Dick u Dünn E-Book

Alex Gfeller

• Herausgeber: Books on Demand
• Kategorie: Gesellschafts- und Liebesromane
• Sprache: Deutsch
• Veröffentlichungsjahr: 2023

Seitenzahl: 830

Beschreibung

Koni Dick und Toni Dünn haben ein halbes Leben lang ein Brillengeschäft in Kehrsatz bei Bern geführt, und jetzt, da sie beide in Rente gegangen sind, beschäftigen sie sich nur noch mit ihren Büchern und Bildern, die niemanden interessieren. Das macht ihnen aber nichts aus. Zum Ausgleich fahren sie auf ihren beiden alten Motorrädern in die prächtige Landschaft hinaus.

Leseprobe

Bärndütsch

Tufgab isch glichzittig Tabgab u Tigab, ganz eifach. Nume Erwachseni sötte drin Vrwändig finde, wo drfür geignet si, sixi itz im Singgular odr im Plural, sixi männlech odr wiiblech odr nöitrum, u keni bösi Erinnerige dörfe dr sorgfäutig usgwäut Wortfluss schtöre, ohnid pärsönlechi Affinitäte; nüt söu chönne Iifluss näh. Meh vorzogni Uflage aus die drei si abr nid vorxeh; es git zwar nones par chlini Einzuheite, wosi hie no nid wei vrzeue, di zwe Knüüsse, sisch no nid dr richtig Ort u ono nid dr richtig Momänt drzue, wüu au das isch eigetlech unwichtig u unbedütend, wi zum Bischpiu zWörtli ‘ja’, wo lutem Korekturprogramm vo Wörd bide schtilistische Vorschleg umbedingt zvrmide isch, wos nume geit, werum o immr, im Ändeffekt ersch am Schluss vom Grauguss, woso numeno drum geit, wos schteit u wos geit u wos het u wos macht, wüus eigetlech zimli übrflüssig wär u nüt aus es chlises Fürzli sigi, sägesi u winis zKorekturprogramm erklärt, nume es gschmackloses Windli im ganze Tegschtfluss vo dere Orkanie u Taifunie. O aus Bekräftigung giz das ‘Ja’ nümm idr klinisch subere u makulose Wäut vo Wörd; es chunnt eifach nienemeh vor, wüus zKalifornie äne wahrschinlech sexueu diffamierend wär u erotisch korumpierend. De zwe gneigte Aquitanier zChäsiz äne düngkz abr, dassi eigetlech guet gnue sige, umsech gepflegt chönne uszdrücke, wüu schtilistischi Fähler u schtrategischi Irtümr gäng chönne usgfielet u abgfigget wärde, schtrategisch xeh, wüu es mues am Schluss e suberi Sach gäh, e suberi Sach daschtah, wosi no chönne vrträte, bärndütsch xeit, u nid nume di gramatikalische udi ortografische Fisimatänte. Abr so si o di wichtigschte Vorgabe, di bedütendschte Vorhabe u sogar di grundlegendschte Vorlage u vilech o di einzige Vorussetzige, Umschtäng, Iiwänd u Abgränzige scho gnüegend abgschteckt u scho ganz am Afang zur Diskussion gschteut u eventueu scho abvrreckt, no bevores übrhoupt richtig agfange het. Aui merkes, nume di zwe nid; das kennemr lengscht. Abr es söu nid dr Idruck entschtah, aus düeg grad dä Tegscht es psungrs Gheimnis odr es usklüglez Rätsu vrschtecke, wüu das duetr sichr nid.

Es isch sogar e grundsätzlechi Vorussetzig, das grad dä eifach Tegscht nüt Wäsentlechs duet vrschtecke odr vrhüue odr vrhüete, dasr nüt Bedütends wott vrraate u nie ine Unkentnis odr ine Unvrfänglechkeit wott abtouche u o übr nüt Unumgänglechs wott vrfüege odr öppis Usfüehrlechs wott vrbräme wid Bräme, odr ohni zwüsse probiert zvrheimleche u o nid wott vrchläbe odr vrpflaschtere odr absichtlech wott vrwässere u vrdunschte, u är wozech gwüss o nid wöue unnötig wichtig mache u blitzblangki Zähn zeige. Es handlezech hie nume umene liecht sukursalistische Tegscht, um meh gwüss nid. Dr Tegscht wirt o so Twäut nie erobere, wi aui Sukursalisme, Subrealisme, Datafaktorisme, Metarealisme u Protorealisme, vrschproche. Es wärde drmit u drususe keni Enthüuige gmacht, keni Erfahrige mitteilt, keni Erkenntnis erbracht u keni Erlüchtige offebart. Vrgässez!

Wär nid wott xeh, was di Zittewändi ergit, söuse eifach ufdr Sitte la, wüu eigetlech u urschprünglech schetze nume di vrgässnige Vrfassr udi vrmisste Vrpassr u vilech sogar ono di flüchtige Vrpissr u aaschtändige Bekackr elei iri vrschteckte Queue u offesichtleche Qualitäte. Abr grad die Erkenntnis isch säubschtvrschtändlech so säubvrschtändlech, dasme übr das gar nid mues schribe, wüu grad die flotti Karisierig udi flötistischi Ischtelig säubschttragend gnue si, udi forschi Schribhautig blibt drbi erschno anähmbar säubschtungerächt u isch uf jede Fau usrichend vorigno u erschno unbeschtritte. Erewort! So isch zum Vorus aues Wäsentleche xeit, u aui dängkbare Vorussetzige si usrichend i Erwägig zoge u erwähnt worde, auso usrichend erlediget u agmässe erwähnt, auso usrichend gnue ufgliischtet u agmässe i Betrachtig zoge odr sogar leidlech betrachtet u i agmässnigr Früschi vrmittlet u zertramplet worde; meh giz drzue eigetlech nid zsäge. Um däm ernöite Affront, wosech scho am Horizont duet abzeichne, dr Meischtr zzeige, mues gwüssrmaasse didaktisch, faktisch u taktisch gschiid odr wenigschtens schtrategisch subr vorggange wärde, u vilech sogar orthopädisch odr metabolisch, nume um lutr vrhassti Begriffe usdr Belletristik u usdr Ballistik zvrwände, wasdi sympathische Informatikr scho ause ernöiti schtilistischi Provokazion chönnte aaluege, wesi nid scho lengschtns wüsste, dass da chum no öppis würklech Provokativs u erschno Wichtix chönnti si, was da dasumeschnaagget u dasumeggaagget. Tatsächlech ischdi ganzi, vrgäblechi Müeh eigetlech scho zum Vorus für nüt xi, u wär faht nid immr widr mittr ganze Aschträngig im Wüsse a, das grad di Aschträngig i kenr Wis cha ziufüehrend si u o nie sinnhaftig odr zwäckmässig chönnti wärde?

Si lohnzech nidemau, ehrlech xeit, u numene richtige Tubu würdi so öppis mache wi si, di zwe Schribis us Chäsiz. Dir heit absolut rächt, abr was söus? Mir müesse dZitt ztodschlah; si mues gäng widr vo Nöiem iiggäh, aaggäh, usggäh, aagricheret, ufggäh, vrschtaupet, vrrüehrt, vrhacket, vrsout u nähr grad ono sichr vrnichtet wärde, so dasme cha sichr si, dassi nie meh zrüggchunnt, di vrlauereti Zitt, abr o nid aus Zombi umechunnt u abechunnt u inechunnt, di vrreckti Souzitt, wüues geit drbi eidüttig nume umene reini Zittvrschwändig u Zittvrnichtig idr ganze Zitträchnig inne, u scho nume das isch oschowidr irgendwie sündig odr sogar todsündig, nid wahr? Wenigschtens echli sündiglich? Vrwärflech? Unaschtändig odr ruchbar? Unpassend isch si uf jede Fau, wüu Zitt darfsech eigetlech nie widrhole; das würdi glatt dr Logik widrschpräche. U mir wei doch nid unlogisch si? Dr modärn, auso mittumässig Mönsch fürchtet nüt meh, aus settigi huere Ereignis, wo immr widr zrüggchöme, wüu aui ächte Ereignis sötte eigetlech einmalig si u einmalig blibe, schüsch vrlüresi sofort ihre urschprüngleche Wärt u ursächlech Sinn, wüu wärtlosi Zittzügnis gitz massehaft, unes gizze trotzdäm nid würklech, nie u niene u nimmr! Macht das eim nid ztschudere? Aui Zittzüge wei abr hütt u hie nie vo Fantom rede, so weni wi vo Fänomen odr Fantasi, ganz abxeh vo aune Farisäer, Filharmohnikr, Fotolyser u Fonematiker. Abr wie o immr; es mues itz passiere, was mues passiere, u das isch i däm Fau eidüttig e witere Ermässensschpiurum inere richtige Notlag, drzue e reini Asichtssach une fiisi Vorgabevranlagixursach, drzue vilech sogar ono e Ernennixurkundebeschtätigungsvorsorg, abr eini vodr ganz psungere Art, wemeris die Amerkig us Amerika dörfe geschtatte. Wär itz abr dr Ansicht isch, das sigi ja aues nüt aus eis einzix Räzu odr sogar nume reine Mischt u Chabis, dä vrgisst, dases gar keni Räzu git, keni Dängkschpiu u o keni Enigme, wo nid immr i ihrer ganze Banalität chönnte ufglöst wärde. E settigi Mittumässigkeit müessemer vilech sogar i Chouf näh, wüudi gfragti udi erwareteti Qualität sowiso immr drungr lidet. E gwüsse Qualitäzvrluscht müessemr immr i Betracht zieh; das isch vilech sogar di itzigi Mönschheizufgab insgesamt u genereu, wüu chürzlech isch dr dickflüssig Kontrolör wach i sim breite Bett gläge, u zwar di ganzi Nacht lang, mit offene Ouge, wischo so mänggisch i sim Läbe, auso praktisch jedi Nacht, wemes gnau nimmt, u während dere Zitt si ganzi Tegschtflüss i vouschtändig usgschaffete Sätz vo erläsener Eleganz dürsi Chopf gschtrömt, aues Sätz, wonr ufe erscht Blick gar nideso schlächt het gfunge, ja, är isch richtig schtouz ufse xi, wisi da ungfragt si inecho u flott widr useggange si, aus chiemtesi gar nid us sim Hirni, sondrn vo irgendwo här, vilech sogar usem Wäutau odr usm Fundus vode widrschprüchlechschte Gfüuslage vode Hesperide, u nume wäge dämm hettersech müesse ernüechteret säge, dases wou dochno nid ganz vrbi isch mittem Schribe, wüu si müesse nach wi vor gäng schribe, si müesse immr ufschribe, si müesse eifach gäng abschribe, si chöi gar nid angers; das ischne eifach so ggäh, u vilech isch das sogar ire eiget Uftrag, wo vo ganz inne ufechunnt, odr abr e ganz schlimmi Chrangkheit, wosno gar nid git u wome no gar nid cha heile. Zmale abr chöisi ohni witteres jahrelang la lige odr la schtah, ohni wäge dere länge Pouse Schade znäh, ohni dasne drbi angänz ungmüetlech wurdi wi bim Schribuntrbruch, wüu bim Schribe louft aues ganz angers ap aus bim Male: Di Sätz louffe bi ine i rootr Lüchtfarb überne innere Biudschirm, widi aktuelle Börsekurse übernes Loufband i Lüchtschrift adr Fassade vonere erfougriche Bangk, anere ganz moderne Fassade us Glas auso, u zwar immr ganz beharrlech, unufhörlech, ungfragt u ununtrbroche. Si gäbe dütlech u klar übr Gwinn u Vrluscht Uskumft, übr Bewegige odr übr Schtiuschtänd, übr Vorwärz u Rückwärz, übr ufe u abe, ohni dasdä bemerkenswärt Vorgang vom innere Vorgehe odr vom innere Abgang jemaus gschtüret, gschtoppet odr beschlöiniget cha wärde, u scho gar nid zum Vrschwinde pracht wurdi. Wine ändlose Fluss fliesse di lüchtend rote, gäube u grüene Sätz u Zahlereihe zügig uf dene innere Breitbandbiudschirme vrbii u überse use u schwümme ändlos düre, wägg u ine witti, dunschtigi Ferni use, gö anim vrbii u übrne wägg u singke witt wägg langsam abe, u zwar aues gueti Sätz, bruchbari Sätz u robuschti Sätz, so dassisech müesse säge, wesi ufm Rügge im Bett düe nachesinne usech ärnschthaft düe frage, obsisech äntlech widr einisch müessti Tmüeh näh u gäh u ufschribe, was i irne Gringe eigetlech aues abgeit, dassisech auso widr einisch dZitt sötte näh, audi guete Sätz ufzschribe, um usezfinge, was für Fiume i irne Chöpf eigetlech abloufe, u dassisech o dere Ufgab zschteue hätte, wosi widr einisch gäge bessrs Wüsse, gäge aui Erkenntnis u aui Erfahrige u gäge jeglechi Notwändigkeit agfange hei. Es git ke einzige Grund, das zmache odr nid zmache, unes git o ke Alass drzue, dä Drang zungrdrücke odr sech ihm zungrwärfe une äntlech widr einisch uszläbe, wüu es isch mittm Schribe wi mittm Brunze: Dr Drang isch da, abr dr Brunz louft im Auter numeno i schtarch reduziertr Form, nume wüusech dBlase nie meh vouschtändig lärt, vor auem nid im Sitze, abr o nid im Schtah, wüusi gschpüre scho sit langem eifach nümme ungrhaub vode Hosegürt odr diräkt a irne Schwänz; si chönne auso nid säge, so wi früechr, ob da öppis no nid louft odr obda scho öppis louft, obes immrno louft odr obes nümme louft. Wesis wei wüsse, de müessesi zersch dBrüue ufsetze, müesse sech müehsam abebücke u gnau häreluege wines Tubeli, usi müesse drzue iri Schnäbeli scharf im Oug phaute u abwarte, wassi schüschno düe usela odr obsi übrhoupt no öppis düe vosech gä, di huere Schisgigle, e letschte Pipser vilech, e letzschte Süfzgr odr e letschte unbewusste Schtöhnr, odr obsi übrhoupt no öppis zsäge hei u vosech gä, di zwöi Gigeli, churz xeit, obsi übrchoupt no für öppis da si, di zwöi chline Schwänzli. Di beide Schtumuschwänzler mache us dere Vorussetzig, was übrhoupt no müglech isch, abr nume kes Theatr, usi möchte sech nid müesse la säge, si heige öppis vrpasst, si kümmeri sech zweni drum, odr si heige sogar öppis isech ungrdrückt – odr was o immr. Phüetis!

