone - Pineda

Aul wada opp dee selje Hoatj jeklunjt

Jiedra haft soo siene Sorje

Jriepa – Piepa, oda Plenskok

Dee eschte Leew

Junges em Goade

Oppem Fletzepee (Eahra twee)

Een Rodsel

Nostalgie

Biem Nohba schmatjt daut Uft vel beta

Rein aus Schnee

Sunnyboy

Selwatjast

Goldne Tjast

Bie Ma to Gaust

Dee Fleja ess reed

Hee fellt, hee fellt

Em Paradies

Fantomas

„Sami Sieljnije“

An meine Schwester

Die Macht des Wortes

An meinen Vater

Zum 90sten Geburtstag

Bekaunde trafe

Dee eschta Septamba

Hein redt kesoaksch!

Endlich in Deutschland

All diejenigen, die Murnau kennen gelernt haben, werden mich verstehen

Eene dietsche Moatj

Schiewe opstalle

Wiehnachte noh dem Trich

Neajchsten leew

Im Stall

Drei Karawanen

Een aundra Stern

Dee Tjeenich

Herodes

Dee goode Nohrecht

Der Stern

Harter Boden

OkurkI*„Vom schmetje aufwahne“

Okurki*

Große Taschen

Die Mütze brennt

De Metz brennt

Meine erste Mauer (13 Jahre)

O Tannenbaum

Die Einberufung

Onse Ed

Frejoa we aules beta

Frejoa weret aules beta

Frejoa gauf‘it tjeen Komputer

Tinja spelde meeha oppem Hof

Junges holpe eahrem Voda

Hakte Holt en holde Wota

En spelde Footboal boaft em Stoff

Em Winta fohre see met Schlides

Daut were jesunde Tjedels!

En dee Meatjes leet daut schmock

Mettem langen, ditjen Zopp

Haude feine roode Bake

Kunne scheen Ketlette backe

Rollkucke en Pereschtji

Were emma voll doabie

Pienich hetjle oda tjnete

Kunne uck den Owe hette

Were emma schmok jetjamt

En lohde bett dee Frieja tjemmt

En waut ess vondoagschen Dach?

Bute ess’ it ahn to dach

Eene Tiet vom Internet

Wo eena mettem aundren chatet

„Ich bin drin“ sajcht Borris Becker

Junges tjane tjeenen Trecker

Meatjes droage kortet Hoah

Foahre met’ne ejne Koa

Vom Schminjtje ha’se roode Bake

Tjene nich mol Tweebak backe

Gohne escht mol goanich rut

Ohne Schminke ute Kot

Dewe dit nich, en doone doch

En wea weet waut aulles noch

Frejoa we daut aules beta

Frejoa gauf‘ it tjeen Komputer

En waut ess vondoagschen Dach?...

***

Ältere Leute hört man oft sagen: „Früher

war es doch alles besser.“

Ons Nohba

Mien Nohba foaht bie ons vebie

Zemorjens en Jeajnowend

Wie wohne aul soo lang dichtbie

En noch nich vel jenohbat

Hee foaht bie ons velenjst dee Hatj

Een kortet Stetj, dan romme Atj

Dee lichta sent noch emma aun

Dee Wint jachjt Blida hinjaraun

Sien Hobby ess: (jeiht jearen Waundre)

Etj sie fe ahm kratjt soo ous aundre

Nohbasch sent wie lang auswan

Waut weet hee von mie, en etj von ahm?

Wie wohne lang opp eene Gauss

Waut dentjt hee soo, woo lewt hee bloos?

Mien Stern, dee ess soo wiet von sienem

En siene Welt ess uck nich miene

Dee Nohba vonne aundre Sied

Ess uck gaunz goot to liede

Biem Traffe red wie een poa Wed

Dee nich seeha vel bediede

Hee haft’ ne Koa en haft een Hunt

To kloage haft hee tjeenen Grunt

Hee haft’ne Oabeit, haft een Hus

Enn sinjt sien Leedtje „Tus es Tus“

Wie seehne ons meist jieda Dach

Biem Traffe saicht hee schmock „Gendach!“

En doch blifft hee fe mie soo framd

Kratjt soo dochwoll, aus etj fe ahm

***

Miene eschte Schred

Gohne haft mie Ma jeleht

Etj hild mie faust aum Rock

See stund nich jearen oppe Sted

See haud daut emma drock

See jinjtj em Tjala, jinjtj em Staull

Etj kaum nich emma mett

Vestund escht goanich waut daut saul

Wooromm see nich mol sett?

