Ausgedengd unn Uffgeschnabbd E-Book

Kira Schmitz

• Herausgeber: BoD - Books on Demand
• Kategorie: Poesie und Drama
• Sprache: Deutsch
• Veröffentlichungsjahr: 2024

Seitenzahl: 53

Beschreibung

Aus Liebe zu meiner Geburts- und Heimatstadt entstand dieses Buch in Mannemer Mundart mit Gedichten - mal heiter, mal besinnlich, auch Satire und Interessantes aus und über Mannheim. Die Abschnitte entsprechen den 20 Buchstaben der Mannheimer Quadrate, dazwischen befindet sich jeweils eine Seite mit Fotos aus der entsprechenden Quadrate-Reihe.

Leseprobe

Inhaltsverzeichnis

Alles Mannem

Awwa jezz noch nedd

Beidrag zum Umweldschuzz

Beim Dogder

Cola aus Mannem

Café Landes

Do Drausse

De Summer Neuneseschzisch

E' kläänes bissl Blau

En verhunsde Lewensowend

Faschd fer umme

Fremde Freunde

Gliggerles-Olympiad

Gans de Babba

Hochzeidsdaag

Iwwer Nachd

Im Subbermaagd

Kalde Bää

Kerschezeid

Leggzion begegend midd Mudderwizz

Leidensgenosse

Mai-Rege

Mannemer Kigger

Nosdalgische Erinnerunge

Neschdfluchd

Noch ää Johr

Omas ledschder Wunsch

Pald 's fer disch

Puri Leidenschafd

Quadrolade

Quadradeschdadd Mannem

Rabazz am Achdevärzischer

Riwweleskuche

Summerwedder

Trauerfall

Tabeedewexl

Uff äämol alles ford

Uff 'm Maagd

ALLES M NNEM

Isch bin wascheschdi Mannemern unn do druff bin isch schdolz

Die Mannemer sinn nämlisch aus me gans schbezielle Holz

Mer jammern nedd lang rum wenn 's mol nedd laafd so wie gedachd

Do werd korz iwwerlegd unn dann des Beschde draus gemachd

So manscher der in Mannem hodd des Lischd der Weld erbliggd

Is - wo er dann erwaxe war - ins Lischd der Weld geriggd

Ob Schbordler Kinschdler Korifäe sunschwie prominend

Aus Mannem schdamme viele Leid die faschd en jeder kennd

Aa Tüffdler unn Erfinner hodd 's bei uns in Mannem viel

Ihrn Urschbrung ham do Fahrrad Bulldog unn des Benz-Mobil

Schbageddi-Eis Rakedeflieger unn de Schdozz-Kondaggd

Unn noch viel mehr - des alles kummd aus de Quadradeschdadd

Doch wer jezz glaabd die Mannemer wärn bloß uff sisch beschrängd

Dem sei an derre Schdell versischerd dass er do falsch dengd

Ja - Mannem is weldoffe unn des schun vierhunnerd Johr

Rund hunnerdsiebzisch Länder kumme uugfähr bei uns vor

Es gibd beschdimmd mansch anner schääni Schdadd uff derre Weld

Doch wolln mer nirgends sunschwo lewe aa nedd fer viel Geld

Wenn aa nedd alles is wie 's sei soll wo is des Problem

Mer liewe unser Heimadschdadd denn do sinn mer dehääm

AWWA JEZZ NOCH NEDD

E' Fraa um die achzisch e' Lewe lang fidd

Die hold sisch de Dalles der nimmd se arg midd

Sie fiehld sisch hundselend ihr fehld jedi Krafd

Vum daagelang Ligge is sie völlisch gschaffd

Sie fiehld sisch als missd se ball 's Zeidlische segne

Iwwer korz odder lang ihrm Herrgodd begegne

Do falld ere ei dass des garnedd gehd

Weil viel noch uff ihrer Tuduu-Lischde schdehd

Fer 's Schderwe is re 's noch e' bissl zu frieh

Drum wend se sisch biddend zum Herrgodd hi

"Ach Himmelsvadder des kannsch d' nedd mache

Isch hab noch so viel uuerledischde Sache"

"Alla guud" määnd der drowwe "bloß weil du 's bischd

Verlänger isch ausnahmsweis mol dei Frischd"