Sone fautsche u absolut unzueträffende Vorwurf wärne zimmli unagnähm, unr wäri o ganz u gar ungrächt u fautsch, wüuer ganz u gar fäu am Platz wäri, usi wüsse das sit langem, wüu sisi ja zwe erprobti Schribprofis, usi kenne iri ungerschidleche Schriblune lengschtens haargenau u bis tief ine. Für das bruchesi sech nümme vorzmache, usi bruchesech ovo drittr, auso vo vöuig unberuefener u unbefuegter u unerwünschter Sitte, zum Bischpiu vomene Döktu, nümme la zbeiidrucke – das ganz sichr nüm-me. Settig wüeschti u ätzendi Aafängrzitte si zum Glück lengschtens u definitiv vrbi, wüusi lösech scho lang nümme la drirede, ganz glich vo welere Sitte, so weni wisi sech übrhoupt no öppis löla säge, wüusi inzwüsche genau wüsse, dasne übrhoupt niemer meh darf drirede, cha drirede u söu drirede; si hei ja kenr Chunde meh mit Chundewünsch u Chundereklamazione. Es git eifach niemer, wo für das no geignet odr gar befuegt wär. Itz isches abr so, das usm blangke Übrlege use u elei bim Nachedängke no ke bruchbare Tegscht entschteit, wüu jede Tegscht entschteit zersch mau ufm Papir odr ufm Biudschirm, u niene schüsch, erschtunlechrwiis o nid im Chopf, sondrn meischtns ersch i müehsamr Form nume dert, auso bim Koni endr ufm Papir u bim Toni endr ufm Biudschirm, u niene schüsch, wüusi genau wüsse, das vor auem di schriftlechi Form rein inhautlech u formau so odr so e geischtig sehr reduzierti, schprachlechi Kunschtform isch, formal zwar immr meh odr wenigr koräkt, abr äbe, insgesamt xeh doch nume e skizzehafte Entwurf, zimmli flüchtig entschtande u gschpickt mit viune Lücke u Löchr u Fählr u schüsch nüt, e düri, abschtrakti Konschtrukzion vo Sätz, es furtglüffnix u düttlech ungerernährz Gschpängscht, es hereloses Gguveer, es beziehixloses Mäppli, abr schone guet gmeinte, doch äbe widr nume abschtrakte Vrsuech, are sehr unbeschtimmte, abr gnadelos herte Würklechkeit äntlech Herr zwärde, meh gwüss nid, auso nüt Kongkrez, nüt würklech Definitifs, nüt Vreinzelz odr Vrbandelz, nüt Detaiierz u vor auem nüt Ändgüutix, nume e schwache Vrsuech, ane beschtimmti Würklechkeit härezcho, wischo xeit. Abr oscho nume zNachedängke drübr wirt meischtens vöłig übrsch-etzt, wüu nachedängke chaja jede Tschumpu, u jede Tubu dängkt immr genau söfu nache, winr brucht u winr mah, wenr übrhoupt brucht u wenr übrhoupt cha nachedängke; das schteit lengschtens fescht. Niene wirt übrigns so viu nachetängkt wi idr Chischte, u schon nume di Erkenntnis elei seit aues übrz Wäse u übrt Qualität vom Nachedängke us. Vrgässemr das auso aues, u zwar schnäu, wüu nachedängke füehrt zu nüt, u wär drzue erschno idr Chischte hocket, blibt drbi idr Chischte hocke, das schteit fescht. Da änderezech nüt. Am Nachedängke chas auso nid lige; da mues scho meh härezoge wärde, nämlech tätigi Hiuf, sofern es settix Programm übrhoupt wittrhiuft, u zwar uf irgende Art u Wis, ganz glich uf weli, odr zmingscht uf jedi dängkbari Wis, sägemr mau. Das entscheidet elei übr Si odr Nidsi, wi bim Scheiksbier, odr übr obsi u nidsi, wüu das hez vou isech, unes geit um nüt angers aus um Läbe u Tod, um Schnudr odr Chodr, um Gäut odr Bluet, um Wurschtfingr odr Pianischtehäng, um rasierti odr unrasierti Gringe. Da chame jahrlang manisch Schtöibli u Dräckli ufläse, abläse odr abwüsche, wäggsuge odr unfreiwiuig iiatme, u trotzdäm entschtöh immr widr überau Schtöibli u Dräckli; me weis nie, wo die härchöme, wüu im Ruum säuber isch nüt us Schtoub odr Dräck; dr Rohschtoff für Schtöibli u Dräckli fäut eigetlech, u nüt duet druf hiwise, das gli dr ganz Rum vonere glichblibende u glichartige, meischtns musgraue Schtoubschicht zueteckt wirt si, überau schön glichmässig vrteilt, sanft i sire Art, abr unufhautsam, schtetig u lutlos, u i aune Eggeli wärde sech di blöde Schtoubhüüfeli biude, vo denemr hie schtändig rede, vrteut vode lisischte Luftschtrömige, wome gar nid cha wahrnäh. Dä Schtoub isch eifach irgendeinisch da, chläbt a Chleidr u Fingke, a Schpatze u Mirabelle, a Marder u Kardanwäue, u lazech nid eifach widr la wäggdängke odr vrtribe odr wäggwünsche. Dr informiert Informischt mues di Schtoubflöckli gwüssrmasse einzeln behandle, muesse müehsam pückt ufnäh u pärsönlech zum Ghüdr trage, wüusi si eifach unübrsehbar si, o we nüt druf hidütet, dasne ihri bedütixlosi Bedütixlosigkeit übrhoupt öppis bedütet. Nüt gitne jemaus di Wichtigkeit, wosi für sich gar nid düe beaschpruche, unes schteuzech di brönnendi Frag, obes äch nid doch e Schtoubtüüfu gäbi, wo irgendwo duet luure u wo louffend Schtoub produziert, irgendwo unsichtbar imene Zimmregge vilech, ohni dasme öppis drgäge chönnti mache, e fine Schtoub, wonr när heimtückisch, abr schön glichmässig im ganze Zimmr duet vrteile, nume umt Bewohnr zergere u ume unerwünschti Arbeit mitteme lärmige Schtoubsugr zmache. So muesme haut e chli Lärme mache, zum Leidwäse vo beidne Bewohnr, vom Toni u vom Koni, wo nid wei im Schtoub läbe, auso im Wonixschtoub, im Husschtoub, wime seit, inere schtändige Schtoubschicht auso, wome zersch chum cha xeh u wome nie richtig cha wäggputze, wüusi immr widr chunnt u schinbar immr da isch u da blibt. Schtoub gwinnt, würdi dr Röne Ramp säge. Zläbe produziert vor auem viu Schtoub, müesse di zwe tranige Inkubischte angänz aanäh, u schüsch nüt, u zwar schtändig u überau, u weme übr das lang nachedängkt, übrchunnt zLäbe sofort e ganz angere Sinn mittemene dütleche Gschmack vo Abneigig, vo unusgläbtem Widrwiue u unerläbter Abschöi, u schtändig begleitet vomene Gfüeh vo vrschtändlechr Vrachtig, vo eidüttigr Gringschetzig u vo breit usgwauztr Chötzligkeit, wüu Schtoub eigetlech ke Beachtig findet; Schtoub isch wärtlos u bedütixlos, sinnlos u nume vo Abneigig begleitet. Me begägnet em Schtoub mit Vrachtig u absolutr Gringschetzig. Schtoub isch ke gueti Wohnidee u isch ke Bericherig vom Woufüuvrmöge, umes mau so zsäge, unes git nume weni Sache, wo di Eigenschaft mitm Schtoub teile, weme mau psungrs widrwärtigi Lüt nid i Betracht zieht, wodr guetwiuig Infanterischt gwüss nid mah vrputze u wonr beschtimmt niemeh möchti xeh. Inkubischte u Internischte rede imene settige Fau vo Virecocktail, abr o vo Totaurevisione, vo Fore, vo Ware, vo Beeri, vo Sure u Mixture, vo Bohnesuppe, vo religiöse Xäng u pruchte Klarsichtfolie, vo dütlech mindrwärtige Impfsere für übrflüssigi Impfige u Beschimpfige u vo ganz entbehrleche Schafschuure bi scho mehrfach gschorene Schaf zWattewiu hingr.