Etj leet mie loos, wock endlich opp

Stund nu opp ejne Been

Wisst noch nich woonen Foot veropp

En vesocht daut doch aulein

Met twee speziead etj oppem Hof

Met dree enn framde Goades

„Tjinja moakt daut nich too groff“

Sed mien Oopa Moates

Ons jetjd daut enne Finjatjes

Met miene Sesta Leena

Mol schwame lehre Tjitjeltjes

(Dit gauf daut Joah nich Heena)

En oppe Gauss, waut etj soo hiead

Daut were nich bloos goode Wed

Dee etj uck seeha pienich lehd

Daut were miene eschte Schred

Etj woss, en woss, etj woss aus Grauss

Aus aulet aundre oppe Ed

En wisst noch goanich, daut etj wauss

En daut dee Ed sich dreiht

Von donn aun sie etj vel jegohne

Daut eene ess jewess!

En Jeesus, daut hab etj vestune

Fe ons nohm Tjriez jegohne ess!

***

Selfstjebacktet Broot

Daut jefft soo vele Sorte Broot

Woont maun bloos nehme saul…?

Aules schmatjt bestemmt gaunz goot

Maun haft’ne groote Wohl

Aum basten schmatjt mie noch daut Broot

Woont miene Mutta backt

See schoof dee Plott opp’m Veeafoot

Dee heete Owe knackt

Daut sach uck emma seeha schmock

Woo see aum tjnede we

Dee Tjinja hilde sich aum Rock

Daut we’ne gaunze Rej

Dan weret endlich mol soo wiet

See nauhm dee Bultjes rut

Tom ete we’ret noch too heet

Oba wie hilde daut goich ut

***

Dee Hoawst

Noch lang nich foadich daut Jedijcht

Ess vom latzten Somma

Oba woama woat‘ it nu aul nich

Daut woat dochwoll nich woama

Nu ess ‚it wada mol soo wiet

Dee Vejel fleje wajch

Aules haft soo siene Tiet

Dee Hoawst woat wada frajch

Soo rechtich frajch en onveschemt

Tratjt eenfach aules ut

Dee Bleda vonne Beem jeriemt

Noaktich gaunz bett oppe Hut

Noch em Oktooba schmeeta Gold

Pienich derjche Jeajend

Nu ess it onjemietlijch kolt

Dunkel en vereajent

Nu spoota sich met Ach en Krach

Hee haft noch soo vel vea

Boold tjemmt de eschta Wintadach

Etj jleew, dee steiht aul vere Dea

***

Dee latzta Schooldach

Dit latzte mol best du enn dese Klauss

Dee scheene Schooltiet jeiht langsam too enj

Vleijcht traf wie ons derch Toofaul oppe Gauss

Oba soo retj wie ons nie meeha dee Henj

Dit latzte mol sett wie opp eene Benjtj

Dit latzte mol tjitj wie ons enne Oge

Mie deit’ it wee, wan etj bloos doaraun dentj

Ess aules ut, waut wie em Hoate droge?

Dit latzte mol sat etj mie bie die dol

Dit aula tjemmt mie vea aus wan nich woah

Dit tjlinjat hiea fe ons daut latzte mol

Dee Aufscheet fellt mie seeha, seeha schwoa

Vezej mie waut jewese en nich we…

Wiels foaken jenjtj‘ it ohne Ewalaje

Saj mie noch tom Aufscheet een poa Wed

En denjtj nich waut dee Mensche woare saje

Die to seehne we emma’ne Freid

Vesproake haud wie ons dee groote Leew

Aules dreihd sich bloos noch om ons beid

En tridj jeblewe sent bloos noch dee Breew

Bloos daut Aulabaste wensch etj die

Oba doamet ess noch lang nich aules ut

Dee Aufscheet deit mie kratjt soo wee aus die

We weet waut aules veare opp ons lut?

Dit latzte mol jeihst du derch dese Dea

Noch seeha lang tjitj etj die hinjaraun

Waut haft daut Lewe aules met ons vea?

Off etj die eemol wada seehne kaun?

