Samhradh 78 E-Book

Martin MacIntyre

• Herausgeber: Luath Press
• Kategorie: Gesellschafts- und Liebesromane
• Sprache: Englisch
• Veröffentlichungsjahr: 2020

Seitenzahl: 540

Beschreibung

Colin Quinn spent the summer of 1978 with his uncle, Ruairidh Gillies, on South Uist. While the world at large and many in the islands watch football in Argentina – didn't Ally MacLeod say Scotland would win the World Cup 'nae bother'? – two 'Barra' men deepen their relationship. Throughout these intense summer days and weeks, of almost forty years ago, we share the main characters' growing intimacy and mutual understanding at joyful times and while facing some major challenges. In their company we enjoy the pristine beauty of the southern isles and feel the wrath of the elements when their mood changes.

Leseprobe

RUGADH MARTAINN MAC AN T-SAOIR ann an 1965 agus thogadh an Lèanaidh (Lenzie) e. ’S ann à Uibhist a Deas a bha athair is à Glaschu a bha a mhàthair. Chaidh e a dh’Oilthigh Obar Dheathain, far an tug e a-mach a bhith na dhotair ann an 1988. Eadar 1990 agus 1992 choisinn e teisteanasan ann an Cuspairean na Gàidhealtachd is nam Meadhanan aig Sabhal Mòr Ostaig.

Bidh Màrtainn a’ roinn a bheatha-obrach eadar dotaireachd, sgrìobhadh is aithris sgeulachdan, is tha e air a bhith air aoigheachd aig Stanza, Fèis Eadar-Nàiseanta Dhùn Èideann, Seachdain na h-Alba an New York, is IFOA Toronto. Ann an 2007 chaidh a chrùnadh mar ‘Bhàrd’ a’ Chomuinn Ghàidhealaich is bho 2010 tha e air a bhith na Shore Poet an Dùn Èideann.

Ghlèidh Ath-Aithne, cruinneachadh de sgeulachdan goirid, Duais na Saltire Society airson Ciad Leabhair ann an 2003. Choisinn na nobhailean Gymnippers Diciadain agus An Latha As Fhaide a bhith air a’ gheàrr-liosta airson Leabhar na Bliadhna ann an 2005 is an 2008. San Dàmhair 2006, chaidh Dannsam led Fhaileas, cruinneachadh de a bhàrdachd, fhoillseachadh le Luath Press. Nochd an treas nobhail aig Màrtainn, Air A Thòir, ann an 2011 is bhuannaich A’ Challaig Seo Challò – nobhail do dheugairean – Duais Dhòmhnaill Meek 2013. Chaidh na sgeulachdan Cala Bendita ’s a Bheannachdan fhoillseachadh le Acair ann an 2014 is fhuair an leabhar sin àite air geàrr-liosta Dhuais Dhòmhnaill Meek agus Leabhar Litreachais na Bliadhna aig an Saltire Society. Chuireadh Tuath Air A’ Bhealach – novella dhen t-sreath Lasag – ann an clò le Sandstone Press ann an 2015. ’S e Samhradh ’78 a’ chiad nobhail aig Màrtainn dha Ficsean Luath.

Tha Màrtainn an-diugh a’ fuireach ann an Dùn Èideann le a bhean is an dithis chloinne.

A’ chiad chlò 2018

ISBN: 978-1-912147-47-2

Gach còir glèidhte. Tha còraichean an sgrìobhaiche mar ùghdar

fo Achd Chòraichean, Dealbhachaidh agus Stèidh 1988 dearbhte.

Chuidich Comhairle nan Leabhraichean am foillsichear

le cosgaisean an leabhair seo.

Chaidh am pàipear a tha air a chleachdadh

anns an leabhar seo a dhèanamh

ann an dòighean coibhneil dhan àrainneachd,

a-mach à coilltean ath-nuadhachail.

Air a chlò-bhualadh ’s air a cheangal le

Bell & Bain Earr., Glaschu.

Air a chur ann an clò Sabon 10 le Main Point Books, Dùn Èideann.

© Màrtainn Mac an t-Saoir 2018

Mar chuimhneachan air piuthair m’ athar nach maireann,

Shonna a’ Bhuachaille, is mar urram dhi fhèin ’s dhan duine aice

an Dr Fergus Byrne.

Clàr-innse

1

2

3

4

5

6

7

8

9

10

11

12

13

14

15

16

17

18

19

20

21

22

23

1

’S MI BHA eòlach air an t-slighe eadar Grianaig is Central agus tuath an uair sin o Shràid na Bànrighinn, ged nach do rinn mi riamh leam fhìn e. Ach ’s ann air an trèan bu trice a rachamaid dhan Òban, dà thuras – trì as dòcha – sa bhliadhna, mun do cheannaich m’ athair a chiad chàr is mi dìreach air tòiseachadh san àrd-sgoil. Chan e adhartas a bha seo mun d’ rinn mi bòst ro-mhòr rim charaidean ùra beairteach. ’S ann a bhiodh e air a bhith coltach ri cantail gun robh ar breacaist a-nist na bhobhla mòr Chorn Flakes seach am brochan lom. ‘Wow, really Col!?’

Bhiodh eilean a h-òige – muinntir Eòlaigearraidh gu h-àraid – daonnan a’ dèanamh toileachadh ri Màiri Iagain Mhòir is a h-àl fhaicinn bho thill i an toiseach, làn moit, le James, as t-samhradh 1955. Mise an ath duine a rugadh an ’58 is an uair sin dithist nighean àlainn – Celia is Flora – gann mìos a-staigh dha na 60an.

Chan e nach biodh ar càirdean cuideachd a’ cur fàilte air m’ athair, Tom (no ‘Tam’) Quinn, à Pàislig, ach cha leigeadh am beagan làithean dheth aig dràibhear-bhusaichean leis a dhol a Bharraigh a h-uile trup. ‘Blackpool, Mary? Whit aboot Scarborough this year, doll?’

Ach do Mham bha na seachdainean sin a gheibheadh i còmhla ri a pàrantan is a peathraichean, cho buileach prìseil – agus nan dleastanas – dhi. Cha tuigeadh i idir carson a dh’iarradh duine a dhol a dh’àite sam bith eile is airgead nach robh pailt a chosg air. Na dheaghaidh sin, cha robh uair nach putadh an dearbh nighean dhìleas notaichean ann an dòrn a màthar fhèin an oidhche mum falbhamaid – ‘Dìreach airson na cheannaich sibh a bharrachd a luaidh’.

A dh’aindeoin cho tric ’s a bha sinn am Barraigh, cha robh duine againn riamh air feuchainn tarsainn a’ chaolais a dh’Uibhist, no gu dearbha gu h-aon sam bith eile dhe na h-Eileanan an Iar.

Am bliadhna, bhiodh An Claymore a’ tadhal an Colbhasaigh mun gabhadh i a-mach làn dùrachd, fad ceithir uairean an uaireadair sa Chuan Sgìth, a Bhàgh a’ Chaisteil beag beothail. Airson na ciad turais ge-tà, cha bhithinnsa a’ tighinn dhith an sin oir dh’fhanainn oirre, fad uair a thìde eile, gu ruige Loch Baghasdail – port na shuain, chunnaic is thuig mi a-rithist.

Cha bu bhreug idir e nan canainn nach do dh’fhàg beachd bràthair mo mhàthar – mi fhìn ’s e fhèin a bhith còmhla an Uibhist – glan air mo dhòigh mi. Cha b’ e seo an t-àm ceart dhàsan no dhòmhsa, dh’fheuch mi ri a phiuthair bhig raig; cuideachd ’s e ùine car fada a bh’ ann an cola-deug.

Cha b’ e nach bu thoigh leam Ruairidh, oir bha e riamh na uncail a sheall ùidh annam is a bha fialaidh aig co-là-breith is a leithid, ach ’s e fear glè dhèanadach a bh’ ann dheth cuideachd. Bha creideas mòr aig an Dotair RJ MacGillÌosa ann a bhith a’ cur seachad speileagan fada nad shuidhe aig deasg is na choisneadh an t-saothair sin dhut. Sin mar a shoirbhich leis-san anns gach deuchainn a chaidh a chur, no a chuir e fhèin, roimhe na bheatha – is nach robh e fhathast a’ dol gu làidir?

Gun do dh’iarr a bràthair mòr, cliùiteach mo chuideachd-sa airson pàirt dhe locum an Uibhist ’s ann a bha seo mar òrdugh do Mhàiri Iagain Mhòir! ‘Dè eile a bhios tu a’ dèanamh?’ dh’èigh i – ceòl a’ chinn a tuath a-nist na bu nochdte na guth. ‘Cha chuir exams no sgath stad ort a Chailein; an-dràsta co-dhiù no…’

‘Job ma-tà?’ dh’fhaighneachd mi gu socair is mas fhìor le spòrs. Seo ceist a chrìochnaich mi tric dhi o chionn ghoirid; bho thagh mi gun finals na dàrna bliadhna a ghabhail. An ath turas ’s ann a sgreuchainn mo fhreagairt na h-aodann!

’S e an fhìrinn a bh’ aice ge-tà, ach cò dh’iarradh sin aideachadh? Agus bu bheag orm an ‘an-dràsta co-dhiù’ ud aice! ’S e bha seo a’ ciallachadh ach gun robh mi fhìn is Big Ron Weir – mo phrìomh oide – air sgeul a chall air deuchainnean an t-samhraidh; ach le spàirn mhòir – cleas Ruairidh MhicGillÌosa againn cuideachd – dh’fhaodainn feuchainn san Lùnastal: saidhc-eòlas, litreachas na Beurla, eachdraidh na h–Eòrpa bho 1850 – àite glèidhte air èiginn, ma dh’fhaoidte, ann an cùrsa-ceum le urram? ‘Chì sinn a Mham,’ thuirt mi rithe.