Drmit isch gwüss no nid aues ufzeut u xeit, abr me chasech äntlech es Biud vo aune grusige Vrheerige mache, wo scho nume di bescheidene Amerkige hie wärde uslöse. Immrhin chame drzue no säge, dasmrs hüt u hie mittemene psungrs schöne, häue Morge ztüe hei, o wes ersch Fritig isch, abr am Fritig simr immr psungers gitig, uwe Zunne schoso früeh am Morge am Horizont schteit, duezi nidemau sonderlech blände; si isch eifach i auer Klarheit majestätisch ufggange, u nüt u niemr häze dranne chönne hindere, wimr aui wüsse u wit Infernalischte immr widr betone. E Schibe wine Bluetorangscheschnitz, wodi ganzi Landschaft ines miuds, warms u weichs Morgeliecht toucht het, wi sinrzitt di orangschige Schtore im Chinderschpitau zBärn, wones warms, woutuenz u gedämpfz Liecht vrbreitet hei, wo aues Hospitalische nachhautig übrschtrömt u fasch gänzlech übrfluetet het, sogar di flanellene Bettdechine udi schneewisse Uniforme vode ufmerksame u früntleche Chrangkeschwöschtere, Chrangkepflegerinne u Putzhiufe. Di schtiui Landschaft isch i das schtändig ineschtrömende, warme Liecht vonere ufgehende Sunne ipettet xi, u trotz dassi ganz flach isch xi, di schöni, ruehigi Schtadtlandschaft, ischsi imene flache Sunneschtand perfekt igrundet dagläge mit liecht nach obe grichtete Rändr, genau wi ide Beschribige vom Ludwig Hohl, u isch scho am Morge früeh dütlech isech gfeschtiget xi, wissech ghört. Es isch ganz eidütig dZitt säubr xi, wosech ihm eso ganz pärsönlech zeigt het, wüu dZitt isch grundsätzlech rund, udi schtiiffe Rändr si nid nume ganz unaschtändig gäge ufe grichtet, auso erigiert; sisi ono usgfranst wine aute, itröchnete Bodelumpe, wome irgendwo vor Jahre vrgässe het. Drzue schmöckzi ochli komisch, di Zitt, um ehrlech zsi; si isch zwar ganz liecht u ganz unvrwächsubar, weme dranne schmöckt, abr me gschpürt di feine Vrfiuzige udi fein ziselierte Schtrukture, wosi loufend produziert, sogenannti Liechtvrfiuzige us lutr miude Paschteutön u irne dezänte Abwichige odr Ergänzige, usi cha jederzitt ono jedi gwünschti odr unerwünschti Form anäh, wesi wott. Wedr gneigt Observant gnau härelost, chaner übrrascht feschtschteue, dassi drzue ganz liisligi, abr betörend schöni Musig abschpiut; es si vorwiegend di fine Klangfarbe, wisi aube churz usde Outoradio töne, we Touto vrbifahre, psungrs wedi französischi Neoklassik axeit isch, iri Lieblingsmusig. Odr wi söume däm angers säge? Di klassischi Musig vom Afang vom Zwänzigschte isch hütt scho lengschtens klassisch worde, psungrs dKlaviermusig, o wesi immer no zimmli modärn tönt, wüu psungrs zParis ide Zwänzgerjahr sidi mittulose Komponischte ufm Montmartre Schlange gschtange, umne vrschpätete Aschluss a di modärni Zitt zerhasche, wome denn nidemau ide Salons het zghöre übrcho.

Wär hätti auso denn nid ufm Montmartre wöue si, bi au dene vrruckte, vrdrängte, vrlachte, vrachtete u vrschrobene, junge Lüt? Me cha drus nume ei Lehr zieh: Wär es ine Talkshow am Fernsee, zumene Artiku inere bedütende odr unbedütende Zitig, zumene Radiointerview imene abglägene Regionausändr odr schüsch anes öffentlechs Mikrofon gschaffet het, isch nächär fürt Kunscht für immr unwiderbringlech vrlore u vrgheit u gschtorbe u vrdorbe, wüusech das nid duet reime im Reine, wüu das im Gheime nid duet keime, wüu das ufdr Abrächnig nüt ergit, wüu das gar nie ufgeit, wüusech das nid ziemt, wüu das niemerem passt, wüu das nid cha zämega mitte Aaschprüch, wüusech nächär Toutentizität gruset vorem Gruser u wüu dr Mönsch nächär nie meh dr glich wirt si wi vorhär odr winr vorhär wenigschtens hätti chön-ne si; är duezech nächär vosech säuber aageeklet abwände, uz Glück wirtne für immr vrla unr wirt zum Drögeler wärde, wüu öppis angrs nümme drinne ligt. Är wär auso zum Abgwäute worde, zum Niduserwäute, u das isch eidüttig zschlimmschte übrhoupt, was amene begabte Mösch cha passiere. Es isch nämlech wi bide Pilotikr: Wesi mau gwäut si, au di unerträgleche, nimmersatte Pfuschine u Schnurine u Schmierine, auso audi schtingkend hemmixlose Säubschtdarschteuer, audi wandelnde Meineide uf zwöi Bei, wärdesi nie meh das si, wassi vilech mau hätte chönne si für churzi Zitt, wesi ufpasst hätte u nideso mittumässig u mitlöifferisch, so devastatorisch u so mitochondrisch plibe wäre. Me chas abr o so xeh: Si wärde ab sofort i irne grusige blaue, graue odr schwarze Herechleidr numeno bekackt dasumeschtah wi schtifgfrorni Schoufänschtrpuppe, usech aus grusigi Truppe vrpuppe u entpuppe u vrschuppe, immr mittemene igfrorene Durlächle, usi wärde i irne grusige blaue, graue odr schwarze Luxusschlitte sinnlos dasumefahre, nume umsech wichtig zmache, odr abr, ganz im Gägeteu u no viu schlimmr, wi farbigi u vrtschaupeti, läri Popcornschachtle ohni Wärt dasumelige odr dasumetigere, vo aune dasumegschuttet u aune Weicheier u Warmduschr Thäng müesse schüttle wines Tubeli, wo scho lengschtens vrgässe het, wis übrhoupt heisst, usi wärde vor auem nie meh drufcho, um wases eigetlech geit im Läbe u idr Pilotik, wes übrhoupt no zu däm Pungkt würdi cho. Si wärde vo nümme e Ahnig ha, nie meh, wüusi numeno dörfe dängke, wasmene vorschribt u vorseit, u si dörfe numeno so handle, wimes vone erwartet u vrlangt; meh blibt da nid fürig vo däm Mönsch, meh blibt vone nie übrig. Drum giut aus erschti u isigi Grundregle u aus genereui u unumschtösslechi Vrhautensregu o für aui Künschtler, was immr si si u wo immr si sech befinde: Masse mide! U glichzittig: Massemedie mide! Pilotik u Pilotikr mide! Due umbedingt u übrhoupt aues mide, wasdi chönnti ablängke, wasdi ungfragt umarme möchti, wasdi fürsech möchti inäh, wasdi möchti ufsuge, wasdi möchti abschläcke u isacke u dürefigge, auso aues, wasdi ganz eifach abechouffe chönnti, u zwar bis uf Nuł abe, auso aues, wasdi chautblüetig a unbekannti Gounr vrchouffe möchti wine bekackte Schütteler, wome wine Waare vrschuttet, auso aues u aui, wo us dir es lukrativs Gschäft möchte mache u was us dir unuswichlech es wittrs nutzloses Kułturtubeli möchti mache u chönnti mache u würdi mache, wesi chönnte, eis mit müglechscht viune Prise u Ehrige u öffentleche Anerkennige, u zwar mit Liechtigkeit, eis wome cha abemache u uslifere u bis uf Nuł abechouffe, sofern es dini Chöiflechkeit übrhoupt geschtattet, wüu nid du entscheidisch übr dini Chöiflechkeit, sondrn dä, wo zaut. Capisce? Due auso settig Lüt mide, ganz psungrs Tschurnalischte u iri blödsinnige Fotografe, wosi gäng mitscheipfe; si sis genereu eifach nid drwärt, zur Kenntnis gno zwärde, genauso widi Massemedie, wodi nume wei abechouffe, wüu schüsch wirsches für immr beröie u bedure, wüu du niemeh unschułdig wirsch si, niemeh unerfahre, nie-me ungvöglet, udu wirsch niemeh chönne zrüggah zu dire ageborene Unschułd, zu dire unataschtete Unerfahreheit, zu dire exischtenzieue Unvrwundbarkeit u zu dire wahrhaft outentische Unersetzbarkeit.

