verbale Durchfall E-Book

Koenig Heike

• Herausgeber: Books on Demand
• Kategorie: Poesie und Drama
• Sprache: Deutsch
• Veröffentlichungsjahr: 2023

Seitenzahl: 39

Beschreibung

Verschiedene kurze Texte in Reimform über alltägliches. Über Leben und Steckborn. Das meiste auf Schweizerdeutsch aber auch Schriftdeutsch und Englisch. Mal mehr und mal weniger ernstgemeint.

Leseprobe

Inhaltsverzeichnis

Alltag

släbe

dankbar

Selbschtgspröch

nur no sBescht

das Rad der Zeit

mis Dihai

8266

wunderschö am Untersee

numme Tübel

700 years

Reimfrei

entfernte Welten

irgendwann

drei verlorene Gedanken

deep inside

Abschied

machs guet

Chriegerin

next time

stories

fremdi Dimensione (betrette uf eigeni Gfohr…)

dä Quick vom Leisi

äs Plätzli

d’ziit isch riif

mis Ventil

Nimmerland

chömmed mit

I’ma tryin‘ to survive sometimes,

´cause I’m losing my mind sometimes,

I’ma kickin‘ dumb rhymes sometimes,

I just need a few lines sometimes

´cause sometimes, sometimes

I just can’t find

the way to my own mind,

when nothin‘ at all makes sence

and all I wanna do is jump outa my skins,

´cause the devil is what the night brings

and the world still spins, still spins, still spins…

Alltag

sLäbe

Es isch grundsätzlich scheiss egal

wo her du chunsch, wohi du gosch,

da wo zellt ischs Hier und Jetzt,

wa du machsch us wa du häsch für da gits kei Gsetz,

än chline Bruchteil wird der geh, dä Rescht vo dir umgsetzt,

will…

sLäbe isch ganz genau da wa du drus machsch,

nöd weniger, nöd meh du ällei häsch dMacht,

mängisch laufts wie am Schnüürli, mängisch gheisch uf dä Sack,

denn stoh wieder uuf,

will dChance wartet nöd nu druf, dass du sie packsch.

Du chasch…

uf dim Arsch sitze und warte, dass sich was ergit

und wenns doch nöd so guet chunt

treit eifach jede ander dSchuld,

dini Eltere, dini Lehrer, dä Staat und sSyschtem,

da isch simpel, da isch logisch, da isch eifach und bequem,

me mue nu jammere und rede, chlööne, sich beklage

aber jo niemols öppis eiges bewege

aber denk dra…

sLäbe isch ganz genau da wa du drus machsch,

nöd weniger, nöd meh du ällei häsch dMacht,

mängisch laufts wie am Schnüerli, mängisch gheisch uf dä Sack,

denn stoh wieder uuf,

will dChance wartet nöd nu druf, dass du sie packsch.

Du chasch…

dÄrmel ufe kremple und dis Ziel fokussiere,

mängisch bisch dä Hero, mängisch wirsch di blamiere,

doch au die gröscht Niederlag isch kein Grund zum stagniere,

jede Rückschlag birgt ä Chance du muesch es numme probiere,

nöd uufgeh, ok mängisch chas der dä Schnuuf neh

und zur gliiche Ziit dä Grund si

zum gad dopplet soviel Gas geh,

will…

sLäbe isch ganz genau da wa du drus machsch,

nöd weniger, nöd meh du ällei häsch dMacht,

mängisch laufts wie am Schnüerli, mängisch gheisch uf dä Sack,

denn stoh wieder uuf,

will dChance wartet nöd nu druf, dass du sie packsch.

Erfolg oder Versäge da liet gröschteteils bi dir,

chum entli use us dä Traumwelt wo du selber inszeniersch…

dankbar

I bi gsund, han än Job und es Dach überm Chopf,

i han alles won i bruuch

und trotzdem isch do öppes won i suech,

noch wa gnau, da weiss i nöd

doch i weiss, dass es mi ab und zue fascht töt,

die Leeri won i gschpühr isch wien e bodeloses Loch

i mim Herz, mim Buch, minre Seel, mim Chopf,

jo i weiss es goht mer guet, i ha alles und no meh

aber viellicht isch ganz genau da sProblem,

mir läbed innre Wohlstandsgsellschaft, im pralle Überfluss,

alles schient scho selbschtverschtändlich,

nünt empfint me meh als Gnuss

und gnau die Oberflächlichkeit

führt hie und wieder zum Verdruss,

denn wirds Ziit zum inne halte und zum säge jetz isch Schluss.

Denn schnuuf i dure, chum oben abe,

mach mis Herz und mini Auge uuf,

hör uf jammere und chlööne und wird mir wieder bewusst,

dass es tuusig Sache git, für die i cha dankbar sii

und das es soviel Mensche git

wos so viel schlechter händ wien i.

Drum wörf i alles über Bord wo mi abeziehe chönnt,

konzentrier mi nu no druf was i besser mache chönnt,

ob für die andre oder mi, gnüsse sLäbe Tag für Tag,

denn es isch seinzig won i ha,

verschwände mini Chraft nümm a da wo mi hässig macht,

richt min Fokus nümm uf sNegative won i eh nöd ändre cha

und drum wach i ab sofort jede Morge mit me Lächle uf,

mit me Lied uf dä Lippe und im Herz än nice groove,

denn egal wa passiert es vergoht kein einzge Tag

a dem dir nöd was begegnet wo di herzhaft lache loht,

es sind meischt di chliine Sache,

muesch nu ganz gnau anneluege,

sie sind do, um üs ume, muesch sie nöd mol wiit go sueche,

will sLäbe isch schön, sLäbe isch riich,

es cha jede Tag din schönschte si, wenn du da numme willsch.

Selbschtgspröch