Bha taobh sòisealta 1977/78 an Glaschu air a bhith math fhèin is cha d’ rinn mo shaoradh-sa bho uallach ach spionnadh às ùr a chur ris. Le grant math, flat mhòr, shnog do thriùir an Horselethill, is gun mi ro àilgheasach mu bhiadh, deoch no aodach, cha robh adhbhardragh ann. Mar fhear de dìreach mu 8% de dh’Albannaich aois fichead (dh’innseadh Fr. Cairns tric dhuinn) ann am Foglam Àrd-Ìre, ’s ann a bha mi glè fhortanach, ach a-nist, a rèir choltais, ann an cunnart mo chothrom a chall. Carson, mar sin, nach robh an t-eagal orm?

Gu dearbha ’s e glè bheag dhe na buannachdan sin air am b’ eòlach Ruairidh sna 30an. B’ fheudar dha dìreach gabhail ris na bh’ aige, cùmhnadh mar a b’ fheàrr a b’ urrrainn dha, is tòrr mòr obrach a dhèanamh. Mar sin bhiodh a chuid cheistean mì-chofhurtail is mo dhìol agamsa am freagairt.

Do phàrantan nach do dh’fhan san sgoil seach a sia-deug – dhà na bu lugha do Tham Quinn – bha m’ fheadhainn-sa air dòchas gu leòr a chur san dàrna gille. ‘Chan eil fhios nach feuch Cailean againne son Lagh, ged a tha e fhathast a’ smaointinn air toirt a-mach a bhith na thidsear’. Bruidhinn gun dòigh a bha seo! Cuin a thuirt mi riamh gun robh miann agam caob mòr dhem aona bheatha a sgrios air leabhraichean troma no ann a bhith a’ sparradh litreachas ‘ceart’ air cloinn a bha coma?

‘Is chan e idir,’ ors ise, ‘nach dèanadh tu dotair math, nan gabhadh tu nad cheann sin a dhèanamh.’

Bha Aunt Emily – tè chuimir, chiùin, à Peairt a ghabh na ceann agus a rinn an gnìomh air dotaireachd – air bàs cràidhteach fhulang fichead mìos roimhe sin: tiodhlac Nollaig cho grod ’s a bh’ ann!

B’ e seo, mar sin, a’ chiad locum aig m’ uncail o chàradh a leannan san uaigh. Thuige sin, thar mu chòig bliadhna fichead, bha e air fhèin a dheagh stèidheachadh an raon nam proifeiseantach Gàidhealach an Uibhist; còmhlan beag dlùth aig an àm. Bheireadh e mu sheachdain an Eòlaigearraidh – leis agus aig an teaghlach – mun leanadh e air tarsainn a’ chaolais airson ‘holiday’ a bharrachd. ’S ann a’ gabhail àite fear de GPs an eilein a bhiodh e, fad deich latha no mar sin; b’ aithne dha Bill Marr o bha iad còmhla nan dotairean òga deònach an Dùn Dè.

Ged a bhiodh cudrom nach bu bheag air, fad na h-ùine sin, chan ann buileach leis fhèin a bhiodh e. A thaobh nithean èiginneach do lannsair, dh’fhaodadh e sgilean Eric Adams – ex-bogsair à York – iarraidh, ach dhèanadh m’ uncail-sa an còrr, fiù ’s nan rachadh ceàrr an àm do phàiste tighinn chun an t-saoghail. Bha eòlas anaesthetics aige cuideachd is bu mhath gun robh oir bha gu leòr feumach air a bhith air an cur nan cadal rè an t-samhraidh sin fo shùil ghèir Ruairidh.

Am-bliadhna ge-tà, an dèidh dha a dhreuchd a leigeil dheth mar dhotair-teaghlaich ann an Duns, sna Crìochan, b’ urrainn dha mìos slàn a thoirt dha na balaich. Gheibheadh iadsan an ciad làithean-saora cearta ann an ùine glè fhada Agus mise? Dè bhithinn fhìn ris an Uibhist? No, dè bu thoigh leis-san gun dèanainn? Beagan coiseachd is iasgaich bha fhios; còmhradh no èisteachd ris fhèin is gun cus òl ma bha Ruairidh gu bhith air call a latha is a dh’oidhche.

Dh’aontaich mi, mar sin, a dhol ann; ’son seachdain an toiseach. Dh’fhaodainn fuireach na b’ fhaide, nan tograinn; nam biodh a h-uile sgath rèidh eatarainn.

Cha robh mo ‘phassage’ ach mòran ’s an àbhaist – na h-uairean a bharrachd doirbh an lìonadh, is gun leabhar deusant agam gus sin a chuideachadh. Bha a’ mhuir glas is stuaghach – is sinn a’ dèanamh leum gu leòr oirre – ged nach deach ar n-àrainn idir cho troimhe-a-chèile is a bha mi air fhiosrachadh reimhid.

Shleamhnaich paidh làn geir is tiops fhuara sìos mo shlugan an Caol Mhuile, is gu fàbharach, dh’fhan iad gu modhail far an robh iad fad a’ chòrr dhen turas. Ma dh’aithnich cuid dhe na bha a’ siubhal an latha ud mi cha do bhodraig duine sin a leigeil fhaicinn no hallò a ràdh.

Tha deagh chuimhn a’m ge-tà air bòrd sa bhàr mun robh deannan cruinn – fhathast sunndach an dèidh fèill-chruidh an Òbain. ’S ann a’ sìor chur dragh, a bha iad, air duo le giotàran a dhiùlt òrain Ghàidhlig dhaibh. ’S e seinn shnog, mhilis, a bh’ aig an fhear a b’ òige dhiubh is thug e tionndadh togarrach dhuinn air ‘Yesterday’ – ris an do chùm a charaid taic. Cha b’ fhada gun do dh’fhàs na gillean sgìth dhe na gòthan faoine seo; thill iad an ionnsramaidean dhan ceusaichean cruaidhe, chuir iad umpa còtaichean-dufail is a-mach leotha dhan deic. Chaidh mi seachad orra nuair a bha sinn a’ tighinn dlùth air Miùghlaidh – a’ chuairt-ghràidh ud ann fhathast gun a gabhail bho bha Catrìona cho mòr mu deidhinn, eadar pògan, air an latha a thionndaidh mi ochd-deug.

’S ann a bha Ruairidh romham air a’ chidhe mar a thuirt e agus cho fad ’s a chithinn cha robh an uair anmoch, mu dhà uair sa mhadainn, idir na dragh dha. ‘Theab mi duine a chur thugad nam àite,’ ors esan le gàire, ‘ach bhuail Anna bheag oirre gu math is tha an còigeamh mac aice a-nist ’son glaodhaich do dh’Alba.’

Chaidh ‘We’re on the march with Ally’s army!’ – òran eile nach seinneadh paidhir an aiseig – a chlàradh grunn sheachdainean roimhe sin le Andy Cameron. Gheall an cleasaiche, le cinnt is misneachd, gun treòraicheadh Ally MacLeòid gu buaidh sinn aig Cuach na Cruinne san ‘Argentine’. Bha a’ chiad ghèam aig Alba an aghaidh Pheru fhathast deich latha air falbh.

‘Do bheatha dhan dùthaich a Chailein!’ faclan m’ uncail – is e a’ fosgladh na MG bhig shnasail aige. ‘Preusant ùr dhomh fhìn,’ chuir e ris, is e a’ gabhail a leisgeil cha mhòr. ‘Bha mi riamh airson fear fhaotainn. Ach le teaghlach is… well, cha robh e freagarrach. ’S ann a tha an suspension fada nas fheàrr na shaoileadh tu – nì e an gnothach air cuid dhe na rathaidean as miosa an seo. Cha do dh’fhàs do ghruag sgath na bu ghiorra!’ thuirt e an uair sin le fiamh ait a fhreagair mise le a bhith a’ sguabadh dual no dhà air cùl mo chluasan – ‘like a wee lassie’ chanadh m’ athair fhìn air droch latha. ‘Ach ’s coma,’ orsa Ruairidh, ‘is dè an cor a th’ air a h-uile duine?’

Chaidh naidheachdan a-null is a-nall mun teaghlach fhad ’s a dhràibh Ruairidh sinn a Chrois Dhalabroig an toiseach, mun do thionndaidh e chun na làimhe deise air prìomh rathad an eilein. Chuala mi gun robh a dhithist nighean a-nist an Sasainn. Gu Bristol a chaidh Iona nuair a cheumnaich i, mar a h-athair, bho Chill Rìmhinn – ach le Honours Maths – bha fhios a’m air a sin. Cha b’ fhada, ge-tà, bho ghluais Claire cuideachd – agus a’ chiad ogha acasan – gu Lunnainn ’son obair Ed.

Thuig mi gum b’ ann le Aunt Emily a bha cuid mhath dhen ‘acasan’ seo aig Ruairidh, ged nach tug e tarraing idir air a bhean nach maireann an oidhche sin. Cha tug na mise. An aon rud eile a chuir esan ris ’s e gun robh Ed Canning laghach, onarach, agus na dheagh chèile dham chousin.

‘Taigh car annasach a fhuair Bill dhomh am-bliadhna, a Chailein,’ ors esan is a’ ghealach a’ leagail a lainnir shèimh air Tìr a’ Mhurain dhuinn. ‘Ann an Eòrasdail – pìos o Chnoc Fraoich – ach chan eil àite sam bith ro fhada air falbh leis a’ chàr bheag luath seo.’