Du wirsch sehr schnäu abekouft si u abekouft blibe, udu wir-schdi zwar aagmässe missbrucht u misshandlet füehle, klar, u das absolut zu rächt, abr du wirsch scho bau abghaufteret u usgmuschteret daschtah unter ferner liefen, nume wüume di blitzschnäu maschinell u induschtriell zu Schtoub u Dräck vrarbeitet wirt ha, udu wirsch nächär sehr schnäu numeno wärtlose Schtoub u Dräck si, merkdr das, beschtefaus es Schtoubhüffeli imene Zimmreggeli – meh nid. U itz wüssemr äntlech o, wohär au dä Schtoub chunnt ide Zimmregge: Das sidi vrlorene Seele vo au dene Dichter u Dängker, vo au dene Maler u Biudhouer, vo au dene Musiker u au dene Sänger u au dene Tänzer, vo au dene Wanderschouschpiler ude Wanderglons u aude usrangschierte Pilotiker, vode abekoufte Archideckte ude abgsoffne Komiker u Kritiker, wo vrzwiflet, abr vrgäblech, wüu unhörbar, auso fruchtlos um Hiuf rüeffe u um Nachsicht bättle, u zwar grad e haubi Ewigkeit lang, so dr dringend Ufruef a aui Kunschtu Kułturschaffende, wüu e öffentlechi Kułtur isch scho-ne tooti Kułtur. Si isch eifach a fautsche Vorschtelige gschtorbe. Merketnech das, dir Arschgiige! Me midet nämlech Totgeburte, u zwar zu Rächt, me wichtne us, me woze nid xeh, me vrschwigze u me gitne mänggisch nidemau e Name, vilech us Rach, entschtande usere Beleidigung odr usere Enttüüschig use. Me vrweigeretne e eigeti Identität, u das het o mitr Outhentizität ztüe, wosi uf Gheiss vo höchere Mächt nid söue übrcho u nid chönne übrcho, wüume weis inschtingktiv, das mittr brutale Öffentlechkeit outomatisch o grad di brutali Glichschautig chunnt, di überus bösartigi Glichschtelig u Abechouffig u Abemachig u Abesetzig, auso di hinterlischtigi Iiornig udi absolut unuswichlechi Glichmachig vo aune u vo auem. U so ischo Tunvrwächsubarkeit im Arsch, genauso wi Toriginalität, wo beidi ougeblicklech vrlore gö. Zack! U wägg sisi! Wi mitm Schwärt wirt dr Mönsch vonere gnadelose Öffentlechkeit i happigi Fleischschückli zerleit, wines Schafsvorässe, wird bi läbigem Lib gvierteilt u inere Chüuvitrine usgschteut odr grad diräkt de Fische vrfuetteret. Scho nume wäge dämm muesme guet ufpasse; Töffentlechkeit isch nämlech e mächtigi u gfährlechi Bärefaue, si schnappet gnadelos nach auem, wassech ire duet nöchere, si vrhackt iri Opfer, wo nid guet ufpasst hei, si vrhackt u vrpackt u vrmanscht u vrpanscht, si vrtribt u vrribt, vrmiist u vrbieschteret aues u aui, usi lat iri Opfr nie meh los, laze todwund la lige, laze langsam la vrfule u vrcho u vrgheie u vrfaue. So louft das ap; das isch Töffentlechkeit, so ischsi, u zwar nume so. Aues angere si nüt aus Trickli u Lugine. Si isch nid gwünnbringend, wi eim gäng xeit wirt, si isch nid heilsam, wi mängge Trottu meint, usi isch ganz beschtimmt nid heilbringend, wi aui meine, usi duet vor auem nid guet. Si bringt höchschtens dr Schtutz, usi isch i Tat u Wahrheit richtig mörderisch; wüusi frisst loufend sogar di chline Ching, wosi gäng fürsech beaschprucht. Si missbrucht di Ching gnadelos u phouptet sogar, si heigi drmit gar nüt ztüe. So eini isch das, di Öffentlechkeit, e hintrhäutigi Lugimoore u Dräckschlampe, e findseligi Ehebrächerin u Röiberin une richtig mönschefindlechi Dräckmoore. Doch hie u hüt ligt dr Fau ganz angers: Är isch erlediget, Tlüt si zfride heiggange, ud Zimetschtärne vo Drohobytsch vom Bruno Schulz si lengschtens vrputzt. Me cha auso widr einisch vonere erfougte Ablag rede, wüu o dTagebüechr expediert si, so dasdi nöiji Usgangslag luperein udi ganzi Präsentazion würklech iwandfrei daschteit. Posunischte ungrde Evanggelischte gschpüre Terliechterig, usi vrgässe langsam, wi hert di Zitte vorhär si xi; es git sogar widr Lüt, wome gärn widr mau es Buech würdi vrschicke odr wenigschtns es müglechscht vouschtändix Büechrvrzeichnis, wines vilech gli widr zur Vrfüegig wirt schtah. Di beide Rekordhautr hei aues gmacht, was i irere Macht u Müglechkeit het gläge; si hei aui dängkbare Müglechkeite lengschtens usgschöpft u voukome abgschöpft u wärde hüt tatsächlech vode Vorschtelige treit, wosi würklech bruche u eidüttig im Schwitzchaschte hei.

Nume im Netz weisi sech niemeh ufhaute, dr gfällig Kontorsionischt udr gschickt Prestidigitatör, u zwar mitr Begründig, dassi sech schones haubs Läbe lang mit Idiote dasumegschlage heigi u drum ke Fortsetzig meh wei ha. Es si nidemau meh richtigi Wuetusbrüch odr eidüttigi Schmollrückschtänd vorhande odr irgendwo zfinde, o keni wäsentleche Schmouchschpure odr übrflüssigi u absolut unnötigi Touchgäng, abr o kenr verräterische Fingerabdrück, u das isch würklech öppis ganz Einmalix, wosno nie u niene ggäh het. Das müessesi grad aafüege u usdrücklech betoone. Si füele sech i au irne Vorschtelige gschtercht, usi möchte das Gfüeu vo Übrlägeheit nie meh müesse misse, ohni abr audi Übrlägeheit wöue zuezla u usezla, onid e chlini Schpur drvo. Das setzt abr vorus, dasdi Akrobate keni Kontakte meh pflege, u sigs o nume obrflächlechi, bilöifigi, unbedütendi odr unvrbindlechi, wüsi inzwüsche hei glehrt, das vor auem di länge u durhafte Kontakte di problematische si, di schwirige, di bedängkleche, u drzue ono di zwifuhaftischte; das ligt idr Natur vodr Sach. Si wei sech nie meh i settigi Abhängigkeite begäh, wo zimmli unzueträffend Fründschaft heisse, si wei sech nie meh öpperem praktisch Unbekanntem müesse i Tarme wärfe wi zwöi Tubeli, wüu settigi Vrbindige eifach nüt häregäbe, nüt bedütte u eigetlech weni übrzüge. So sisi haut, di Aktrobate vodr Equilibristik. Ke Tisch, kes Pułt, ke Büroschtueu u ke Schribmaschine söu je widr chönne drzwüsche schtah, ke Komentar, ke Ersatz, keni vrschteckte Fuessnote u o ke Gwungr, wüu eis ischne inzwüsche klar worde: Mittm Gwungr isches ändgüutig vrbi, wüu es git keni Übrraschige meh, keni Uffäuigkeite, keni Vorzuxbehandlige u keni Vrwunderige meh, abr o keni Betroffeheit, keni Vrwirige u keni Erschütterige; das heisi lengschtns aues hingsech glaa, di Hüetrbuebe, mit aune Vrschprächige, mit aune hohle Lobhudeleie, mit aune fise Inelegr u mit aune schreckleche, pärsönleche Agriffe zäme, u zäme mit aune eidesschtattleche Vrsicherige, mit aune härzhafte Betürige, mit aune gloriose Vrheissige u o mit aune schtiue Totgeburte, um genau u usfüehrlech gnue zsi. Jede Schnuderi isch ja nume es Produkt vom schnöde Sekundesex, u das isch scho aues, drei Bäresekunde nume, odr drei Hirschsekunde, wüu aui si numenes Produkt vo biuigem Sekundechläbr, wemes gnau nimmt, grad die, wo ganz säubschtvrschtändlech u ganz säubschtvrgässe drvo usgö, grad si sige itz würklech öppis Psungrix, öppis Ussrordentlechs, öppis userwäuz, öppis, wo Twäut bis itz no nie xeh heigi, wo Twäut abr scho lang druf gwartet heigi u was Twäut itz ganz eifach bruuchi.

Vrgässez! Da änderet nüt drann, ke Hinwändig, ke Zuewändig, ke Ufwändig u ke Abwändig; das chöitr grad vrgässe; e richtige Exorzischt cha numeno froh si, dasers äntlech hingrsech cha la, wenrs übrhoupt jemaus cha hingersech la, wi scho xeit u wi scho lengschtns erlütteret. U das isches, nämlech genau das, wases isch u wosech dr notariell begloubigt Rotarier immr widr vorgschteut het u wo tatsächlech öppis Vorhandnix, öppis Getribnix u vor auem öppis Rueloses isch – abr das bringt eifach nüt, das bringz nid, das bringz nie. Är hezzech nume schnäu umträit, schnäu abgwändet u isch schnäu wägg gange, u zwar für immr. So isches xi, u so isch dr gwöhnlech Indukzionsschtrom gmacht, u a dämm änderet o ke Erinnerig öppis, u masi noso präzis si, wüersech niemeh umträit u nie meh zrügg gluegt het, unr träizech o nie meh um. Är duet nidemau churz zögere, är hautezech nie meh uf drmit u louft eifach numeno gredius wittr.