Schun ball dodruf gehd ere 's widder guud

Schnell fassd se fer sisch neier Lewensmud

Vun drauß duud die Sunn in ihr Zimmer lache

Do siehd se ihr uuerledischde Sache

"Ach des hodd noch Zeid" so duud se beschließe

"Dovu loss den Daag isch mer nedd verdrieße"

Ihr Zeid verbringd se midd ann're Indresse

Die Sach midd 'm Schderwe hodd ball se vergesse

Korz vor de Neunzisch verwischd se die Bibs

Dann baud se en Schdurz hodd 's Bää druff in Gibbs

Unn weil 's re so goddserbärmlisch gehd

Dengd se dass am libbschde se schderwe deed

Hebd flehendlisch biddend nach owwe ihrn Bligg

"Ach Himmelsvadder kumm nemm misch zurigg

Hab midd meiner arme Seel doch Erbarme

Erlös misch vun do - hol misch in dei Arme"

"Alla guud" sachd de Herrgodd "es is dein Wille

Dum hol isch disch zu mer ins 'Lewe der Fülle'

Erlös disch dann vun deiner Erdezeid

Neggschd Woch in de Frieh do hald disch bereid"

"So ball schun" erschriggd se "des is bissl knabb

Fer des was isch vorher zu regeln noch hab

"Alla guud" sachd de Herrgodd "isch häng noch was droo

Awwer fang endlisch midd 'm Erledische oo"

Doch falld 's ere schwer sich uffzuraffe

Unn vun ihrm Krembl was weg zu schaffe

Die Johre vergehn unn midd Schreggensbligge

Siehd sie uff sisch zu de 'Hunnerder' rigge

Do gehd 's re uff äämol so rischdisch vergrazzd

Midd Mieh unn Nood schlebbd se sisch zum Azzd

Doch der hebd midd viel Bedauern sei Händ

"Do bin isch midd meim Ladein jezz am End"

Denooch is uff 's Schderwe se eigeschdelld

Verabschied mental sisch vun derre Weld

"Herrgodd jezz isses beschlossene Sache

Fer misch gibd 's do hunne nix mehr zu lache

Mei Daage bringe mer kaum noch Freed

'S werd heggschdi Zeid dass zu End jezz gehd"

Doch der häld im Himmel sei Ohre zu

"Isch dengg garnedd droo jezz loss mer mei Ruh

Des Hü unn des Hodd des is mer zu dumm

Du wesch nedd was d' willsch - heb misch hinnerum"

Quadrat A2

Quadrat A5

Quadrat A3

BEIDRAG ZUM UMWELDSCHUZZ

Mei Nas is zu mei Nas is dischd

Mich hodd 's gans ordendlisch verwischd

Isch hab mer 's selwer eigebroggd

Hab in de Schdrooßebahn gehoggd

Isch wolld – do hilfd mer jezz kää klage -

Mein Deel zum Umweldschuzz beidrage

Doch merg isch glei wie isch drin sizz

Do drin is Umweldschuzz en Wizz

Die duun Bazille unn aa Vire

Quer durch gans Mannem dransbordiere

Um misch drumrum duun alle niese

Des duud des Bahnfahrn mir vermiese

Hedd isch doch 's Audo bloß genumme

Vielleischd wär dann kään Schnubbe kumme

Mei Nas die drobbsd mei Nas die laafd

Hab noch mol Tembos eigekaafd

Isch kumm mimm Buzze nimmer nooch

Mir gehds hundselend - was e Frooch

Unn niese muss isch alleridd

Mimm Umweldschuzz do machsch was midd

BEIM DOGDER

Sei Bää sinn lahm sein Rigge krumm

Seid Daage jammerd er bloß rum

Er fiehld sisch wie en alder Mann

Weil er sisch kaum bewege kann

Sei Fraa schwezzd 'm die Ohre voll

Unn schennd dass er zum Dogder soll

Des häld er dann nedd länger aus

Unn quäld sisch miehsam aus 'm Haus

Beim Dogder do schdehd schun e' Schlang

Do werds 'm glei gans Angschd unn Bang

Schnell sezzd er uff e' Leidensmien

Unn hoffd er is dann schneller drin

Doch griggd er glei gsachd "Duud uns Leid

Des gehd heid bloß midd Waddezeid

Mer hawwe kään Termin mehr frei

Gehn se ins Waddezimmer nei"

Er schleischd zur Dier mergd voller Groll

Es Waddezimmer gschobbdevoll

Nach zwee Schdund langer Hoggerei