Dh’inns mi dham uncail a-rithist cho beag eòlais ’s a bh’ agam air Uibhist; dìreach mar a rinn mi nuair a dh’fhòn e ’son dèanamh cinnteach cò an latha air am bithinn a’ siubhal is uair a’ bhàta.

‘Seadh, seadh,’ ors esan, ‘Cha robh mi fhìn an seo ach aon turas riamh mun do thòisich mi dèanamh locums –’s fhada is cian on uair sin ’ille. Tha mi a-nist glè eòlach ann – an Ceann a Deas gu h-àraid – nas fheàrr na tha mi am Barraigh an-diugh, thèid mi an urras. An robh thu riamh an Eòrasdail ann am Bhatarsaigh’

‘Cha robh ma-tà,’ dh’aidich mi.

‘Àite dìreach eireachdail a Chailein. ’S ann aig banais a bha mise ann. Bòcain a th’ ann air fad a-nist. Seall cho brèagha is a tha na rionnagan – chan eil gin nach fhaic thu.’

Dh’fheumadh dotair air eilean mar seo, mhìnich m’ uncail an uair sin dhomh – is mòran dhe na seann daoine fhathast gun an còmhdhail fhèin – tadhal am barrachd dhachannan an taca ri na GPs air tìr-mòr, fiù ’s an sgìre dhùthchail leithid Dhuns. Gu tric bha taighean nan daoine suidhichte sgrìob mhath on rathad mhòr is bhiodh riasladh gu leòr ann an lorg, gu h-àraid an dubh na h-oidhche. Sa bhitheantas, ge-tà, ’s e treubh tapaidh a bha sna h-Uibhistich a sheasadh ri tòrr is nach iarradh dotair mura robh iad buileach riatanach air fear – ro thric ga fhàgail ro anmoch.

‘Is dè tha thu fhèin ris na làithean seo a Chailein?’ dh’fhaighneachd e. ‘Arts degree – an e? Is às deaghaidh sin, dè?’

‘Bu thoigh le Mam Lagh no teagasg?’

‘Ach dè bu thoigh leatsa?’

‘Chan eil mi cinnteach.’

‘’N d’ rinn thu sgath Gàidhlig riamh?’

Chrath mi mo cheann. ‘Tha i air fàs car lapach. Cha b’ urrainn dhomh a gabhail san sgoil is…’

‘Cha b’ urrainn gu dearbha. Chan eil diù mhòr aig na Jesuits dhen chultar againne; eachdraidh phròiseil na Ròimhe no bàrdachd dhrabasta Ghrèigeach,’s ann a bhiodh iad sin taghta leotha!’ Shioft e sìos gìdhear is ghabh e seachad le srann air bhan shocair a bha air tarraing a-staigh dha. ‘Ach tha Laideann agad?’

‘O-Grade dìreach, cha robh…’

‘Is dòcha gum b’ fhiach dhutsa coinneachadh ri Professor John Boyd, seann phal à Cille Chuimein. Às Bruairnis a bha athair – a phòs an aon chaileag aig bancair a’ Chaoil! Tha na sgoilearan Ceilteach daonnan airson oileanaich fhaicinn a tha beagan diofraichte. ’S e Seonaidh a-nist a tha os cionn na roinne. Tha sinn air a bhith a’ sgrìobhadh gu chèile fad greis mun obair agam fhìn an Uibhist – fhios agad na daoine a tha mi an dèidh ’s a bhith a’ reacòrdadh? Bha mi an dòchas gun còrdadh e riut fhèin beagan cuideachaidh a thoirt dhomh. ’S ann air an eilean seo a chluinnear cuid dhe na seinneadairean as fheàrr a th’ ann a Chailein.’

Thug mi sùil air bràthair mo mhàthar is sinn a’ tionndadh an iar a-staigh a rathad Eòrasdail – fear de bhailtean fada a’ mhachaire. Dè an cuideachadh dòigheil a b’ urrainn dhòmhsa a thoirt dhàsan mu bheul-aithris? Nam feumainn, rachadh agam, is dòcha, air na daoine againn am Barraigh a shloinneadh air ais ginealach no dhà; ach seach sin, bhiodh e pailt cho math do Ruairidh mo chàradh air dìollaid Chopper bike is mac-na-dunach a phutadh le bruthach cas.

Ach bha an cuspair seo air m’ uncail a bheò-ghlacadh. ‘Agus, a bheil fhios agad air a seo, a Chailein, tha grunn ann fhathast a dh’innseas sgeulachdan an seo – feadhainn fìor ealanta – ged a dh’fheumas tu a bhith gan tutanadh.’

‘Really a Ruairidh?’ mo fhreagairt dha. ‘Nach eil sin math.’

Ged a bha an t-adhar cho dubh ris a’ ghual chithinn, ri solais a’ chàir bhig spòirs, gur ann an àite meadhanach mòr a bhiomaid a’ fuireach: seann taigh-tuathanais squeadhair, na sheasamh aig fìor cheann-a-staigh a’ bhaile. A rèir Ruairidh ’s ann leis a’ mhanaidsear a bha an fhàrdach seo, mun do bhristeadh an tac na croitean le Lady Cathcart. Chaidh cuid dhe na togalaichean bhuaithe mun do leagadh iad – a’ chlach ga cur an-sàs sna taighean ùra. Shàbhaileadh am fear seo ge-tà ged a bha e car feumach air a thoirt gu ìre na linne san robh sinn beò.

Air a’ chiad sealladh, choltaichinn-sa mo rùm an Taigh Eòrasdail ris an t-seòmar-suidhe againn ann an Glaschu: lobhta àrd air is obair shnasail mu na h-oirean – seadh, farsaingeachd seach am bogsa beag donn san robh mi fad m’ òige an Grianaig. Ged a gheibhinn fàileadh na fuarachd ann, air adhbhar air choreigin cha robh sin gun tlachd. Theann mi air dràthraichean troma – air an lìnigeadh le pàipear ruadh – a shlaodadh is dh’fhosgail mi preasa a sgap samh a’ champair sa mhionaid uarach; dhùin mi an doras sin gun m’ aodach a chrochadh ann.

Dh’obraich mi a-mach gum b’ urrainn dhomh an dà uinneig a thogail gun strì is gun cumadh na clipichean raga iad gun tuiteam. Rinn mi sogan cuideachd ri leabaidh a chaidh a bhlàthachadh romham le parsail bhreigichean ann am plaide thiugh. Agus ’s i bha tòiseil, an dèidh mo thurais, a dh’aindeoin cnapan a’ bhobhstair.

Air stòl beag fon lampa lorg mi truinnsear air an robh ceithir briosgaidean le càise orra is deoch bhainne. Thug an t-suipear bheag gun lochd seo cuireadh is cead dhomh a gabhail gun m’ fhiaclan a ghlanadh, ach air sgàth ciont no cleachdaidh – agus mo dhileig – fhuair mi mi fhìn a’ dèanamh gròbladh sìos an trannsa mu chòig uairean sa mhadainn.

’S ann aig cùl an togalaich a bha an taigh-beag, ann am poirds le mullach-iarainn air. ’S fheudar gun deach am pàirt seo a chur ris anns an fhichead bliadhna mu dheireadh; aig àm, ’s dòcha, nuair nach robh e ceart tuilleadh poitean mòra fhalmhachadh dhan bhallan air beulaibh na stòbha, no a bhith dol nad chrùban fo sgrùdadh nam mart sa bhàthaich.

An oidhche ud, rinn suids an t-solais – nach robh idir mu àirde na guailne no air sreing thiugh – an gnothach buileach orm. ’S mi bha taingeil, an ceann greis, nuair a leig sgoltadh san adhar le gath no dhà èaladh tron lòsan dhustach a-null chun a’ bhobhla. Shuidh mi sa bhad is ghabh bolt-deighe suas mo dhruim gun truas.

Ged nach robh ann ach an aon tap san t-sinc dhomhainn, chithinn a-nist pìob chaol an uisge theith a’ falbh às tanca beag crochte os cionn na mìse. Dh’fhaodadh an treat sin feitheamh gu a-rithist! Bha an tap fuar car teann is rinn e splutraich is brùchdadh, fad mu leth-mhionaid, mun do dheònaich e a chuid uisge dorcha a leigeil air lamhan làn siabainn.

An dèidh dhomh an tiormachadh, nam leth-shuain, thuig mi gun do dh’fhàg mi an Colgate (Mint Fresh!) san rùm-chadail. Ma bha feum sam bith aig Ruairidh air stuth dhen t-seòrsa chan fhaicinn-sa sgeul air sgath. ’S cinnteach gun dèanadh sgoladh beag às aonais an gnothach a-nochd, nach dèanadh? ’S ann am meadhan deagh ghurgail a bha mi nuair a dh’fhairich mi an gluasad gràineil air m’ òrdagan beaga; tachas diogalach a’ sìor thighinn nas giorra dham adhbrann cnàmhach is fuaim mar sgròbadh air an lìono shleamhainn.

Chluinnte mo sgread – dhearbh Ruairidh le braoisgeil aig breacaist – air Cliseam Na Hearadh!

Cha robh teagamh, thuirt e, nach biodh luchainn – feadhainn mhòra cuideachd – agus rodain ann an seann taigh-tuathanais mar seo. Nach iomadh rathad a-steach a bh’ aca siud uile! Chaitheadh e sìos strapaichean làidir iarainn dhaibh – is orra sin cnap math dhen Stilton a chòrd ri a shùil-san san deli am Melrose. Dh’fheumadh seo casg, ge-tà, a chur ormsa bho a bhith a’ falbh cas-rùisgte tron taigh; no bhiodh mac a pheathar gaolaich a’ tilleadh dhachaigh air m’ fhìor-dhroch leòn mun chois.