Eifach gäng wittrlouffe! Jedes Zögere wär e Vrrat adr eigete Schandtat, jedes Zaagge e prisgab vo au dene Fähler, wo dr Grännihung angäblech gar nie gmacht heigi, u jeglechs Ahaute isch grad e arge Vrluscht vodr eigete Unzuelänglechkeit, u aues Abwarte isch numene Unschlüssigkeit meh, auso e Sorg meh, odr e Eergr meh, wo zu auem Vrderbe no drzuechunnt usech idi längi Lischte vode Vrsümnis schön duet ireihe. Us däm Grund blibe audi Nüteli udi Nöteli schön fridlech ungrsech u düe niemerem öppis zleid. Niete blibe nämlech di Niete, wosi scho immr si xi, udi vrmeintleche Gwünnr si eigetlech di wahre Vr-lürer, wemes gnau nimmt, abr si merkes nidemau, u zwar fürnes ganzes, pschissnix Läbe lang nid, psungrs denn, wesisech i komplettr Vrkennig vode Tatsache, vode Ursache u vode Fouge u erschno i heillosr Vrbländig aus typischi Winnrtype möchte xeh ha, u drum isch das di üblischti möschlech no vorscheubare Vrwirig u Vririg, abr das giz ja aues o, u zwar in Masse; me chas nämlech nie vrschtecke, weme innerlech, auso geischtig, moralisch, ethisch u soziau vrchrüpplet isch, wis scho dr John Lennon xunge het, wüu weme innerlech, auso geischtig vrchrüpplet, auso massiv reduziert isch, ohni abr aus Invaliditäzfau ufzfaue, sondrn äbe aus Normaufau giut, auso aus ganz normale Durchschnizfurz, de blibtmes grad für immr, de wirtme sozsäge zum induktive Sondrfau i auer Normalität, was immer me unger normau vrschteit, ume xehz jedem sofort a. Me xehz übrigens aune Lüt sofort a, meischtns sogar ufe erscht Blick, wisi innerlech beschaffe si odr äbe nid beschaffe si. Da giz keni Gheimnis zvrtusche, ohnid zvrwüsche, ohnid zvrbärge; das chönntme gar nid mache. So öppis chame nämlech nid eifach vrschtecke, singt dr Lennon zu Rächt, me chas haut nid vrtusche u vrschleiere, weme innerlech vrchrüpplet isch. Das wüsse abr nume die, wo drvo nid betroffe si, das isch ja zPsungere drann; die wo drvo betroffe si, merkes nid, merkes nie. Nid betroffe drvo si abr nume weni, abr e settigi Iisicht isch nidemau fatau, wüu das isch dr wahr Charaktr vodr Sach udr ewig Louf vo dene Ereignis, weme so wott. Dr Normaufau isch dr Normaufau an sich u aus das schone Chrangkheizfau; das muesme zersch mau iixeh. Me mues ke Zouberer si, um uf das zcho; me darf abr o ke Zouderer si, wüu dr Fortschritt beschteit usschliesslech us Fortschritt u schüsch us nüt. Fürne wahre Magier isch ussertem Fortschritt im töiffe Chaos u im höche Unvrschtand nüt angers vorhande, uda bewegzech o nüt angers, wüu das sis einzige u wahre Umfäud isch. Entwedr nimmtr das ganze Chaos aus Ursach vom Böse wahr, odr är laz la si. Zchaos isch uf jede Fau immr da, six itz vrschteckt odr offe; äs umgit jede Tschumpu u Tschirggihung wine unsichtbare Umhang us dicke, schwäre Bleiplatte. Me schteut Zwichtige höchschtns zum Unwichtige, us reinem Unvrschtand, schteuz vilech sogar vor Thustür zum Schpermüu, zum Autglas odr zum Autmetau, u das Bizzeli, wo blibt, wär sinngemäss zeinzig Wichtige, zeinzig Richtige u zeinzig Wahre, zeinzig Mügleche u zeinzig Bruchbare, auso das, wo aui Schpatze so druf plange, o wes scho lengschtens da isch u aui Schnudrnase mit dickr Watte odr dichtem Näbu iiwicklet, ohni dassis übrhoupt merke odr sogar zur Kenntnis näme. Abr sogar das isch nid ganz so u onid ganz so eifach zerkenne, o hie nid, mues dr Eklektikr ernüechteret anäh, auso hieume nid, unr bietet am Elektriker e Zigarette a, e Mary Long. Uf Pfrag, was würklech wichtig isch, faut Tantwort gwüss nid schwär: Jede weis sofort, was wichtig isch u was nid; är mueses nidemau psungrs dütlech gschpüre, u xeh muesrs sowiso nid, ohnid wüsse, wüu es isch ke Gfüeussach, sondrn numene usdruckslosi Gwüssheit ohni jedi Körperlechkeit, wüu ussrt dr monetleche Kontoabrächnig giz nämlech wäutwit übrhoupt nüt, was jemaus vo Belang u vo Bedüttig chönnti si, wüu aues angere ischja nume Kitsch u Bilag u Schund u Schrott, six itz Gfüeuskitsch, Gedangkekitsch, moralische Bifang odr sittlechi Bilag, u me chasechs ruehig az Bei schtriche, seit dr Latiner gedangkevrlore, grad är, wos ja mues wüsse. Latinisch isch drum nie vrgäbe, so weni wi Autgriechisch, Autägyptisch u Autpersisch. Dür aues muesme sech angäblech zersch mau dürequäle. Sone Blödsinn! Das isch übrhoupt nideso, u das schtimmt o gar nid, wüu odr ahnixlos Tubu zieht e dütleche Nutze drus, wüume sech drbi inere wahrlech wundersame Wäut vodr gränzeloser Erwitterig bewegt, vodr wahrhaft umfassende Ernöierig u vodr iischliessleche Erfassig, sozsäge aus Bilag odr aus Dessär vonere häu schtrahlende Geischtigkeit us wahrer, öiropäischer Sondrklass – hellenisch xeh. Me het drzue erschno lang ke Ahnig, wasme da aues lehrt, u zwar grad fürz ganze Läbe, u niemr schteit dasume u erklärz eim ono uf Dütsch, uf Änglisch odr uf Französisch, o nid uf Italiänisch, was da geit, wüu das isch eifach di kułtureui Obrklass, das isch di kułtureui Oberschicht u das isch di kułtureui Obrgränze, ume cha sogar Tnäme vo aune Medikamänt ufde Schachtle vrschtah, wo uf Griechisch odr Latinisch ganz banau u prosaisch töne u drum übrhoupt nüt mittemene ärztleche odr farmazöitische Gheimnis ztüe hei. Zwahre Gheimnis vo aune Medikamänt beschteit usschliesslech drin, dasdr banau Profanischt, dr wichtigtuerisch Populischt, dr chrangk Plöffr i sire ganze Ibiudig –u o dr unbedaftischt Proletischt – nüt vo däm auem söu chönne vrschtah, u zwar grad gar rein nüt. Är söu eifach nie chönne wüsse, wasr a Souereie aues mues schlücke, wie auso sini Läbere uf Griechisch heisst, odr was sis Hörz uf Latinisch bedütet, onid was si schtändig überforderet Mage uf Persisch akündiget, odr wasim sini kabutti Niere uf Autägyptisch wott säge; är söu eifach gar nüt chönne wüsse, u so söus o blibe, übrigens o sinere eigete bescheidene Asicht nah, u vilech isch das sogar gschidr so, wär weis? Sogar denn, we eine tatsächlech zuefäuig öppis Griechisch sötti chönne, isches uf jede Fau guet so, weme nüt weis u nüt vrschteit, wüu so ischme gschützt gäge aui Chrangkheite; irgendeinisch wärde nämlech aui Autgriechischwörtrbüechr, aui Autpersischwörtrbüe-chr, aui Autägyptischwörtrbüechr u aui Latinischwörtrbüechr, auso zganze wäsentleche Vokabular vo dere Wäut, vom Himu abeschtige u aune Anaufabete aui nötige Erklärige abgäh. Aui Latinischwörtrbüechr wärde ufde Chnöi usdr Höu cho zschnaagge u äntlech e bruchbari Gebruchsawisig zum tägleche Gebruch vodr Wäut vorlege. Ersch denn isch medizinisch u farmakologisch uszouberet, mini Dame u Here Doctores! Audi Quacksaubr i irne hoffnisxlos übrfüute Praxene wärde gnadelos entlarvt wärde, udi vile Tingltanglmedizinr wärde grad entmündiget. Di ehrleche u ufrichtige Mediziner wärdesech abr i irer ultimative Vrzwiflig zPamplona ide Gasse scharewis vordi wiude Schtiere wärfe, wo dert dürt Schluchte marodiere, udi Doctores wärdesech übrhaschtet vort Schnäuzüg wärfe, dKardiologe, dHepatologe ud Biologe wärde überau vode Klippe schpringe, udi praktisch vranlagte Husärzt wärde sech, zäme mitte Onkologe ude Dermatologe, rasend wiud ufd Portmonee vo irne ahnixlose Opfer schtürze u mit schpitze Fingere audi farbige Kreditcharte u Kontocharte usesueche u usegrüble u sichrheizhaubr asech näh. Praktisch aui Privatkonte wärde vode gierige Döktr plünderet wärde; ganzi Familie wärde wäge Maasere odr Schpitzeplaatere iz Eländ gschtürzt wärde usech ufdr Fürsorg widr xeh, u sogar dZahnärzt wärde nid eifach ufgäh; si wärdesech hinter Bärge vo Formular u ide Abgründ vode Bundesordner vrschtecke u bis az Ändi vo irem Läbe fiktivi Rächnige a fiktivi Paziänte schribe; odr si wärde audi unerfahrene Praxishiufe barsch u brüsk zrächtwise udi nüechterne Umschleeg akurat frangkiert a aui Nasegrübler vrsände, wosech i irne Akte löla finde, ohni nume einisch mitr Wimpere zzucke u um grad nächär iri Praxis niemeh zbeträtte. Was wüssemr scho vom Hass vode Zahnärzt uf iri Praxislokalitäre? Si gö sofort es soutürs Rennvelo ge chouffe, zäme mit auem modische Zuebehör u farbige Schnickschnack, wo eifach drzue ghört, zum modärne, gepflegte, ufgschlossene Velofahrer, umsech grad aschliessend numeno ziugrichtet um au drei Seene vom Seegebiet zwüsche Biu, Murte u Iferte zfrese, u das jede Tag, umsech drbi Zeu usem Lib zchotze u– Trennsunnebrüue ungere Rennheum klemmt, di schöne Rennsocke korekt ufezoge – i ekstatischr Erschöpfig zerga. Immr, wedr Buschbürolischt auso dängkt, är sig äntlech am Ändi acho, muesr übbrascht feschtschteue, dasr ersch am Afang vodr ganze Schteppezelig, Schuppezelig u Suppezelig schteit, wüu sech Tafäng nämlech ganz ungloublech i Tlengi zieh, ume ungrschetztse schtändig, wüume zGfüeu het, immr widr vo Nöiem u immr widr ganz vo vore müesse azfaa, u glichzittig chunntr eifach nid vom Fläck. Är cha noso schtzrample – är chunnt nid wägg! Das muesr immr widr i sini schmali Berächebarkeizmüglechkeit iboue, odr i sini breiti Unberächerbarkeizunmüglechkeit, weme so wott. Uf das abe schteutr i sire ganze Verehrixbereitschaft hocherföit fescht, dasr tatsächlech unberächebar worde isch u zuekümftig numeno uf Singalesisch odr uf Lingala wirt singe. Vilech hanget das drmit zäme, dasr eifach i sim ganze Pruefsläbe viu zviu mit usgmachte Arschlöchr ztüe gha het, woner eso unabsichtlech, unwüssentlech u unbewusst wott kopiere – Dieu seul sait pourquoi. So chunntr Buschpissr unfreiwiuig ine Ändlosschlouffe vo Vorgabe u Igabe, vo Vornahme u Inahme, vo Abgabe u Ufgabe, vo Vorwürf, Abwürf, Iwürf u Ischtelige, vo Vorschtelige u Vorkassene, vo Ibausamierige u Imarschplän, wonr gar nid säubr usgwäut het u wonr beschtimmt nie säubr würdi uswähle, wenr jemaus druf higwise würdi. Dr Koni mues auso ufpasse, so wi grad itz, dasr ja nid am fautschte Apparat duet schaffe, auso am Apparat vom Toni, u so chanr tifig dr Platz wächsle, vom unbequeme Hockr zum bequeme Büroschtueu, wüu am fautsche Apparat chanr gar nid richtig schaffe, das wäri numenes unbequems, unvorteilhafz u unfrohs Schaffe inere unbequeme Ängi u geischtige Beängtheit. Dr angr Apparat vom Toni isch nämlech nume fürt Meils u fürz Bängking zueschtändig, auso fürdi ganzi Schisadminischtrazion; u de isches wurscht, obs gnue Platz für aues het, wüu es het sowiso nie gnue Platz für aues, wemes gnau wott näh. Abr wenersech bim Schribe erschmau iggängt füut, de louft gar nümme, oder abr nümme richtig, de schtotterez numeno luschtlos vorsech häre, das Läptop, vou Fäuzündige, Rucklbewegige u Abgaswułke, o wenr scho viu i dere rüümleche Ängi gschaffet het, ohnis übrhoupt zmerke odr zbeachte. Är het schoso viu i dere Ängi gschaffet u gläbt, dasrsech grad wiz Ängland gfüut het, so äng isch das xi, unr schteuzech vor, är hocki ire dungkle Nische zCheltenham u müessi sech räschtlos aues usde änglische Fingr suge, i welere Schprach o immr, am beschte uf Walisisch, wüu das ussrtem nöie änglische Chünig garantiert niemr vrschteit. Abr so schlimm chas gar nid si, u so vrschteut darfes o gar nid si. Diräkt am Fänschtr mitm Blick ufe Bözingebärg, wi sinrzitt dr Röbi Walser, wone diräkt us sim Chämmerli use im Blaue Chrütz i sinere Miniaturhandschrift ufdr Rücksitte vomene chline Papirfötzeli usfüehrlech beschribe het. So isches scho wäsentlech besser, vor auem kontinentaler u dütlech binneländischer une chli erliechterndr uf jede Fau, aus zCheltenham mit Blick ufz grüengraue Siubrmeer mit sine ändlose Woge u Wäue u Wittine u heftige Wułkeformazione, woso abgrundtief abwisend, so chaut u so weni vrschprächend isch, dasmes eigetlech gar nid wett xeh, um ehrlech zsi. Weme nämlech das Meer dert xeht, merktme schnäu, dasme zMeer gar nid würklech brucht odr gärn het odr vrmisst; me möcht eifach nume gärn zügig vorwärzcho mitr Arbeit, das isch aues. Abr das isch immr schneuer xeit aus gmacht. Dr Bözingebärg xeht übrigens wine risige, schlafende Bär us, u vilech isches ja eine?