„Sie nich trurich, woat aul aula woare“

Mie ess aus wan etj dit aul eemol hed

Dit latzte Mol! Tom Hiele en tom Roare

Dit were dan uck diene latzte Wed

***

Usun-Agatsch

Mien Oopa sed: “Petro, nje platsch

Daut woat aul woare

Nu jeiht‘it noh Usun-Agatsch

Wie motte foahre!“

Eent we mie kloa, waut sull etj doa?

Mank dee Kesoake?

Oba etj wee noch tjlien, we nichmol Tiehn

Waut kunn etj moake?

Vleicht we daut nich, waut Voda socht

Oba hiea wudd wie wohne

Daut we doch beta aus etj docht

Soo kaun daut gohne

Wie rande romm met Schnodda-Nes

En spelde Footbaul oppe Wes

Daut we ’ne seeha scheene Tiet

Met Peetasch Hein en Ditje Vietj

Derche Puddel noh dem Reajen rand wie boaft

Dee "Zipki" 1 ploagde ons jeweenlich bett dem Hoawst

Jieda Owend musst wie seeha pienich riewe

Onse Feet met ladje Sonnenbloomeschiewe

Eenem jiedren en Russlaunt we daut bekaunt

Jetahlt word met "Eniki-beniki"

En wem daut dan troff musst aune Waunt

Plinse en tahle, jo.. soone "Wareniki!"

Wie prielde ons met Borens Peeta

Dan musst etj rane maunch een Meeta

Wiels hinja mie rand Taunte Marta

Dee Aufstaunt, dee word emma tjarta

Dee Lada nopp, en ewrem Staull

Doa henja we een Mesthuupe

Em framden Goade we etj aul

Oba tjeene Chance mie to vekruupe

Daut retjd noh Wien en noh Benzin

En noh „Saljarka“

Wie mucke nich bloos „Samani“ 2

Met Onkel Walter

Wie hupsde ewre Ariki

Dee Fuppe voll met Asitchki

Wie haude gaunz jenau ons Ziel

Mien Voda foh den basten „Siel!“

Mien Voda foh den basten „Siel“

Hee fehd soo Aulahaunt

Dee aundra Schoffa Michail

Vekofft Zement en Saund

Dee Predsedatjelj Spiwakov

Nauhm vel leewa Dietschhe

Von Sagradov en Orlov

Oda vom Kirpietschnij

Hee wisst, dee Dietsche schauffe goot

En drinjtje nich aus aundre

Vedeene opprechtich eah Broot

Uck wan see jearen waundre

Usun-Agatsch, Usun-Agatsch

Dee basta Boom heet Karagatsch

Ons Nohba, dee heet Amandik

En han en wan we uck Wota em Arik

Usun-Agatsch, Usun-Agatsch

Mien Oopa sed: „Petro, nje platsch!

Wie woare titje“

Met Tschemolgan en Burundaj

Taldi-Kurgan en Kustanaj… nich to vejletje!

Daut jefft een Darp enn Kasachstan

Doa well etj onbedinjt noch han

Wea doa nich we, haft vel vepausst

Etj foah doa noch mol han to Gaust

***

1 Zipki – kleine Risse auf der Haut der Hände und Füße Vom ständigen Kontakt mit Wasser und Wind

2 Saman – Baumaterial in Asien, Erdziegel aus Wasser, Stroh und Lehm

Seeha vetruut

Etj we dochwoll 15

En du een bet jinja

Oba wie were ejentlich

Beid noch moa Tinja

Wie haude beret

Ons to trafe jeajen Owend

Etj haud uck aul Bloome

Jeplocke biem Nohba

Doa were noch aundre

Noh die hinjraun

Een Ditj en een Ounruh

En Hiebat’s Jehaun

Daut died uck nich lang

Du steihst aune Waunt

Dee Bloome, dee henje

Enn diene Haunt

Etj stoh soo aum Tuun

En mie deit aules wee

Aus bie janem… Bruun

Met dee Stecheet ewre Tjnee

Em Mul schmatjt dit soltich

Unjrem Og wer’it blow

Daut we jewoaltich!

Aum Hamd fehld’ne Mow

Oba soo aus du tjitjst

Soo vertruut en jescheit

Dann haud etj den Benjels

Uck aules vezeiht!

***

Dee latzte Owend enne School

Dee latzte Owend enne School

Daut we de Aufschluutowend

Wisst goanich daut etj dit behool