’S e gliong nan sgeinean is nam forcaichean a rinn mo dhùsgadh mu dheireadh thall. Ged nach bu dùraig dhomh mo shùilean fhosgladh, is a’ chluasag cho blàth, chithinn spàinean-tì beaga gan càradh, le faicill san àite cheart, air sàsairean ri taobh chupannan snoga geala agus tost air lof-phlèin ga chur am meadhan a’ bhùird. Chaidh na deilbh seo – a bhuineadh, ’s cinnteach, do dh’iomadh latha an Grianaig is am Barraigh – aiseag gu sùghmhor gu m’ rùm an Uibhist an cois cùbhraidheachd na hama is nan uighean ùra.

Dh’inns fonn aotrom ceòlmhor dhomh nach b’ e Ruairidh, no gu dearbha fireannach sam bith, a bha an urra ri lòn na ciad-mhaidne an Taigh Eòrasdail.

‘Dh’èirich thu ma-thà!’ mhaoidh boireannach mun an dà-fhichead, air an robh, fo a h-aparan, blobhsa gun phàtran agus sgiorta dhonn. ’S e coltas tè dhen fheadhainn chaol ud làn lùiths a bh’ oirre le gean blàth air a h-aodann.

‘Dh’èirich!’ dh’aidich mi. Rinn mi barrachd na sin; leum mi aiste agus gu cabhagach chuir mi umam mo chuid aodaich.

‘Is mise Ealasaid,’ ors ise, is i a’ suathadh a làimhe gu math air a pinidh, mun do shìn i thugam gu ceart i. ‘Cailean, ’n e?’

‘Yea, ’s e.’ Ghabh mi grèim oirre. Dè a-nist? Pòg air gach gruaidh? Cudail mhòr a’ mhathain? Cha do charaich mi.

‘’S fhada o dh’fhalbh d’ uncail,’ ors Ealasaid, cho moiteil ri cù. ‘Mocheirigh a rinn am fear ud gus freastal air feadhainn bhochda. Ith!’ dh’òrdanaich i, a’ sadail còig sliseagan hama is trì uighean, às an aon phraidhpan, air mo thruinnsear.

Thòisich Annag Bheag – ‘a bhuail oirre gu math’ – air sileadh na fala aig 0530; mun àm a chaidil mise, fo shiotaichean teanna is plaide ghoirt ach sàbhailte bho chèilidh gach rodain bhig no mhòir.

Bha Ealasaid Iain Alasdair – mar a shloinnteadh gu ceart i – ro eòlach air a bhith a’ biathadh nam fear. ‘Bràithrean gu leòr agamsa a Chailein. ’N t-acras orra fad an t-siubhail, a h-uile mac h-aon aca!’

Fad mu cheithir bliadhna bha i cuideachd air a bhith na ‘bean-taighe’ dha na Crìosdaidhean lighichean a bheireadh greis-tàimh do Mharr is Adams, an fheadhainn shingilte gu h-àraid. Dh’iarradh dìcheall nan dotairean sin – is iad rin gairm a latha is a dh’oidhche – a dheagh neartachadh; b’ aithne do Ealasaid gu leòr mu neartachadh.

’S ann ri iasgach a bha a bràithrean uile, mhìnich i. ‘Aig na prawns a-rithist o chionn dà mhìos. Fhuair mi iad sin seachad an toiseach is an uair sin dhràibh mi sìos. Saoghal dhaoine o nach robh mise a’ tadhal san taigh seo; cha b’ fhuilear dha beagan obrach air ge-tà – a-staigh agus a-muigh. Bha an seann phost-office fada fada na bu fhreagarraiche. Is dè an obair a nì thusa a Chailein?’

Teags eile, bu choltach, ga thoirt air mo staid dhìomhain! Rud fìor cheàrr, bu choltach, an làthair a’ bhoireannaich seo: ’s mi a’ faicinn is a’ blasadh a cuid spionnaidh; mo cheann làn ìomhaighean dhe a fir threuna ri spàirn san fhairge nan sgothan beaga. Chuir tuigse air mar a thill Ruairidh a-mach a dh’obair – gun e air uair a thìde cadail fhaighinn – gu mòr rim iomagain. Dè bha mi a’ dol a dhèanamh ann an Uibhist a Deas agus fad a’ chòrr dhem bheatha?

‘’N eil fhios a’m,’ fhreagair mi. ‘Chan eil mi buileach cinnteach fhathast, Ealasaid. Feuchaidh mi ri cuideachadh ann an dòigh air choreigin, tha fhios, dh’fhaodainn…’

Dh’fhosgail an doras le brag is thàinig Ruairidh a-staigh, màileid dhonn Ghladstone na làimh, cnota snog aig a’ cholair na shuidhe ann am ‘V’ a gheansaidh uaine.

‘Tha an gille seo air tighinn a dh’Uibhist airson obair a dhèanamh!’ chaidh innse dha. ‘Ach an toiseach, breacaist dhuibhse. Is tha Anna gu math a-nist a bheil?’

Rinn na b’ urrainn do Ruairidh innse air Anna – gun cus idir a ràdh – feum dhi: ’s e Ealasaid nighean antaidh an duine aice agus ’s ise a fhuair brath an toiseach nuair a theann an dòrtadh. Thug Ealasaid Iain Alasdair – ‘a bha cho ceangailte ri na dotairean’ – air Anna bhochd fònadh sa bhad is gun rud cunnartach mar chall-fala fhàgail sgath na b’ fhaide. Bhiodh a cridhe truasail agus a Mini Clubman a’ dèanamh oirre cho luath ’s a bhiodh am frithealadh seo ullamh.

Aocoltach ris a’ mhòr-chuid an Alba aig an àm, cha robh surgery cunbhalach aca tuilleadh an Loch Baghasdail madainn Disathairne – rud a dh’iarr Bill Marr mun dealaicheadh e ri a cheathrar chompanach am Broughty Ferry ann an 1970.

‘Nonsense!’ bha e air cur sìos sgòrnain na feadhainn a shaoil gun robh leithid a sheirbheis riatanach no reusanta. ‘If they’re genuinely ill, they’ll soon find us and us them.’ Ghabh Mr Adams ri seo gun ghearan.

Mar thoradh air a sin bha dorsan Cnoc Fraoich Medical Centre fosgailte feasgar Dihaoine gu leth-uair an dèidh seachd. B’ fheàrr le Ruairidh – aig an robh latha trang agus a dh’obraich gach dàrna Disathairne dhe a bheatha – nach robh an clionaig anmoch seo idir ann.

Thòisich cùisean, dh’inns e dhomh, le na rudan àbhaisteach: casadaich, cnatan, cluasan goirte, ach an uair sin nochd tè mun an trì fichead, Norma. Air dhreach na cailce a bha a gnùis agus ’s e buidhe salach nam fags an aon dath a bh’ air a làmhan. ’S ann na suidhe a’ feitheamh a bha i, eadar dithist bhoireannach na b’ òige – nigheanan leatha shaoil Ruairidh – nach robh a chridhe aca tighinn a-staigh do sheòmar an dotair.

Cha tuirt m’ uncail sgath rium mu sgeul Norma no mu na fhuair e fhèin ceàrr oirre, ach chithinn-sa on chrathadh-cinn is gum biomaid a’ tadhal aice an-diugh fhathast gun robh dragh nach bu bheag air a-nist mu a deidhinn.

‘Dè an còrr a nì thu an-diugh, a Chailein, mura tig thu a-mach còmhla riumsa!’ na bh’ aige dhomh sa mhionaid a chuir mi a’ cheist sin air na bu tràithe. ‘Còrdaidh an gnothach riut agus riumsa. Seo a-nist tè nach fhaca dotair ann an deich bliadhna fichead. Not even for a Blood Pressure. Dhia, a laochain, b’ fheàrr leamsa gum faca.’

’S dòcha nan robh Ruairidh air mìos a thoirt ann an Uibhist roimhe seo gum biodh sin air tachairt; oir bha daoine deònach – dh’ionnsaich mi – bruidhinn air rudan ri dotairean ùra is sagairt ùra agus nephews ùra a bha iad air an càrnadh, gun sùil a thoirt orra, fad nam bliadhnachan mòra.

’S ann mu dhà mhìle deas oirnn a bha am baile san robh am boireannach seo, Norma, a’ fuireach agus glè fhaisg air a’ chuan; thug an càr beag sgiobalta ann sinn gun strì sam bith. ’S e taigh dorcha gun loinn air a bh’ aice is e follaiseach gun robh a chuid bhallachan is a mhullach glè fheumach air sealltainn riutha. ’S dòcha san aon dòigh ’s an do shuidh ise eadar a dà nighinn an Loch Baghasdail, bha dà bhungalow ùr a’ dèanamh geàird an-diugh air prìomh stèidh an teaghlaich.

Chithinn grunn innealan meirgeach ann is closnach seann Hillman Imp air bàrr bhlocaichean; iad seo cha mhòr uile na bha a’ sgeadachadh a’ bhlàir timcheall an taighe ach am feur fada ribeagach.

Dh’fhosgail dorsan nan taighean ùra cho luath ’s a stad càr Ruairidh le sgreuch beag. Nochd na boireannaich òga, scarfaichean mun cinn, a-mach asta is thàinig iad a-nall nan ruith gar n-ionnsaigh.