E voriszittleche, titanische Höhlebär usm Terziär?

Wär weis? Dr Bär erwacht ersch denn usm Wintrschlaf, wesim drum isch, wesim gfaut ufzwache, wesim passt, wenr mah u wenr übrhoupt ersch Luscht zum langsame Ufwache vrschpürt. Abr was machtr nächär? Was macht e risige Brunbär usm Terziär nachm Erwache? Läcktr di läckere Passante vode Schtrasse u Plätz? Vrtrampletr di grusige Hüsr vo Biu?

Tschumpletr vrschlafe zum See u sufzech ordentlech vou? Är hett ja sitem Afang vode vier Iszitte nümme trungke. U wohäre geitr nächär? Geitr iz wite Seeland zude Schpargufäudr use, odr chlätteretr i Jura ufe?

Suechtrsech di schönschte Beijischtöck udi feissischte Schafherde us? Odr wändetr sech grad diräkt de zarte Chäubr zue, de saftige Rindli odr de schmackhafte Chueli ide Metterie ufde Jurahöchine, so widi Handlixpärsone am Schribtisch, wo grad morn zwe schöni Chaubshaxe wärde chouffe, zwöimau Ossobucco mit Piuze u Chnoblouch? Odr zwe glocheti Chnöche mitTomateschü u viu Zibele? Dr Toni weises no gar nideso gnau, wüu är hez no gar nie usprobiert, winer seit. Zwichtigschte fürne Ma vo hütt isch abr di richtigi Umhängetäsche, Toni; das isch gwüssrmaasse mätschentscheidend. Si mues eidütig u unwidrrueflech us brunem Rinzlädr si, ja nid us schwarzem, usi mues zwöi chlini Ussetäschli ufwise, eis für Thusschlüssle ud Briefchaschteschlüssle, u eis für Toutoschlüssle ut Töffschlüssle, wüu das isch elementar u essenziell u für jede Kennr vo dere Läbesform e Säubschtvrschtändlechkeit. Drzue mues dr Zuegang zur Brieftäsche sichr u eifach u jedrzitt übrprüefbar si, ude mueses ono gnue Platz fürnes paar angeri wichtigi Sache vom Läbe ha, zum Bischpiu fürdi wichtige Wärkuswise im Poschtcharteformat, wo müglescht komplett Uskumft übr ires Xamtkunschtwärk söue gä, auso übr iri Büechr u übr iri Biudr, übr iri Plastike u übr iri angere Sache, wo hie gar nid zur Schprach si cho. Sött eine drhärcho, wo fragt, obsi eigetlech gängno düegi schibe u male, de müessesi doch öppis idr Hang ha? U drzue chöme no zwöi Taschetelefon udi gladni Maschinepischt für au Fäu.

Abr glichzittig darf di Täsche nid zgross u nid zchli si; si mues hantlech blibe, udr Tragrieme mues breit gnue si, so dasne dPolizei bim flüchtige Häreluege aus Sichrheizgurt akzeptiert, wesi im Outo hocke. O wäge däm söudr Rieme nid us Lädr si, wüu Zichrheizgurte im Outo, wosi nie alege, si o us dungklem Tegschtiumateriau. Sini Ufhängige müesse schtabil gnue si u o nach vilem Gebruch no intakt blibe; si wei nid müesse iri Umhängetäschli repariere. Ersch we audi Bedingige erfüut si, chadi Schułtrtäsche für Here kouft wärde, vorusxetzt, Tamäudixformalitäte si nid zkompliziert. Es git nämlech Schułtrtäsche, wosi zwar gärn würde chouffe, wesi nume di viu zkomplizierte Aamäudixprozedure fürdi unsäglech umschtändleche Zalix- u Vrsandformalitäte würde übrschtah. Da wärde nämlech gäng Passwörtr abvrlangt, wome gar nid het, wome gar nid wott u wome gar nid kennt. Scho mänggisch ischne di Amäudig grüntlech abvrheit, ud Problem föh geng scho bide Passwörter a, wi scho xeit. Da wärde mänggisch Passwörtr abgfragt, wome gar nid kennt, unes füehrt niene häre, weme dert irgendöppis isetzt u usfüut. Scho mänggisch ischne das grüntlech abvrheit. Meischtns gäbesi grad uf u bräche dr Bezauvorgang enttüscht ap, wüu weme gar nid erscht iz Gschäft chunnt, wüume scho nume für di abvrreckte Passwörter e wittere Apparat bruchti, vrzichtetme liebr ufene Chouf, u zwar sofort, das isch klar, wüume nid cha ändlos usprobiere, bises äntlech geit. Irgendeinisch vrleidez eim. Drzue chunnt, dassi wüsse, das grad i däm Bereich e Huuffe Gounr u Betrüegr am Wärch si, wos nume ufd Kreditchartenummero abxeh hei, wome geng zuesätzlech müessti itippe. Nei merci. Me mues auso guet ufpasse unes Gschäft sofort abbräche, weme nümme sichr isch, aussech i komplizierti u befrömdlechi Vrhaute u Vorbehaute la izwickle, wüu si hei i irem Läbe insgesamt vilech öppe zäh settigi Umhängetäsche für Here pschteut, u vo dene si öppe sächs acho, u vo dene sächs si mindeschtens vier zimmli odr grad ganz unbruchbar xi. Drus chame xeh, dass Terfouxquote zimmli gring isch, u drum sötme ufene Chouf liebr vrzichte, vor auem denn, weme sinr Sach no nid ganz sichr isch, odr wedr Vrchöiffr o nume entfernt unseriös würkt. O hie giut: Liebr ke Chouf tätige, aus emene mügleche Betrug zungrlige. Es beschteit bereiz itze, we o nume asatzwiis, Tmüglechkeit, das dür di endr notizehafti Schribwis scho jede Zämehang u jede Zämehaut vrlore ggange si, wüu e ganz übli Sach zeichnezech langsam ap, u we das würklech so isch, de het o das Schribe sofort ke Sinn meh: Zkonzept beschteit nid drin, das eifach nume beliebige Notize anenanggsetzt chöi wärde odr dörfe odr müesse odr söue, wüu o hie ligt dr urschprünglech u effektiv Sinn vom ganze Schisdräck usschliesslech im Sukkursalismus vom Schtrukturalismus, u nid eifach im beliebige Beliebigkeizismus vodr Auerwäuzklass. Nei, me muessech zersch langsam widr uffah u abtaschte u agliche, ume mues grad nächär ernöit chönne vo vore afaa, schüsch geitr ganz Sinn vodr Sach ändgüutig dr Bach ap u unwidrbringlech vrlore, ude wär dr literarisch Wärt grad nuł. Capisce? Vo nuł chunnt nüt, uvo Mull gizo nüt Bemerkenswärz. Abr vom Mull chöme aui u zum Mull gö aui; dr Mull isch i aune u i auem drinne. Är bedüttet nid eifach nume Ghüdr, sondrn ‘sehr weich’. Di Bezeichnig fürnes finfädix, witmaschix Bouelegwäb isch usm Änglische mull übrnoh worde, wo sinrzitt us Hindi malmal entlehnt isch. Dä Begriff cha o für lockere, weiche Humus vrwändet wärde, udr Mull isch drzue ono es muwurfähnlechs Nagetier ohni Peuz. Abr vo däm isch hie nid Tred, u schtarch vrhangeni u üsserlech xeh längwiligi, graui Tage vrleite eidüttig zum Schribe. Das isch bekannt, wüu das isch eifach eso. Das chame nid ändere, wüu zSchribe isch ono e extrem beläbendi Form vo schnufe. E schriftlechi Tiefeatmig erliechteret am Extremischt dr läbeswichtig Surschtofffluss, wüu Tatmig an sich ischja o bereiz e wichtigi Form vo Läbe. Es par angeri Faktore chöme no drzue: Dr Härzschlag, dPułsfrequänz, dr Fahrschtil, dKreditchartenutzig, dPuessemängi uz Nussbedürfnis. Dr Vrzehr vo Nüss udr Vrcher vo Nüss bewürke e Nussintrdependänz; me brucht Nüss, um Nüss chönne zässe, abr o Tnüss bruche Nüss, um übrhoupt Nüss chönne zsi, u was wenigr bekannt dörfti si: O Tnüss bruche Tnussässr u Tnussgwohnheite. Si si ufse agwise, usi chönne ohni Nüss eigetlech gar nid Nüss si. E Ma mit Nüss cha bekäntlech guet küsse, o in Füssen im Allgäu, dert küssesi mitte Füess, u ufde Füess chadr Gniessr bessr grüesse aus ufde Häng, das schteit scho mau fescht, wüu im Handschtang hetr ke Hang frei, es sigde, är chönni eihändig dr Handschtang mache. Abr es Tier ischno lang nid hier, abre Schwanz isch wichtig füre Tanz. Abr nid ganz. Wäm dr läng Schnuf fäut, sözzech gar nid ersch ufe Wäg begäh, u wo Bärge sech zügig erhäbe, läbe odi Schneebäse, udi durchsichtige Wäse si o nümme wit ewägg, wüu schön u rich isch scho immr gärn zäme xi. Tschtärne si färn, u das noso gärn, abr nid hie zBärn. Öppr het vomene französische Müntschi xunge, auso vomene richtige Zungekuss, odr vomene psungere Zungeschlag, odr vonere richtige Zungewurscht, wes höch chunnt, vilech o nume vomene Zungebrächr, abr one grusige, wiissleche Zungebelag odr e französische Zungebeschlag isch dängkbar, ganz abxeh vomene afrikanische Zungeschlag, vilech es chum wahrnämbars Lischple wi bim Bundesrat Berset odr o nume eifach e feissi französischi Chue mittere länge französische Zunge, wosech drmitt di eigete Naselöchr cha abschläcke. Abr e französische Kuss imene französische Bett, mit auer Ufmerksamkeit u praktisch zeremohniell dürezoge u usgfüehrt, macht eifach grad aues widr wett ufm glatte Parkett vode französische Missvrschtändnis. No liebr aus gärn hetme abr Schiebr u Siebr, wüu Drohne klone, u Pfile peile Keile u schneie e churze Momänt u schpile drzue ono Eile mit Weile, di Geile cheibe vo Plaffeie. Nüt droht am Wättr, zWättr blibt in sich schtabil, es schtabils Hochdruckgebiet herrscht vorwiegend vor, abr uf «Gebiet» reimzech sozäge nüt, jedefaus faut am suechende Suechi, auso am Wörtrsuechi Toni nüt drzue i, wedr es Suschi, nones Duschi, udr Vrsuech, dr Outoschlüssu zvrlüre, ischim o definitiv abvrheit. Är häti abr müesse wüsse, dasr o ohni Outoschlüssu cha outofahre, abr nume einisch, u nächär nie widr, wüu das Outo chasech vo säubr ipschliesse, weme usgschtige isch. Das isch di elektronischi Faue, u aui Fäu schwümme eim drvo. Das Modäu isch mit elektronische Faue gschpickt, u überau lüchte Lämpli i aune Farbe uf, u niemr chane säge, was das aues söu bedütte, psungrs die winzige, chum erkennbare Lämpli im Hingrgrund. Me hetne zwar xeit, das ghöri zum Compiutrprogramm vom Outocompiutr, abr drzue chunnt, dasme bidr Nutzig vo däm Fahrzüg schtändig belehrt, bedroht u beleidigt, bekleckeret u beschimpft wirt. Me wirt immr widr uf ganz penetranti Wis zrächtgwise, weme zum Bischpiu zschnäu fahrt, so wime o subito kläpft wirt, weme znöch ufe Vorderma duet ufschliesse, ganz abxeh vom blöde Sichrheizgurt, womesech ohni Trick zwangswiis müesti aschnaue. Me müest auso zersch e Zwangsaschnauig vornäh, bevorme übrhoupt chönnti wägfahre, weme nid wüssti, wime dr Bordcompiutr duet pschisse, wüu schüsch drohti eim grad dTodesschtraf im Säubschttüschixvrfahre. U weme di Sichrheizlinie o nume duet schtreiffe, nidemau duet übrfahre, wirt sofort usde sittleche Gebüsch use mit tödleche Panzerabwehrkanone gschosse. Übrhoupt wirtme aus Vrchersteilnämr imene moderne Outo aus richtige Idiot behandlet, u vodr blamable Tatsach, das ke normale Mönsch intuitiv cha erfasse, wi zum Bischpiu das moderne Outoradio fungkziohniert, redemr hie gar nid. Scho nume das Schisradio! Läck du mir! Hetmes äntlech igschautet, chames nüm usschaute, u hetmes äntlech usgschautet, chames gar nümm ischaute. Vom Telefon weimr gar nid erscht afaa, odr vodr Sändrwau, odr vodr Schprachfüehrig ersch! Guet Nacht am Sächsi! Drfür wirtme immr widr belehrt, dasmesech äntlech söu aschnaue, dasme zlinggs odr zrächz fahri, dasme zschnäu odr zlangsam sigi, dasme Zliecht nid igschautet heigi, dasme dr Blingkr vrgässe heigi odr dasme znöch ufgschlosse sigi odr znöch am Velofahrer vrbigfahre sigi, lutr settigi Sache, wone usrichend vorsichtige Outofahrer gar nid intressiere.