Leis gun robh i fhathast na turadh roghnaich mise fuireach aig an MG. Dhiùlt is dh’ath-dhiùlt mi cupa tì no grèim beag a dh’ithinn, fiù ’s ‘rud nach dèanadh cron air duine’. Ach rinn dà chù collie le sùilean donna brònach guidhe rium nach gabhadh seachnadh cho furasta. ’S e ball leathair fliuch, flat, a bh’ aca agus cop mum beul. Ghabh mi rin gèam le fead chruaidh is rinn mi feum dhen doras a b’ fheàrr dhen Imp airson a’ ghloidhc rud a bhreabadh sear is siar dhaibh.

Nuair a thill Ruairidh mu dheireadh thall, leum Bobby is Glen air is iad an làn-dùil gun teannadh esan air a’ chleas mhìorbhailteach ris an do chuir mise cùl cho tràth. Ach ged a rinn m’ uncail an clàparan is ged a bhruidhinn e riutha mar fhìor sheann charaid, cha do chluic e idir.

Chuir àileadh an uisge-bheatha agus greis de shàmchair eatarainn air an rathad dhachaigh an-fhois is beagan òrrais orm. Càit idir am bu chòir a’ chrìoch a bhith eadar na bha pearsanta is proifeiseanta? Dè am modh ris an robhar cleachdte an seo o dhotair?

Lùghdaich tòrradh tiamhaidh Norma air an ath Dihaoine cuid dhen eagal sin.

2

’S ANN A’ FALBH thaighean a bha sinn a-rithist (is bha e a’ còrdadh rium); an dèidh do Ruairidh na nochd aig Cnoc Fraoich fhaicinn is a stiùireadh air cùrsa na b’ fhalainne – nan gabhadh sin dèanamh.

’S e an ath duine aige: fear a bha air a chas a ghlacadh ann am bailer is a theab a call. Mar a rinn Dia cha deach cron Chaluim na bu mhiosa na bristeadh glan air an do shuain Eric Adams pleastair blàth geal a chaidh a ghearradh dhith am meadhan a’ Chèitein. ’S e a’ cheist a bh’ ann an-diugh: am faodadh leannrachadh a bhith air tighinn air a’ chraiceann? Nan robh, ’s dòcha gum biodh aig Ruairidh ri penicillin no a leithid a thoirt dha.

‘OK, a Chailein,’ ors esan rium, a’ chiad Diluain, ‘cha dèan na riaghailtean àbhaisteach a-thaobh confidentiality cus feum ma tha thusa a’ dol a chur eòlas ceart air muinntir Uibhist. Seallaidh e cuideachd dhut beagan dhe na tha an sàs san obair seo. Cha tu a’ chiad fhear riamh a smaoinich air gluasad bho Arts gu Dotaireachd.’ Aha, smaoinich mise, an e seo idir plàna m’ uncail – no gu dearbha plàna mo mhàthar – bhon toiseach? Mas e, ’s ann a bhiodh e air a bhith caran snog nan robh duine aca air mionaid fhaotainn bruidhinn riumsa mu dheidhinn. Mura robh cuimhne aca?

Chuir mi fiaradh nam cheann is thug mi an aire do bhò dhubh a’ togail a h-earbaill am meadhan ùtraid a’ bhaile – Tobha Mòr, saoilidh mi. Leig an tè bhreac throm, air a cùlaibh, a cudrom air a’ chèic mhòir theith is theab i falbh na spleangannan dhan dìg.

‘Of course, iarraidh mi an cead a h-uile turas,’ thuirt Ruairidh, ‘mar a bhios mi a’ dèanamh le na medical students, is ma chì mi gu bheil sgath ann a tha, car, eh… sensitive – faodaidh tu cluic leis na coin.’ Thug seo gàire air. ‘No leis a’ chloinn? Ach tha na daoine ann a sheo taghta. Glè bheag a chuireas dragh orrasan.’

Theireadh cuid gum biodh Calum Mòr air chomas Cnoc Fraoich a ruighinn – is a chnàimh a-nist slàn – ach ’s ann aig ceann rathaid chaoil ghairbh, mu mhìle far na h-ùtraid (is grunn mhìltean tuath air crìch oifigeil a’ Phractice) a bha e a’ fuireach, gun chàr no dràibheadh aige. Cha b’ esan a dh’fhòn a dh’iarraidh dotair; cha robh fòn aige is bhiodh e air a bhith ceart coma na shuidhe an sin gun tigeadh iongar is at air a lurgann seach dragh a chur air duine, no gu dearbha dragh a ghabhail mu a shlàinte.

Gu fortanach, chan fhaiceadh Ruairidh droch comharra sam bith air – ‘mild inflammation only’ – agus chuir e Calum còir far liosta na feadhainn air am bite a’ tadhal a-rithist.

Mhuthaich mi gun robh tòrr gaoisid air fàs mu aodann an fhir seo is gun robh i sin mòran na bu ghlaise na an ceann dubh cìrte agus a chiabhagan dosach. Chithinn cuideachd dealbh seacte de dh’Elvis Presley ann an Las Vegas na shuidhe air bàrr dreasair làn smodail. A dh’aindeoin annais cha ghabhainn orm creidsinn gur i a mhàthair – creutair cruinn le sùilean boillsgeach – bu mhotha a bha a’ toirt a dìlseachd dhan ‘Rìgh’. ‘Love me tender.RIP’ sgrìobhte ann an ionc liath cam tarsainn bonn a’ phostair. Bha bruidhinn Chaluim tiugh ach fialaidh is chuir e dà choineanach shnog ann am poca agus a chuid spòirs nan cois. ‘Bheir iad seo rudeigin do dh’Ealasaid a nì i. Agus chòrd ur cèilidh gu mòr ri mac Sheumais Bhig is Seonag.’

’S ann a’ bruidhinn air feasgar a chuir Ruairidh seachad còmhla ri cupal an Cille Pheadair a bha e. Chaidh aig m’ uncail air dà sgeulachd is trì òrain a chlàradh bhuapa air a reel-to-reel mhòr Uher. Dh’fhuirich mise air ais an Eòrasdail ach an dèanainn beagan leughaidh is smaointeachaidh; rud a chuir Ealasaid bacail gu leòr air.

’S ann a bha Ruairidh glè riaraichte an naidheachd seo fhaighinn: daoine fìor ghasta a bh’ ann an Iain Dòmhnallach is a bhean Seonag. ‘Agus,’ thuirt e, ‘bha e fhèin ag ràdh rium gun robh athair-san làn sgeulachdan is nach eil cuimhn’ aige fhèin ach air a’ bheag dhiubh. Shaoil mise gun robh e cho math orra. Am bi an duine sin 85 fhathast ma-tà?’

‘Bidh ann an ùine glè ghoirid a Dhotair. Air an latha a chuipeas Holland na h-Albannaich sa World Cup. Ach chan eil Iain leth cho math ri a bhràthair mòr.’

‘Cò?’

‘Alasdair.’

‘A bhràthair mòr, thuirt sibh?

‘Well, ’s e, a rèir aoise.’ Bha seo a’ còrdadh glan ri Calum Raghnaill – a mhion-eòlas air cùisean a shealltainn dhuinn. ‘Bidh esan a-nist mu chòig òirlich nas lugha na Iain, ach cho geur na inntinn ri snàthaid an deagh thàilleir.’

‘Seadh,’ rinn Ruairidh cinnteach. ‘Alasdair Sheumais Bhig, an e?

‘’S e Alasdair mac Sheumais Bhig a chanas sinne ris.’

‘Agus càit a bheil esan a’ fuireach ma-tà?’ Chithinn gun robh ùidh Ruairidh air a bioradh – mar ghille beag ro dhèideig ùir.

‘Bidh sibh air cluinntinn mu Fin McCool – MacCumhaill, tha fhios?’ Lean Calum air, gun feairt a thoirt air a’ cheist. ‘Tha grunn dhe na sgeulachdan sin aige. Bha iad uile aig athair agus feadhainn mhath mu thaibhsean is manaidhean – a chuireadh eagal do bhàis ort!’ Ri seo leig e sgal-gàire cruaidh on chom.

‘Mar sin, a bheil esan an Cille Pheadair cuideachd?’ phut Ruairidh. ‘Dh’fhaodamaid stad aige – faighneachd dheth ach ciamar a tha e a’ cumail?’

‘Dh’fhaodadh sibh sin,’ fhreagair Calum, is ghnog e an ceann dubh ud luma-làn dhe a ghliocas fhèin. ‘Ach chan fhaigh sibh faisg a’ mhìle air. Is cha mhotha a dh’innseas e sìon dhuibh. Cha bhi e fhèin is a bhràthair a’ bruidhinn. Mar sin na bodraigaibh dragh a chur air Iain. Ma bhruicheas Ealasaid na coineanaich sin a-nochd dhuibh, cumaidh iad a’ dol sibh gum faigh sibh ur breacaist Diluain.’

Le sin, thill Calum a-staigh gu a chas lag a thogail is cluas a thoirt dhan news. Cha fhaicinn-sa aerial mun t-simileir no cumadh TV a bharrachd am falach air cùl cùirteir no san rùm-suidhe. Neo-ar-thaing nach robh pàipearan am pailteas aige ge-tà – ’s ann a bha an t-àite a’ cur fairis leotha – agus wireless Bakelite air a shuidheachadh, le innleachd, san uinneig.

‘Dè an t-eòlas a tha agadsa air Fin McCool, a Chailein?’ dh’fhaigneachd Ruairidh, is sinn a’ critheadaich eadar an rathad corrach greabhail ud is ribean-teàrr’ a’ bhaile; cha robh sgeul air Moire Mhàthair, chunnaic mi, na tèarmann beag concreit tarsainn bhuainn, ged a bha flùraichean ùra ga feitheamh ann. ‘Feumaidh,’ orsa m’ uncail, a’ coimhead an taobh a bu chòir dhi a bhith, ‘gu bheil gèil’ mòr à tuath air an rathad, sin no tha i air a dhol a chèilidh air cuideigin. Am bi thusa fhathast dol dhan Aifhrinn led thoil fhèin a Chailein?’

Chaidh mi innte còmhla ris fhèin am Bòrnais, a’ chiad Didòmhnaich, agus an uair sin an Gearradh na Mòna airson tòrradh Norma.

‘Co-dhiù,’ thuirt e, a’ cur stad grad air a’ chuspair sin, ‘’s e ceatharnach cruaidh Ceilteach a bh’ ann am Fionn MacCumhaill bhos an seo agus an Èirinn. Bhiodh esan is a sheat, An Fhèinn no Na Fiantaichean, gam faighinn fhèin ann an deagh thòrr shabaidean; gu tric an aghaidh nan Lochlannach. Agus ’s e Fionn a bha air ceann na buidhne – coltach ri Gary Glitter, ach ann an dòigh fada nas macho is nas medieval!’

Leig mi cnead. Cùis-bhùirt a bha sa bhlabhdair ud. Cha bu thoigh leam riamh glam-rock is bha e a’ còrdadh rium a-nist gun robh a rionnag air cuid mhath dhe a gleans truagh a chall. Aig an àm sin, ’s e an leithid Queen is gaisgich Led Zeppelin air an robh dèidh agamsa – bha ‘Whole Lotta Love’ air a bhith aig Top of the Pops mar shuaicheantas fad bhliadhnachan.

‘Cha chuala mi guth riamh aig Mam air Mr McCool,’ thuirt mi, ‘’s ann a tha i fhèin glè mhath gu sgeulachdan innse, na dòigh fhèin – rudan a chuala i no a thachair do dhaoine, math is dona.’

‘Dearbha fhèine tha!’ ors a bràthair-se. ‘Ach fhios agad air a seo ’ille, na seann sgeòil sin, cleas feadhainn na Fèinne, bha cus dhiubh air falbh am Barraigh, fiù ’s nar n-òige! Rinn Màiri glè mhath cuideachd Gàidhlig a chumail ribhse an Grianaig. Bu chòir dhut a bruidhinn nas trice, a Chailein.’ Thionndaidh e is sheall e orm – fad deagh ghreis, shaoil mi, do dh’fhear a bha a’ dràibheadh càr air rathad cumhang! Choinnich mi a shùilean is an uair sin choimhead mi bhuam. ‘Cha do smaointich mise idir air nuair a bha a’ chlann òg. Tha Claire keen gu leòr a togail ach le pàiste beag an Sasainn cha bhi e…’

‘Furasta dhi.’ Thug mi dha. ‘No dhuinne – dhuibhse, ma-thà, a Ruairidh – sgath mun Fhèinn a thogail bho Alasdair mac Sheumais Bhig.’

‘Chì sinn.’ fhreagair esan, ach an toiseach feumaidh sinn fhaighinn.’

Bha sinn an cridhe nam Meadhanan, is an dèidh an treas cattle-grid, stad Ruairidh gu h-obann aig taigh snog geal, air ùr-pheantadh, le cruaich ghrinn ghnìomhte togte deas air a sin. A rèir cruth nan cearc bha iad sin a cheart cho rianail. Dh’fhiosraich mi san dachaigh sin – is gu dearbha cha b’ e an aon turas tron t-samhradh ud – mar a bhiodh m’ uncail a’ cur an sàs ealain a chiùird.

’S e còmhradh blàth a b’ iomchaidh an toiseach: bruidhinn a-null is a-nall mun teaghlach is tarraing bheag laghach às bean an taighe mu cho math ’s a ghlèidh i maise a h-òige – gu dè idir an secret a bh’ aice! Chaidh sùim an uair sin a shealltainn sa chroit – na beathaichean gu h-àraid is na ghabhadh fàs is buain dhaibh air a’ mhachaire. Robh silage gu bhith na crois no na cuideachadh agus dè a’ bhuaidh a bhiodh aig sin, air a’ cheann thall, air cosgaisean?

Dòmhnall a’ Chìobair agus Peigi Ruadh: daoine uasal – nan suidhe gu stòlda an sin, am mac òg bàite a’ sealltainn oirnn às frèam beag airgid air a’ chagailte. Agus air a’ bhalla mu choinneimh-san, a’ cumail gràdh ri am bràthair ciùin, dà bhean-bhainnse is blìon orra len dithist fhear diùid.

Ghabh Peigi òran aighearach snog aig deireadh consultation anns nach deach làmh a chur oirre. Dh’inns i ge-tà do Ruairidh gun robh na pilichean ùra a’ toirt cadal dhi gun uimhir a bhruadaran.

Dh’fhaighneachd m’ uncail an uair sin dhith ach saoil am feuchadh i air ‘Cumha Sheathain’ is dhrùidh an dòigh shìmplidh, nàdarra san do sheinn Peigi am marbhrann seo orm gu goirt – faireachdainn a dh’fhan rium fad a’ chòrr dhen latha.

‘Is an cuala sibh riamh air fear às a’ bhaile seo ris an can iad Alasdair mac Sheumais Bhig?’ dh’fhaigneachd e cuideachd – mar a bha riamh fa-near dha – aig an àm cheart, dìreach mun do dh’èirich sinn gu falbh.

Nach robh fhios, a Dhia, gun cuala! B’ aithne dhaibh seann Alasdair gu math. Agus ’s i a’ chomhairle chiùin chinnteach a thug iad oirnn; gun idir a dhol na chòir.

3

AN SIATHAMH LATHA agam an Uibhist is cha b’ urrainn do Ruairidh socrachadh idir – staid ris nach fheumainn fàs ro chleachdte, bha mi an dòchas; balach de dheich bliadhna a dh’aois, thuirt e, san Leth Mheadhanaich, air an robh mionach goirt is a bha dà uair aige mar-thà an Cnoc Fraoich. Ged nach robh e cus na bu mhiosa, cha mhotha bha an gille mòran na b’ fheàrr is e air a bhith còig latha far na sgoile. A-nist ’s ann ri cur a-mach a bha e is bha spùt air tron oidhche raoir: bhìoras bu choltaiche, ach mar a b’ fhaide a leanadh seo ’s ann bu chudromaiche dèanamh cinnteach nach b’ e rud na bu mhiosa a bh’ ann. B’ aithne do Ruairidh grunn air an eilean a shuath glè fhaisg air daoine a chall air sgàth sepsis nach deach aithneachadh tràth gu leòr, agus aon teaghlach a dh’eug an nighean aca nuair a spreadh a caolann; cus gaoithe a bh’ aig seann Doctor Grim air gus an deach i ann an laigse.

Dh’fhaodadh coltas appendicitis air pàiste ciallachadh turas cabhagach goirt a Ghlaschu air plèan-eiridinn – ma bha tè ri a faotainn sa cheò dhùmhail seo?

Gun ghuth no rabhadh thionndaidh sinn gu deas is stad sinn aig an taigh aca air ar slighe air ais bho Uist House – dachaigh nan seann daoine. Bha Ruairidh air a dhòigh nuair a chunnaic e gun robh mo laochan air a chois – le càil mhath dha a bhiadh – is gun robh a lùths air tilleadh thuige. ’S ann a’ bruidhinn gun sgur, gun abhsadh, a bha e – mar gu leòr dhe aois – mu Chuach na Cruinne is mar a rachadh do dh’Alba an aghaidh Pheru.

‘Bheir sinn dearg dhroinneadh orra!’ orsa Raibeart òg le sunnd mar bhodach ait. ‘Specially if Derek Johnstone gets a game.’ Riumsa a thuirt e seo, shaoil mi, ach cuideachd airson innse cò a’ chas leis am biodh e fhèin a’ breabadh: tè liath nan Gers!’

Bha an spionnadh às ùr na mac agus sùim Ruairidh dheth nan adhbhar-gàirdeachais do mhàthair chòir a bha air teannadh ri dragh a ghabhail. Mar an cianda rinn sinne (mise co-dhiù) toileachadh, le faothachadh, ri a deagh ghean-se agus a bonnaich bhlasta. Shaoil le Iseabail – tidsear ann an sgoil Raibeirt – gum biodh i a’ tilleadh innte a-màireach is leig i fhaicinn cuideachd gun robh fàth aice air obair m’ uncail – a’ bheul-aithris – agus an ùidh a bh’ aige ann an dualchas Uibhist. Thug i tarraing air feadhainn sa choimhearsnachd nach deach a chlàradh idir nuair a thadhail muinntir an Scottish Archive sna 50an is na 60an. Aon fhear, ge-tà nach do dh’ainmich i idir, b’ e Alasdair mac Sheumais Bhig.

‘Tha sibh a’ tuigsinn a Dhotair Ruairidh,’ ors ise, ‘bha na daoine seo fhathast car òg an uair sin is fada ro thrang airson suidhe a’ bleadraig ri maicrofòn. ’N e leabhar a tha sibh a’ sgrìobhadh ma-tà?’

‘Ri ùine, ’s dòcha, Iseabail. Ach an-dràsta, ’s ann a tha mi dìreach a’ cruinneachadh na tha fhathast ri fhaotainn. Bheir mi e uile seachad dhaibh an Dùn Èideann ach bu thoigh leam nam faighinn air an stuth a chumail an Uibhist cuideachd.’

‘Carson nach do rinn sibh sgath riamh am Barraigh?’ dh’fhaighneachd mi dheth is sinne mu Àsgarnais – taigh Ealasaid is a bràithrean pìos sàbhailte a-staigh am baile bhuainne.