Me cha auso nid phoupte, das eim di moderne Outo mit irne ipoute Läptops gfaue, wüs praktisch unmüglech isch, dasme chönnt usefinge, wi dä ganz Schisdräck fungkzioniert. We di Outo eifach nume sötte fungkziohniere, u schüsch nüt, o wesi gar ke Kupplig meh hei, fahresi hüt aui outomatisch u immr fautsch.

Immr isch irgendöppis fautsch; me cha gar nid wüsse, das so viu fautsch cha si, wome macht odr nid macht.

Wesi eifach nume sötte fahre, chamesech drmit schtundelang dasumeschlah, u me mues befürchte, das one Blick it Gebruchsawisig ke wahri Hiuf wär, o nid uf Japanisch odr Chinesisch, u me mueses eifach vrgässe, nume wöue Outo zfahre u schüsch nüt, ume cha grazzoguet zFuess ga, das wär wäsentlech eifacher u schpilerischr, wüu grad bim Parkiere scho widr e wahre Schwau, e wahre Wassrfau vo Aawisige, Warnige, Mahnige, Belehrige u Vorschrifte ufdi arme Outomobilischte wartet, immr sehr dütlech u penetrant usgschproche vonere junge Dame, wono niemr pärsönlech kennt u wome nidemau chönnt chläpfe, u vo dere niemr chönnt säge, wisi usxeht u wärsi sich, o nid, obsi säubr chönnti outofahre, wesi möchti u chönnti u dürfti, o wesi immr so tuet, aus wüsszi aues, aus chönnzi aues u aus kennzi aues. So gömr eifach zFuess witr, wis fürne Dichtr richtig wär, wi sinrzitt dr Wauser Röbu. Mir wandle luschtvou vo Bärn nach Züri. Zack! U vo Züri nach Biu, zur liebe Schwöschtr, wüumr ke Schtutz meh hei. Zack! U vo Biu widr nach Bärn, idi chlini Mansarde adr längzognige, chrumme u schiefe Jubiläumsschtrass, wodi gsittete, freisinnige Familie i irne schöne Hüsr mitte schöne Gärte wone, wome einsam usm Mansardefänschtr useluegt u lang übrleit u drübr nachedängkt, werum me eigetlech säubr ke Gäut vrdient. Me gizzech doch Müe? Me isch doch Tag u Nacht dranne, me isch doch drbi, me isch usschliesslech mit Literatur beschäftiget, u zwar mit sire eigete Literatur, nota bene, weme nid grad idr Peiz hocket u gierig de wüeschte, dicke Serviertöchtr nacheschtaret u duet mitte Ouge vögle, winr einisch vrzeut het? Me vrschickt doch schtändig unzähligi Bättubriefe i ganz Schwede u sogar nach Dütschland, aui einzeln u pärsönlech u vo Hang gschribe, ohni je e Antwort zübrcho? Me zerbricht sech doch schtändig dr Chopf übr komischi Gschichte, diräkt usm Läbe ggriffe wi bim Karl Valentin odr wi bim Italo Svevo, däm italiänische Schwob, Gschichte, wo-no gar nid gschribe worde si, u duet schtändig abwiegle, obsi sech literarisch übrhoupt würde eigne, obme e Chöiffr drfür würdi finge, odr äbe doch widr nid. Wo isch auso dr vrreckt Dängkfähler, vrtamisiech? Sicher nid bim Wauser säubr, wou endr bidr Minabilität vode hiesige Geischtr, auso bidr Ungrdurchschnittlechkeit vom fade, bedütixlose u öde Landesgeischt säubr, wo nüt vo Literatur vrschteit, wo nüt vo Literatur wott wüsse, wo nüt aus es debius Gebiude vo luttr debile Elemänt darschteut, vo Debile für Debili, u wo angeri Idiote usdängke, genau widr Schport u wid Folklore hie. Isches auso doch nume Tängi vom Rum? Isches Tbeschrängktheit vodr Masse idr Tasse? Isches dene iri ageboreni Imbezilität wäge au dere Inzucht u au däm Inzescht? Isches dr Aukohou? Odr isches dr inhärent Schwachsinn vonere ganze Generazion, vonere lengschtens abghobnige Füehrixschicht, wos eifach zschön het? Me chasech würklech schtändig hingrsinne ab dene Frage, ume chunnt nie ufene grüene Zweig, wüu e Debile schteuzech setigi Frage nie.

Dr Durchschnizschwizr schteuzech kenr Frage u isch eifach nume debil, das längt, das isch aues, u das längtim i auer Debilität u Gnüegsamkeit es ganzes Läbe lang. E Gsunge hüetet sech inschtinktiv vor nöche u ferne Bluezvrwandte, am meischte vor aune nöche natürlech, u meischtens schämtersech ono fürse u grämzech drwäge, u das wär sogar normau. Är dängkt inschtinktiv, dasr doch no nideso tief gsungke cha si wi aui sini Bekannte u Vrwante u Bluezvrwante zäntume, dasr doch no nideso bekackt cha si, dasr doch no nideso pschisse u o nideso beschrängkt u beschöiret chönni si wi die, dases auso eigentlech numenes genealogisches Missvrschtändnis chönni si, dasr mit dene übrhoupt vrwandt sig, we o nid umbedingt bekannt, wüu är dängkt überse numeno im Konjungktiv odr im Depressiv odr vilech sogar scho im Suizidiv, wes höch chunnt. Är dängkt: Wäri wi si, de wäri ja genauso dämlech wi si, genauso doof, genauso beschöiret, genauso beknackt, genauso primitiv u, vor auem, genauso beschrängkt wi si? Isches nideso? Dängkemr nid aui outomatisch so? De wär nämlech aues plötzlech gritzt, de wär äntlech aues im Grüene, de wärs scho widr guet, wüu denn würz äntlech o für mi flutsche, sägesech aui. Drum hetr Wauser si gross Bruedr Karl so bewunderet, wüuer het gwüsst, das dr Karl aus Künschtler würklech erfougrich u überau bekannt, ja, sogar wäutbekannt isch worde, sogar Zdütschland, auso im Rich äne, u är, dr Röbi, haut nid.

Sogar sini Schwöschtr Fanny sig dr bessr Mönsch aus är, o wesi nume e Primarlehrere isch, findetr, o wesi numene Frou isch. Si sig abr zueschtändig u säubschtändig u heig e feschti u vor auem zauti Arbeit im Jura obe, zBellelay, usi häufi ihm immr widr mit Gäut us, nume wüuer ire mittulos jüngr Bruedr isch, u schüsch wäge nüt. Abr drum sig zFanny u o dr Käru viu besseri Mönsche aus är, dr Röbi. Dr Käru, mit dämmr sinrzitt zBerlin zur Beluschtigung vodr literarische Xeuschaft im Salon dr Hoselupf vorgfüert het, sig elei drum dr bessr Mönsch, wüuer erfougrich sig. Är sig nämlech nid nume dr bessr Künschtler, är sig vrdientrwis odr bessr Mönsch, wüu nume e erfougriche Mönsch chane guete Mönsch si, ganz eidüttig, wüu e erfouglose Mönsch wi är chönni garke guete Mönsch si. Dr Käru sig zDütschland äne erfougrich, wüuer e guete Mönsch sig, auso im Ussland, u das sig doch e richtigi Uszeichnig fürne Schwede, wo hie zSchwede chum Entwicklixmüglechkeite hät u heigi. Das sig drum e dütlechi Ehrig une unmissvrschtändlechi Anerkennig, wo ihm, auso am Röbu, vrseitt pliben isch, vrwehrt pliben isch u vrbotte pliben isch. Ehrig u Anerkennig sige haut öppis, wo ihm vrwehrt sige plibe, wüuer wahrschinlech eifach zweni guet sigi. Ihn düegi niemr vrehre, är vrmissi auso jeglechi Ehrehaftigkeit u Ehrbarkeit u drum o jeglechi xeuschaftlechi Anerkennig. Abr odr Käru häufi ihm immr widr usdr Patsche; dä chönni sogar nach Japan reise, i das ferne, unbekannte Land, eifach so, us reinem Gw-ungr, nume wäge de schöne Grafike vode japanische Künschtler, wome zParis schinz tür chönni vrchouffe.