‘Too close for comfort, a Chailein,’ a fhreagairt. Am faca tu am fear òg ud a’ glamhadh sgonaichean a mhàthar! Tha mi an dòchas nach bi e bochd a-rithist a-nochd air an tàillimh!’

An dèidh dhuinn a bhith greis nar tost – ach dùrdail Ruairidh – thionndaidh sinn ’n taobh Ormacleit is lean sinn rathad fada caol sìos is an uair sin suas seachad air tobhta thruagh Chlann Raghnaill; a ballaichean breacte mar gun do thilg na flùrain bhuidhe sa phàircidh an dath suas orra ’son an sgeadachadh beagan. ‘Thig an dà latha air mòran, tha fhios’ – briathran m’ uncail air cor an t-seann chaisteil – ‘cha b’ fhada an latha a b’ fheàrr a bh’ aca an seo co-dhiù. Ach nach e a dhèanadh an Job Creation project nan robh ùidh aig duine san leithid – is mun tig an rud gu ceann aig an Nollaig. Bidh mu dhà cheud sna h-eileanan a deas a’ toirt cosnadh às an sgeama a Chailein. Cha bheag an cuideachadh a nì sin le 20% unemployment ann!’

Greiseag bheag an dèidh sin, agus sinn air tilleadh suas seachad air croitean tranga, dh’iarr e orm geata fhosgladh gu carabhan a bha ag innse sgeul a cheart cho fìor mu dhampachd is cion-diù thoglaichean ar latha-ne. Bha bhana Bedford – làn meirg – na suidhe air an taobh a-muigh dheth mar gun deach fhàgail an sin a dh’aona ghnothach los nach mìllte dealbh a’ chrìonaidh.

‘Chan ann dhutsa a tha am fear seo, a Chailein,’ ors esan. ‘Cha bhi mi fada!’ is cha robh e sin. Rinn a chuid osnaich agus na thuirt e mun ‘sgrios a nì an deoch’ is taigheadas truagh glè shoilleir na bha ron dotair nuair a chaidh e a-staigh.

‘Geallaidh iad an saoghal ’s na speuran dhut,’ chuir e ris, ‘ach cò bheir biadh dhan chloinn – gu h-àraid sa chùis-nàir ud? Tha còrr air leth nan taighean an seo fhathast ann an staid nach eil ‘tolerable’; am barrachd am Barraigh! Buileach coma a bha Inverness Council is bidh a’ bhuil air na h-àiteachan seo ’son bhliadhnachan a dh’aindeoin gach oidhirp mhath aig Comhairle nan Eilean. Right, tha beagan toil-inntinn a dhìth a-nist.’

Lean sinn oirnn tron ath bhaile is an uair sin air ais chun a’ mhachaire is an iar seachad air an eaglais a-mach gu Rubha Ard Mhaoile is a sheann bhroch – Dùn Mhulan. ‘Seo an t-àite a thug ainm do Bhòrnais,’ dh’inns m’ uncail dhomh is sinn air cearcall de chlachan làn fhlùraichean beaga pinc a ruighinn, ‘is cha b’ ann an-dè a bha sin a Chailein. Linn an Iarainn ’ille agus na tuirc aca am pailteas. ’S e muc mhòr ga ròstadh a bhios aca aig barbecue an Ìochdair Dihaoine – mura dòirt na nèamhan orra a-rithist.’

Thill sinn dhan rathad mhòr, seachad air carragh-cuimhne na thuit sa Chogadh Mhòr is air ais a-staigh is tron ath bhaile, Cill Donnain; mun do ghabh m’ uncail rathad cuairteagach garbh ri taobh na mara – sgaoth eun a’ cath air na creagan fodhainn – a chaidh na fhear cnapach gainmhcheadh a dh’fhairichinn fom thòin san MG. Às a sin thionndaidh sinn a-mach an ear tro mhachaire baile eile is seachad air fàrdach taca – mar thè Eòrasdail ach gun robh i seo na bu mhotha is coltas oirre gun robh teaghlach fhathast a’ fuireach innte. ’S ann aig taigh beag air an robh mullach zinc a stad sinn, a’ bhàthach shnog ri a thaobh fo chòmhdach felt.

Abair gun robh Teàrlach Toilichte – a bha fad bhliadhnachan na phosta san sgìre – air a dhòigh leithid a shùim a bhith aig Ruairidh dheth is chan ann idir seunta a bha e mu a thàlantan. ‘Well,’ ors esan, ‘dh’fhaodadh a dhà na thrì naidheachdan a bhith agam ceart gu leòr, nan cuimhnichinn orra.’

Am feasgar ud, bha balla aige ri crìoch a chur air do dh’fhear agus an-ath-oidhche bhiodh e an taigh Iain an t-Seòladair ’son ciad ghèam na farpais: Gearmailt an Iar an aghaidh na Pòlainn – bha colour TV is bean bhàigheil aig a nàbaidh. Bhiodh Dihaoine dìreach taghta – cha robh dùil aige a bhith ri sìon mòr sam bith. Nach robh fhios gun robh fòn aig Teàrlach! Chuireadh m’ uncail brath thuige nan robh sgath a’ dol a chur maill airsan. Air a’ cheart dòigh gheibhte grèim air ‘An Dotair Ruairidh’ gun dragh nan èireadh dad prionnsapalach – bheireadh e àireamh do dh’Ealasaid is dhan ospadal.

Choisich Teàrlach a-mach chun an rathaid còmhla rinn is thug e tarraing air cho coltach ’s a bha mise ri Ruairidh ach gu h-àraid ri fear eile de bhràithrean mo mhàthar nach fhaca e ach aon turas na bheatha na shuidhe san salùn san Lochearn; ann an 1959.

‘Seadh, seadh,’ dh’aontaich Ruairidh. ‘Eòin bochd. Dh’eug e air an ath shamhradh. Tuiteam far scaffold a rinn e a Theàrlaich is iad a’ togail Easterhouse. ’N e sin ma-thà,’ dh’fhaighneachd e, a’ sealltainn a-null, le a chorraig, mu leth-mhìle tarsainn na pàirce, ‘an taigh aig Alasdair mac Sheumais Bhig?’

‘’S e a leabhra,’ ors an seann phosta, ‘Ach cha ruig am motor beag fansaidh sin idir e gun chall. ’S fheàrr fhàgail aig ceann na h-ùtraid no chan fhaigh sibh às gu bràth e. Ma chì sibh bhan liath ann…’ thòisich e, ach an uair sin stad e is leig e leinn tilleadh dhan MGs.

‘Well, dè nì sinn ma-tà?’ dh’fhaighneachd mi dhem uncail.

‘Feuchaidh sinn air a Chailein?’ fhreagair esan. ‘Could be our lucky day.’

Ged a bha an t-àite do chàraichean aig ceann na h-ùtraid gun sgath san rathad oirnn chithinn gu soilleir on pholl nach b’ fhada bho ghluais rothan cuideigin a-mach às. Dh’fhàg sinne rùm gu leòr ann nan tigeadh duine eile is chàraich sinn oirnn gu deas air frith-rathad suas a dh’ionnsaigh tulach-fraoich.

Seachad air an tulach seo bha tolman is e air a làn chòmhdach le cuiseagan fo bhlàth. Chuir caora ribeagach fàilte oirnn le craos deudmhor mun do theich i le a beatha – mar gun do loisgeadh gunna – sìos is a-mach à fianais. Romhainn bha nathair thana de thoit ag èirigh agus ag èaladh chun nan speuran à simileir-crèadha àrd, snog.

’S ann a bha an dachaigh seo – aig fear eile de chloinn Sheumais Bhig – na thaigh beag grinn is e air ùr-thughadh, a dhà sheòmar le teine annta a’ fàgail nan simileirean nan sgàthain air a chèile ach nach robh ceò a’ falbh às an tè thall. Air taobh deas an taighe chithinn bàthach chruinn mar sgeap sheilleinean agus air a cùlaibh-se ‘an àth’ – thuirt Ruairidh.

Chan e peant na bliadhna sa a bh’ air na ballaichean geala ach bha e soilleir nach b’ fhada o chaidh an dà uinneig a sgeadachadh.

’S ann dorcha ruadh-dhonn gun ghleans a bha an doras ach glan, gun ghiamh.

Thug Ruairidh gnogadh air agus, mar bu dual, thog e an t-sneag is choisich e a-staigh a shaoghal a’ bhodaich. Ged a b’ e latha soilleir a bh’ ann a-muigh, bha Alasdair air tè dhe na lampaichean aige a lasadh – a solas fann ag aoidion tro asnaichean-meatailt làn sùith. Agus ’s i, bu choltach, a bha a’ blàthachadh an rùim dha – far nach robh an stòbh ach a’ gabhail mu làimh.

‘Bheil duine a-staigh?’ dh’èigh Ruairidh, mar gun robh e an dùil gun nochdadh fear an taighe sa bhad – mar thaibhse na chathair fhalaimh – no mar a rinn an cat aige: gun liùgadh e a-mach fon bheingidh.

‘Mionaid bheag,’ an fhreagairt rotach a chualas bho air cùl a’ phartition. Dh’fhosgail an doras tana an uair sin a’ toirt cothrom dhuinn sealladh fìor ghoirid fhaotainn a-staigh a chairtealan-cadail Alasdair. Chithinn dealbh mòr dubh is geal – a phàrantan, feumaidh – am frèam-fiodha os cionn a leapa. Rin taobh-san bha ceusadh fada na bu lugha is na bu duirche an crochadh. San oisean dh’fhidir mi – air bàrr ciste-mhine (shaoil mi) air a ceann – crùisgean is ri taobh sin siuga mhòr eanamail. ’Son tiotan chaidh fàileadh na fuarachd a b’ aithne dhomh bho Thaigh Eòrasdail a chur an lùib samh làidir na mòna.’

‘Dè an cor a th’ oirbh an-diugh, a Dhotair? dh’fhaighneachd am fear a bh’ ann de Ruairidh. ‘Suidhibh!’ dh’àithn e an uair sin dhuinn mar a bhruidhnte ri cù-chaorach. ‘Suidh Laddie!’

‘Tha deagh chor,’ fhreagair Ruairidh; is sinne a bh’ ann an sin – am fìor dheagh shunnd. ‘Seo mac mo pheathar, Cailean,’ thug e dha, agus ri sin chuir e, ‘tha e fhathast a’ smaointinn air an dotaireachd.’

Leag mi sùil gun smuais air a’ bhodach. ’S e sùil na b’ fhaide is na bu chinntiche a leag esan ormsa. Dh’fhairich mi sa mhionaid gum bu lèir dhàsan gun strì nach biodh an rathad a-staigh dhan t-saoghal àraid sin idir furasta dhomh. ’S e ‘Ciamar a tha sibh Alasdair?’ a thàinig a-mach orm mar leth-chasad.

‘Shaoil sinn gun tadhaileamaid,’ lean Ruairidh air dhòmhsa, ‘feuch diamar a bha sibh.’

‘Bidh i gam chumail glè mhath. Glè mhath gu dearbha,’ ors Alasdair. ‘Cha bhi sibh ag iarraidh tighinn ro thric. Tuitidh mi aon latha is cha bhi an còrr air ach sin fhèin! Dè ’n rud eile a dh’iarradh duine – aig m’ aois?’

Cha deach guth a thoirt air tì. Cha do chuireadh briosgaid air truinnsear an cabhaig. Shuidh an dà choire gu sàmhach, foighidneach nan ornaments air a’ Mhodern Mistress. Ach thionndaidh Alasdair is dh’fhosgail e còmhla na stòbha mun do chàraich e dà fhàd mhòr a-staigh na bhrù.

‘Dh’fhaodainn èisteachd rir com – no rir cridhe?’ thairg Ruairidh. ‘Cuin a ghabh iad ur Pressure mu dheireadh, ma-thà?’

‘Ro anmoch ’son sin a-nist!’ Cha robh Alasdair idir gu bhith na euslainteach dha! ‘Nuair nach eil agad ach ùine a’ chòrr, cò tha airson faighinn a-mach nuair a dh’fheumas sin a bhith air a toirt air ais?’

‘Bha Cailean òg seo a’ gabhail iongnadh,’ dh’fheuch m’ uncail an uair sin. Cha robh mi idir cinnteach dè an obair a bh’ aige an seo. ‘Nam biodh feadhainn dhe na seann sgeulachdan agaibh? Làn chinn a Ghàidhlig aige,’ chuir e ris mar theisteanas, ged as i a bha sinn air a bhith a’ bruidhinn fad an t-siubhail.

‘Och, well…’ thòisich e.

‘Nach eil barrachd aig dotair ri dhèanamh seach dragh a chur air seann daoine!’dh’èigh agus mhaoidh boireannach beag, car òg is car tiugh, na ruith a-staigh. ‘Cha d’ fhuair sibh even teans cur umaibh ceart, eh?’ thilg i oirnne is rinn i dìreach air sèithear Alasdair. Dhùin i dà phutan air na gaileis aige mun do dhinn i bonn a lèine sìos a dhungarees is a shlaod i air a gheansaidh glan fawn – rud a sgioblaich i gu snog mun aghaidh agus aig a’ chùl.

‘Nach do chuir sibh crìoch air ur breacaist?’ throid i ris fhèin an uair sin is i a’ togail bobhla, san robh na corran air cruadhachadh, far bòrd caol fo thubhailt-chèire. Dh’fhalmhaich i na bha na bhroinn a shoitheach mòr air an ùrlar. ‘Sceòlan,’ chagair i gu cruaidh is ruith cù dubh is geal – collie-mix – a-null is theann e air glàmadh. ‘Soup a-rithist, tha eagal orm,’ thuirt i an uair sin is i a’ toirt poit air an robh mullach teann à pocan plastaig mun do chàraich i e air oir na stòbha. ‘Ach ’s e hock a th’ ann an turas sa – am fear as fheàrr leibh. Dia, Dia, bidh sibh seo gu sìorraidh a’ feitheamh!’ Le sin shad i tuilleadh mòna is bhioran tro bhàrr na range.

Rinn i seo uile, gun feairt sam bith a thoirt oirnn no idir a’ sealltainn ann an dòigh sam bith gun robh sinn fhathast ann. Dh’fhairichinn a’ mhì-chofhurtachd a bha sìor fhàs an Ruairidh.

’S e ‘Hi,’ a dh’fheuch mise. ‘I’m Colin.’

‘Are you really?’ fhreagair ise. ‘That’s amazing! Dh’fhaighneachd mi dhìse an tigeadh i a-nochd,’ chùm an tè seo oirre ri Alasdair. ‘Tha an rud gòrach sin aig na twins san sgoil. Chan eil mi aig iarraidh sibhse a chumail air ur cois. Ach chì mi sa mhadainn sibh. Seo.’ Thug i dha dà phàipear-naidheachd – The Daily Express is The Weekly News – is an uair sin thionndaidh i mun cuairt is choimhead i dìreach air bràthair mo mhàthar. ‘Mar sin leibh a Dhotair Ruairidh.’

Dh’èirich esan is, le a làimh, sheall e gum b’ fheàrr dhòmhsa an aon rud a dhèanamh. ‘Tapadh leibh, Alasdair,’ thuirt e, a’ tionndadh chun a’ bhodaich. ‘Chì mi a-rithist sibh.’

‘Tapadh leibhse gu dearbha airson tighinn,’ fhreagair mac Sheumais Bhig.

‘Thoir an aire ort fhèin, Jane,’ orsa m’ uncail an uair sin ann an guth lag tana. Is gun sùil a’ bhoireannaich seo a ghlacadh idir, chuir e ris, ‘Give my regards to Ìomhair.’

‘Dash!’ ors esan nuair a bha sinn a’ coiseachd tarsainn an tulaich. ‘Dash, dash. How bloody addled do I have to get, Colin. Jane! Fucking Jane and Ìomhair.’

‘Dè, a Dhia, a Ruairidh?’ Chuir blas curs a bhriathran sgàig rim dhrèin.

‘We’re all human, Colin. Jane MacDonald would do well to remember that. Sin sin air a dhol a thaigh na galla. Agus, of course, tha iad uile air a bhith a’ feuchainn rim chumail air falbh bhuaithe – am bodach; ach seach gu bheil mise cho diabhalta tiugh chan fhaicinn carson.’

‘Ma dh’fhaoidte gun leigeadh i leamsa bruidhinn ris,’ thuirt mise.

‘Carson?’

‘’N tàillimh nach mise sibhse?’

‘Think she took a bit of a fancy to you, do you, eh, Colin?’

Bha seo a-nist a’ fàs neònach. Carson a bha m’ uncail a’ gabhail riumsa an dòigh cho buileach grod is coimheach?

‘Hardly,’ thuirt mi. ‘Dìreach gun do shaoil mi gur dòcha gum biodh rathad eile thuige. Agus,’ chuir mi ris, ‘I’m not a doctor yet.’

‘Nor do you want to be,’ ors esan, nuair a ràinig sinn Taigh Eòrasdail. ‘With the Jane and Ivor Macdonalds of this world ever-poised to put the boot in! Cha robh do mhàthair ach…’ thòisich e.

Ach cha do chuir m’ uncail an còrr ris a sin ach sin fhèin is nam bharail-sa bha e ro thràth dhòmhsa ceistean fhaighneachd. Thog àileadh stiùbha Ealasaid agus a gnùis bhlàth làn ùghdarrais a shunnd is thilg e a chòta le deagh chuimis air a’ fhrèam-aodaich. Thug seo dà rann de dh’òran tiamhaidh gu a bhilean – ‘An Eala Air A’ Chuan’ – is dh’ionnsaich mi a-rithist mar a bha an ùidh agam fhìn sa ghnothach a’ fàs.

‘Fear a chuala mi an latha reimhid, Ealasaid,’ thuirt e, ‘aig Nan Eòghainn. An aithne dhut e?’

Chrath i a ceann. ‘Gabhaibh ceathramh eile dheth?’

‘Duilich, chan urrainn dhomh.’ Ach rinn e la-la-la air an fhonn dhi.

‘Chan aithne a Dhotair, ach gu dearbha ’s e tha snog. Tha barrachd òran aig an tè ud shuas na th’ aice de phrìneachan.’

Rud car àraid ri ràdh, shaoil mi, is doirbh a thomhas cuideachd, co-dhiù ’s ann ga moladh no ga càineadh a bha Ealasaid no dìreach ag innse mar a bha. Ach gu cinnteach bha Nan Eòghainn, tè air am bu thoigh le Ruairidh a bhith a’ cèilidh tron t-samhradh sin, luma-làn cheathramhan – tòrr dhiubh nan òrain-luaidh a dh’ionnsaich i bho a màthair is a seanmhair. ’S e cho deònach is a bha i an seinn do Ruairidh rud a thug sòlas mòr dha fhad ’s bu chòmhla sinn an Uibhist ged nach do thadhail mise oirre ach an aon uair – nuair a bha Cinema Sgìre a’ sealltainn The Great Escape, is le sin chan fhaca mi e.

Dh’fhalbh gràgail chruaidh na seann-fòn duibh dìreach nuair a bha Ruairidh air cnùgan salainn a shadail thar a ghuailne – an tè chlì – airson