Är abr, dr Röbi, chönni niene meh häre reise, nidemau zrügg nach Berlin, höchschtens zFuess ufe Gurnigu u widr zrügg, odr ufe schteile Niese ufe u widr zrügg, u nid nume sini Schueh xeh immr ganz drnah us, o är säubr sigi zeichnet vom soziale Eländ, seitim dr Käru.

Abr är heigi nüt Bessers vrdienet, är heigi nid meh vrdienet aus das, aus das miggerige Poeteläbe i dere chaute Chammere ungerem Dach für di ungerschte Schichte vo Bedienschtete, u schliesslech u äntlech wärdi är im herisouer Heim für auti, usgmuschtereti Bekloppti numeno di aute, pruchte, vrbruchte, vrchnüpfte u vrzworgglete Päcklischnüer uflöse u sortiere udi aute Zittttige dörfe bündle, das sig aues. Für das sigr grad no knapp zbruuche, seitr, u schüsch für nüt; udi forschi Töfffahrt düre froschtig u früsch Forscht, wodr Koni udr Toni hüt am Nami düe ungrnäh, gschtautet sech meh froschtig aus forschtig, unes het immr di gliche Schpazziergängr am Rand vom schmale Schträssli, wosech vo Bümpliz us übr Obrbottige, Chäs u Brot u Matzeried düre gross, dungku Waud zieht, wo eifach nume Forscht heisst usech dr Schtutz ap nach Loupe schlänglet. Dschpaziergängr träiesech immr um, wesi schön hingerenang dürefahre, luegene immr lang u nachdängklech nache, wesi ane vrbifahre, wi wesi möchte usefinge, wärs äch isch, wisi heisse, wohärsi chöme u wassi hie äch wöue, di zwe aute Töffler uf irne zwe aute Töffe, woso lut tuckere, dassi, wesi widr deheime si, ihrne Liebschte öppis zvrzeue hätte, wesi übrhoupt Liebschti deheime hätte, wänsi zum Bischpiu ungrwäx xeh heige. Idr himuhöche u luftig wite Landschaft vo Auelüfte u Rosshüsere u idr Süri u bim Bärfischehus weide hüt zotteligi Schaf, u Tschäfr chätsche säubschtvrgässe amene trochne Brotrouft odr amene Bitz Chäsrouft ume u luege vrsunne a Horizont übere, aus chönntesi bis uf Amerika xeh, ohni di beide Töfffahrer zbeachte. Zwättr isch miud u ladet zum Töfffahre i, o wes scho zimmli früsch isch. Tgägend isch läär u wi vrlasse u richtig xüchtig, ehrlech xeit, wüusi so offe isch wi fasch niene schüsch, udi zwe Motorwanderer finde zAuelüfte äntlech dä wohltuend Witblick i aui Richtige, wosi im Gürbetau u schüsch im ganze Land es bizzeli düe vrmisse. Es git nid viu Orte mit somene woutuende Witblick wiz Auelüfte; meischtens füuzech dr Reisend nume vo häregschissnige Bärge vrfougt u schtändig vo Flüeh u herrische Gipfle bedroht; si nämenim ungfragt Zicht u vrdecke dr Blick uf nöji, no unbekannti Regione vom Land u vodr übrige Wäut.

Es isch haut so: Immr wird amene bekackte Neandertaler hie Zicht gno; irgendöppr het immr öppis drgäge, dassech dr begabt Zuehäutr vom ewige Schnee das Land übrhoupt richtig cha aluege, wüu chum lüpftr dr Blick vom Armaturebrätt odr vom graue Schtrasseband, xeetr numene witteri Schiswang vo irgendemene Schisbärg vorsech, odr dr nächscht Schisbärgzug odr di nächschti Schisflueh, vo dere sech früechr di arme Meitschi vrzwiflet gschtürzt hei, wesi i Schang grate si u ke Uswäg meh xeh hei. Abr wi chame nume so läbe? Immr das dicke Brätt vorem Gring?

Immr dä unvrmidlech Bauke im Oug? Immr di fule Tomate ufde Lüeschr? Immr das ewig länge Vrzeichnis vode aschtehende Ufgabe vou Mischt u Seich u Dräck vor Ouge? Isch das no normau, odr isch das scho schpezifisch iheimisch odr eifach nume debil?

Di ganzi Undułdsamkeit? Di ganzi Igschrängktheit?

Di ganzi Ängi vo däm vrschteinerete Land? fragesi sech immr widr. Wahrschinlech ligt dPsundrheit nid nume i sire Chliini u i sire Ängi, sondrn o i sire Iigschrängktheit bis zur geischtige Beschrängktheit, meint dr Koni, udr gneigt Exeget mues i sire Exegese langsam erkenne, das wär nume einisch si Chopf lüpft u übrdi grusigi Mängi vo eidüttige Haubschüeh ewägg luegt, vodr Mängi grad sofort widr abezoge wirt – odr sogar abegschrisse wirt –u im widrhoute Fau wirtim eifach dr Chopf apgschnitte. Zack! Dr Gring wägg u fertig! So machz dr xung Voukskörpr mitte Lüt, wo nideso rächt zum Vouksganze wei passe, u so machterse subito zu gneigte Chriechtier, zu ungrwürfige Muwürf, zu blinde Blindschliche uzu schliimige Schnägge, widr xung Voukskörper drzue hönisch seit, zu abxagete Jasägr u akläbte Wackeldackel, zu putzige Nickmännli u luschtige Wingkefigürli a Rückschpiegle u uf Armaturebrätt, zu dienschtbare Zwäckdienr, zu schtumme Duftböimli u– we immr müglech – ono grad zu untrwürfige Söifrabschläckr. So sisi beschaffe, di Schwizr, abr o iri Vorxetzte udi feine Here u Dame mit ihrne zaulose Zuediener u dienschtbare Zwäckdiener, so muesmese xeh i ihrem ganze, barocke Glanz, u so heise o dr Toni aus Zuediener udr Waggelipudding Koni libhaftig erläbt, sowahr ihm Tglotze hiuft bidr Erinnerig. Abr si weisech itz nümm i settige Erinnerige ergah, wüus eifach nume schlächti Erinnerige si, aues i auem, unes si tatsächlech nüt aus schlächti Erinnerige adi vile Jahr idr Höu vom Gschäfzläbe idr Optikrbrangsche, nüt aus schlächti Erfahrige, nüt aus schlächti Erläbnis u aus ganz schlächti Erkenntnis, ganz eidüttig, nüt aus übli Erinnerige, wosi gärn druf vrzichtet hätte, wesi scho früechr hätte chönne, bevorsi zwe auti Räntner si worde, wüu settigi Erinnerige si nidemau e Gwünn a Erfahrig u a Erkenntnis – nidemau das. Gueti Erinnerige wäre zwar erföilech, abr si vrgässese meischtns schnäu widr. Nume di schlächte Erinnerige blibe hange u blibe chläbe, wüu immr widr touchesi aus klari Bedrohig uf, als gemeine Aagriff uf ires Woubefinde u aus bösartigi u unmissvrschtändlechi Drohgebärde vo unbekanntr Sitte. Eigentlech schteuesi e gwautige Vrluscht a Vrtroue dar, udi vrwunderete Vrwundete, auso dr Koni udr Toni, müesse sech frage, wase settige Vrtrouensvrluscht a risige Löchr im Säubschtbefinde u im Säubschtbewusstsi eigetlech düe hingrlaa. Ires Innere xeht fouglech wine Ämmitaler us, heisi zäme usegfunge, auso wine Innetaler vom Ussetaler, odr wine Innetaler im Ämmitaler, auso wiz Inneläbe vomene Ämmitaler, was zuetrifft u passt, wüu schliesslech sidi Ganzjahresinschtrumentalischte ja o Ämmitaler, u zwar Usseämmitaler im Inneämmitaler oder e Inneämmitaler im Usseämmitaler, was scho passt u scho schtimmt – auerdings nume vo usse, u nid vo inne.

Sisi beid us Chäsiz, si hei beid ihres ganze Läbe nume zChäsiz vrbracht, usi wärde zChäsiz sichr o schtärbe, das isch klar, abr das machtne nüt us. Si chöme beid usem Gürbetau, wenigschtens iri Vorfahre, us Choufdorf u us Wattewiu, u ghöre beid zude Abkömmlinge vode vrlumpte Schaare vo eifache Landlüt ohni Land u ohni Lüt, wo vor zwöihundert odr drühundert Jahr wäge reiner Armuet vode riiche Pure eifach furtgjagt worde si, zum Tüfu gjagt worde si, wime denn xeit het, auso usm Gürbetau vrtribe worde u gflüchtet si, mit Höigable u Dröschflegle u rasende Chöttihüng, vrjagt u eifach gäng witr ggange si, gäng furt ggange, vo Wattewiu übr Lohnstorf nach Mühleturne, vo Chiucheturne übr Rümlige nach Choufdorf, u schliesslech übr Toffe nach Bäup u Chäsiz, immr schön dr Gürbe nah, dürz ganze Tau ztürapp, immr idr Hoffnig ufenes bessrs Plätzli irgendwo, ufenes bessers Läbe irgendwo, vilech ufde vrschtröite Höf vode Grosspure im ungere Tau, um nid müesse nach Bärn zga, i Obraargou odr iz Mittuland, um nid ide armselige Vorschtedt zlande, bide Vrlumpte ude Vrgässene, wüu witr hei di Lumpeprolete denn nohnid tängkt, wüusi gar nid hei chönne wittrdängke, genauso weni widi feine Here im Rathus zBärn äne. No lang nid. Si hei nume bis dert tängkt, wo di bekannti Wäut het ufghört, odr wosech zganze bärnische Lumpeproletariat het axammlet wi Dräck odr Ghüdr odr Schlamm u Sang, aus Niemr u Namelosi, aus Bedütixlosi u Schamlosi, auso das ganze Pack, zGsindu, äbe zLumpeproletariat, di Psitzlose, di Landlose, di Mittulose, di Biudixlose, di Schprachlose, di Namelose, di Heimatlose, di Häreglüffnige, di Dasumetribr, di Peizehockr, di Süüfr, di Niemr, di Soucheibe, di Schnudrhüng.